Xitayning sun'iy hemrahqa qarshi bashqurulidighan bombisi dunyagha tehdit élip kélidu


2007-01-30
Share

Sénator jan kél, xitayning sun'iy hemrahgha qarshi bashqurulidighan bomba siniqi élip barghanliqini amérikining milliy menpe'etliri üchün xeterlik bir heriket dep tekitlewatqan amérika dölet mejlisi ezalirining biri hésablinidu.

Xitay ning aldin'ala teyyarliqi

Jan kél 29 ‏- yanwar küni washin'gtonda miras fondi jem'iyiti teripidin xitayning bashqurulidighan bomba siniqi heqqide ötküzülgen yighinda söz qilip, gerche xitay hökümiti, alem boshluqining herbiyleshtürülüshige qarshi ikenlikini jakarlighan bolsimu, lékin alem boshluqida ishlitilidighan qorallarni tereqqi qildurushni üzlüksiz dawamlashturuwatidu, dédi. Sözide, kishiler xitay hökümitining tinchliqni yaqlaydighan quruq sözlirige heddidin ziyade ishinip kétip baridu dep tekitligen jumhuriyetchi sénator mundaq deydu:

"Xitayning herbiy idiyisi we bu heqte yézilghan matériyallar, xitayning alem boshluqining qorallardin xali bolushigha ishenmeydighanliqini körsitidu. Eksiche, xitay özining milliy bixeterliki, bolupmu amérika bilen teywen mesiliside chiqidighan bir toqunushqa teyyarliq qilish üchün, alem boshluqidiki herbiy iqtidarini tereqqiy qildurushi we kücheytishi kéreklikige ishinidu".

Alem boshluqi bixeterlikini amérika milliy menpe'etining eng muhim bir qisimi dep körsetken sénator jan kél, amérika herbiy qisimlirining pütün heriketliride sün'iy hemrahgha muhtaj ikenlikini tekitlep, xitay hökümitining alem boshluqidiki herbiy küchini üzlüksiz tereqqiy qildurushi, amérikining milliy menpe'etige tehdit qilidighan bir heriket dep agahlandurdi.

Amérika xitaygha qattiq qol bolalmaywatidu

Sözide, prézidént bush hökümitining iraqtiki meshghuliyiti hemde xitay bilen bolghan murekkep munasiwiti tüpeylidin xitayning sün'iy hemrahgha qarshi bashqurulidighan bomba siniqigha kéreklik qattiq teleppuzda jawab qayturalmighanliqini bildürgen sénator kél mundaq dédi:

"Chünki biz, xitay bilen birlikte qilmaqchi bolghan tijaret qatarliq nurghun ishlar bar. Iran we koriye mesililiride b d t bixeterlik kéngishining qollishigha érishish üchün hökümet xitayning yardimige mohtaj. Bu mesililer hökümetning men arzu qilghandek xitayni tenqid qilip, xitaygha qarshi qattiq bir pozitsiyide bolushigha tosqunluq qiliwatidu".

Xitayning sün'iy hemrahgha qarshi bashqurulidighan bomba yasash téxnikisini amérikidin alghan yaki almighanliqini éniqlap chiqish üchün, amérika dölet mejlisining guwahliqtin ötüsh yighinliri teshkillishi kéreklikini bildürgen sénator jan kél, xitayning bundaq ilghar qorallar yasap chiqishining aldini élish üchün, amérikidin xitaygha bolghan téxnik éksportini téximu qattiq kontrol qilish kérek, dédi.

Bu hemme dölet üchün muhim bir mesile

Sénator jan kél, miras fondi jem'iyiti teripidin xitayning bashqurulidighan bomba siniqining tesiri heqqide ötküzülgen yéghinda qilghan sözide yene, xitayning alem boshluqida élip barghan bashqurulidighan bomba siniqining peqet amérika üchünla emes, tinchliqni xalaydighan pütün döletler üchün muhim bir mesile ikenlikini tekitlep mundaq dédi:

"Bundaq bir küch her birimizge tehdit qilidu. Bu peqet herbiylerge qaritilghan tehdit emes, yan fonlirimizdin tartip, téléwiziyide körüwatqan programmilirimiz hawarayi toghrisidiki xewerler qatarliq hemme némige qaritilghan tehdit hésablinidu. Hemme néme sün'iy hemrah téxnikisigha qarashliq bolup qalghan bügünki dunyamizda, herqandaq bir döletning bu téxnikigha xewp keltüridighan küchge ige bolushi hemmimizni endishige sélishi kérek ". (Qanat)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet