Xitay we Uyghur élide saqta dorilar yamrimaqta

• Muxbirimiz méhribanning bu heqtiki melumati
• Download story audio

Xitay agéntliqi teripidin bérilgen xewerdin melum bolushiche, yéqinda xitayning gu'angdung ölkiside yene 4 neper kishi saqta dora ishletkenliktin hayatidin ayrilghan.

Xitay shinxu'a agéntliqining melum qilishiche, hazirgha qeder saqta dora ichip ölgenlerning sani 9 gha yetken. Tekshürüsh netijisidin ashkarilinishiche, hayatidin ayrilghan bu 9 neper bimarning ishletken dorisi xarbin chichixar dora zawutining ötni dawalash dorisi bolup, uning terkibide hetta börek we nérwa sistémigha zor ziyan élip kélidighan zeherlik terkibler bar iken.

Mezkur weqe yüz bergendin kéyin, xitay dölet zunglisi wén jyabaw mexsus buyruq chüshürüp, memliket ichidiki dora ishlepchiqirish orunlirida zor tekshürüsh élip bérishni otturigha qoyghan. Shinxu'a agéntliqining melum qilishiche, hazirgha qeder 5 neper munasiwetlik xadim saqchilar teripidin qolgha élin'ghan bolup, soraqqa tartilghan.

Uyghur élide süpetsiz dorilarning tarqilishi keng

Xitay agéntliqining ürümchidin bergen xewiride éytilishiche, hazir Uyghur élidimu saqta dorilarning türi barghanséri köpiyishke bashlighan. Mesilen, yéqinda yuqirining buyruqi boyiche élip bériliwatqan tekshürüshlerdin melum bolushiche, xarbin chichixar dora zawutidin Uyghur élige ekilip sétiliwatqan xilmu - xil saqta okul - dorilirining özila 90 ming parchigha yetken.

5 ‏- Ayning 23 ‏- küni ürümchidin bérilgen melumatta körsitilishiche, hazir aptonom rayon boyiche saqta dorilarni bir terep qilish herikiti resmiy bashlan'ghan bolup, bolupmu xarbin chichixar dora zawutining mehsulatlirini qattiq kontrol qilish we tekshürüshke bashlighan hemde hazirgha qeder 106 qétimda yötkep kélin'gen 19 türlük saqta dorilar tekshürüp tépilghan.

Uyghur élidin bériliwatqan munasiwetlik melumatlarda körsitilishiche, mezkur rayonda sétiliwatqan saqta dorilar peqet xarbinning chichixar dora zawutida ishlep chiqirilghan dorilarla bolup qalmay, "jing lu" namliq dora shirkitining dorilirinimu öz ichige alghan.

Ürümchi shehiridiki bir aliy mektep xizmetchisining bildürüshiche, hazir ürümchide saqta dorilarning köplükidin, kishiler dora élishtinmu qorqidighan bolup qalghan. Biz Uyghur élidiki saqta dora mesilisi heqqide mezkur rayondiki dora nazaret qilish idarisi we bir qisim doxturxanilargha téléfon qilip ehwal igilimekchi bolduq. Ziyaritimizni qobul qilghan ürümchi dostluq doxturxanisining dora bölümi mes'uli hazir aptonom rayon boyiche saqta dorilarni bir terep qilish üchün heqiqeten jiddiy tekshürüsh élip bériliwatqanliqini tekitlep, Uyghur élidiki saqta dora mesilisining xitay ölkiliridikige sélishturghanda u qeder éghir emeslikini bildürdi. U yene tekshürüsh ömikining mezkur doxturxanighimu kelgenlikini melum qildi.

Namratliq Uyghurlarni tuyuq yolgha bashlimaqta

Ziyaritimizni qobul qilghan mezkur doxturxanining dora bölümi mes'uli "gerche Uyghur élidiki sheherlerde saqta dora mesilisi xitay ölkiliridikidek éghir bolmisimu, jenubiy rayondiki namrat jaylarda mezkur mesile yenila éghir. Biz bu heqte mexsus tekshürüsh élip barghan. U jaylarda dora intayin kem. Bar dorilarningmu köp sandikisi saqta yaki waqti ötüp ketken. Lékin, biz ulargha bundaq dorilarni ishletmeslik heqqide söz qilghinimizda, ular "waqti ötüp ketken bolsa qandaq qilimiz, bizning ya pulimiz bolmisa " dep naraziliq bildürdi. Démek u jaydiki kishiler namratliqtin dorining shipasiz yaki saqta ikenlikini bilip turupmu, yenila shuni élishqa mejbur bolidu " dep bildürdi. (Méhriban)