Chichixar dora zawutida ishlepchiqirilghan saxta dora tüpeylidin téximu köp adem öldi


2006.05.25
Share on WhatsApp
Share on WhatsApp

Gu'angju jungsen uniwérsitéti 3 ‏- doxturxana teripidin igiligen matériyallardin melum bolushiche, mezkur doxturxanida chichixar ikkinchi dora zawuti ishlep chiqarghan baktériye okulini ishletken 64 neper bimarning 18i hayatidin ayrildi. Xongkung metbu'atlirida bérilgen melumatlarda éytilishiche, gu'angju shehiride hazir köpligen adwokatlar ediliye yolliri arqiliq, " jazalash xaraktérlik tölem tölesh" prinsipini otturigha qoyup, ziyan'gha uchrighan bimarlargha yardem qilish qoshunigha kirgen.

5 ‏- Ayning 12 ‏- küni, xitay dölet yémek ‏-ichmek we dora buyumliri nazaret qilish idarisi jiddiy uqturush élan qilip, memliket ichide chichixar ikkinchi dora shirkiti teripidin ishlepchiqirilghan herqandaq dorilarni sétish we ishlitishni toxtitishni shundaqla herqaysi ölke we sheherlerdiki dora nazaretchilik tarmaqlirining bu xil dorilarni tekshürüp, péchetlep, musadire qilishini otturigha qoyghan.

Saxta dorilarning élanliri barghanséri köpeymekte

Yéqindin buyan Uyghur élidiki herqaysi doxturxana we dorixanilardimu, qattiq tekshürüsh élip bérilmaqta. Ziyaritimizni qobul qilghan ürümchi dostluq doxturxanisining dora bölümi mes'uli mezkur doxturxanigha xitaydiki herqaysi zawutlardin ekilidighan dora türining intayin köp ikenlikini tekitligen:

"Bizning doxturxanida herqaysi dora shirketliridin kelgen dorilarning türi bekmu köp. Lékin bularning hemmisi dölet étirap qilghan chong dora shirketliridin kirgen. Shunga tekshürüsh jeryanida, saxta dora bayqalmidi. Adette chong doxturxanilarda ishlitiliwatqan dorilar saxta chiqmaydu. Saxta dorilar peqet resmiyleshmigen bir qisim shexsi doxturxanilarda bolushi mumkin". Ziyaritimizni qobul qilghan bu dorixana mes'uli gerche yerlik nazaretchilik idarisi teripidin élip bérilghan tekshürüsh jeryanida, mezkur doxturxanida ishlitiliwatqan dora ‏- okullar arisida, chichixar ikkinchi dora zawutida ishlen'gen saxta dorilarning yoq bolup chiqqanliqini melum qilghan bolsimu, ürümchi shehiride, türlük dora élanlirining barghanséri köpiyip kétiwatqanliqini hemde bu xil dorilarning köp sandikisining saxta ikenlikini ashkarilidi:

"Mesilen hazir jiger késilini dawalash heqqide bériwatqan dora élanliri bekmu köpiyip ketti. Élan bergüchiler bu heqtiki dorilarni jiger késilini dawalashta, undaq shipaliq, bundaq shipaliq dep xuddi uni ichkendin kéyin jiger késilige giriptar bolghan bimarlar üzül‏- késil saqiyip kétidighandek, dorisini maxtap asman'gha chiqiriwitidu. Emeliyette, hazirghiche téxi héchqandaq dora jiger késilini üzül- késil saqaytiwitelmidi"

Mesile pütünley tüzülmide

Xitaydiki chéghida uzun yil doxtur bolup ishligen amérika dölet sehiye tetqiqat institutidiki tetqiqatchi pang yü bin ependi xarbin chichixar dora zawuti ezeldin xitaydiki eng dangliq dora zawutining biri bolup kéliwatqanliqini, shunga bundaq chong we dangliq zawutta ishlepchiqirilghan dorilar eslide saxta bolmasliqi kéreklikini sözlep kélip, yüz bergen weqeliklerdin intayin epsuslinidighanliqini bildürdi:

"Bu dora zawut, yeni xéylungjyang dora zawuti xitaydiki dora zawutlar ichide xéli yaxshi we xéli dangliq zawutlarning biri bolup hésablinip kelgen idi. Bundin ilgiri mezkur zawutta ishlepchiqirilghan dora mehsulatlar nahayiti yaxshi bahalinip kelgen. Süpet jehettimu nahayiti ölchemlik idi. Bügünki kün'ge kelgende, bundaq bir meshhur dora zawutida bu xil éghiz mesilining yüz bérishi kishini intayin epsuslanduridu. Démek bu pütünley tüzülme mesilisidin kélip chiqqan. Chünki hazir nurghun kishiler doxturxanilardin dora élishqa éshinalmighanliqtin, yuqirining herqaysi dora zawutlirigha bolghan dora bahasini töwenlitish bésimi kücheygen. Shuning bilen dora zawutliri ishlepchiqirishta ishlitilidighan matériyallarning süpiti bilen kari bolmaydighan ehwal yüz berdi. Del mushu seweblerdin, türlük saxta we nachar süpettiki dorilar jem'iyette tarqilip, kishilerning salametlikige hetta hayatigha zor tehdit élip kelmekte". (Méhriban)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.