Хитай вә уйғур елидә сақта дорилар ямримақта


2006-05-23
Share

Хитай агентлиқи тәрипидин берилгән хәвәрдин мәлум болушичә, йеқинда хитайниң гуаңдуң өлкисидә йәнә 4 нәпәр киши сақта дора ишләткәнликтин һаятидин айрилған.

Хитай шинхуа агентлиқиниң мәлум қилишичә, һазирға қәдәр сақта дора ичип өлгәнләрниң сани 9 ға йәткән. Тәкшүрүш нәтиҗисидин ашкарилинишичә, һаятидин айрилған бу 9 нәпәр бимарниң ишләткән дориси харбин чичихар дора завутиниң өтни давалаш дориси болуп, униң тәркибидә һәтта бөрәк вә нерва системиға зор зиян елип келидиған зәһәрлик тәркибләр бар икән.

Мәзкур вәқә йүз бәргәндин кейин, хитай дөләт зуңлиси вен җябав мәхсус буйруқ чүшүрүп, мәмликәт ичидики дора ишләпчиқириш орунлирида зор тәкшүрүш елип беришни оттуриға қойған. Шинхуа агентлиқиниң мәлум қилишичә, һазирға қәдәр 5 нәпәр мунасивәтлик хадим сақчилар тәрипидин қолға елинған болуп, сораққа тартилған.

Уйғур елидә сүпәтсиз дориларниң тарқилиши кәң

Хитай агентлиқиниң үрүмчидин бәргән хәвиридә ейтилишичә, һазир уйғур елидиму сақта дориларниң түри барғансери көпийишкә башлиған. Мәсилән, йеқинда юқириниң буйруқи бойичә елип бериливатқан тәкшүрүшләрдин мәлум болушичә, харбин чичихар дора завутидин уйғур елигә әкилип сетиливатқан хилму - хил сақта окул - дорилириниң өзила 90 миң парчиға йәткән.

5 ‏- Айниң 23 ‏- күни үрүмчидин берилгән мәлуматта көрситилишичә, һазир аптоном район бойичә сақта дориларни бир тәрәп қилиш һәрикити рәсмий башланған болуп, болупму харбин чичихар дора завутиниң мәһсулатлирини қаттиқ контрол қилиш вә тәкшүрүшкә башлиған һәмдә һазирға қәдәр 106 қетимда йөткәп келингән 19 түрлүк сақта дорилар тәкшүрүп тепилған.

Уйғур елидин бериливатқан мунасивәтлик мәлуматларда көрситилишичә, мәзкур районда сетиливатқан сақта дорилар пәқәт харбинниң чичихар дора завутида ишләп чиқирилған дориларла болуп қалмай, "җиң лу" намлиқ дора ширкитиниң дорилириниму өз ичигә алған.

Үрүмчи шәһиридики бир алий мәктәп хизмәтчисиниң билдүрүшичә, һазир үрүмчидә сақта дориларниң көплүкидин, кишиләр дора елиштинму қорқидиған болуп қалған. Биз уйғур елидики сақта дора мәсилиси һәққидә мәзкур райондики дора назарәт қилиш идариси вә бир қисим дохтурханиларға телефон қилип әһвал игилимәкчи болдуқ. Зияритимизни қобул қилған үрүмчи достлуқ дохтурханисиниң дора бөлүми мәсули һазир аптоном район бойичә сақта дориларни бир тәрәп қилиш үчүн һәқиқәтән җиддий тәкшүрүш елип бериливатқанлиқини тәкитләп, уйғур елидики сақта дора мәсилисиниң хитай өлкилиридикигә селиштурғанда у қәдәр еғир әмәсликини билдүрди. У йәнә тәкшүрүш өмикиниң мәзкур дохтурханиғиму кәлгәнликини мәлум қилди.

Намратлиқ уйғурларни туюқ йолға башлимақта

Зияритимизни қобул қилған мәзкур дохтурханиниң дора бөлүми мәсули "гәрчә уйғур елидики шәһәрләрдә сақта дора мәсилиси хитай өлкилиридикидәк еғир болмисиму, җәнубий райондики намрат җайларда мәзкур мәсилә йәнила еғир. Биз бу һәқтә мәхсус тәкшүрүш елип барған. У җайларда дора интайин кәм. Бар дориларниңму көп сандикиси сақта яки вақти өтүп кәткән. Лекин, биз уларға бундақ дориларни ишләтмәслик һәққидә сөз қилғинимизда, улар "вақти өтүп кәткән болса қандақ қилимиз, бизниң я пулимиз болмиса " дәп наразилиқ билдүрди. Демәк у җайдики кишиләр намратлиқтин дориниң шипасиз яки сақта икәнликини билип турупму, йәнила шуни елишқа мәҗбур болиду " дәп билдүрди. (Меһрибан)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт