Süriyining demeshiq shehiridiki namayish dawamlashmaqta

Ereb döletlirige tutashqan namayish yalquni kéyinki waqitlarda süriyide öz ipadisini tapmaqta. Bügün 22-aprél jüme künidiki omumyüzlük namayishni süriyilik namayishchilar “Ulugh jüme kün” namayishi dep atidi.
Ixtiyariy muxbirimiz ömerjan
2011.04.22
suriyilikler-liderlirigha-qollash-305.jpg Minglighan süriyilikler yighilip dölet bayriqini we prézidént bashar al-assadning resimini kötürgen halda, özlirining liderlirini qollighanliqini ipadilimekte. 2011-Yili 29-mart.
AFP

Süriyining demeshiq, der'a. Hems, hema, banyas, qamishli, kiswe sheherliride on minglarche xelq namayish qilip, özlirining heqiqiy hörriyet telep qilidighanliqini jakarlidi.

Tehlilchilerge köre, süriye re'isi beshshar el esed tunis we misirda partlighan xelq namayishliridin chöchüp kétip dölet ichide islahat élip bérish wedisini bergili xéli waqit bolghan bolsimu, ta hazirghiche uning islahat wedisi emelge ashmighan. Namayishchilarning asasliq telepliridin birersimu emelge ashmighan. Peqet kéyinki waqitlarda namayishchilarning telipige asasen 1963-yilidin biri süriyide üzlüksiz dawam qilip kelgen herbiy halet qanuni bilen 1968-yili qurulghan dölet xewpsizlik mehkimisi sheklen emeldin qaldurulghan. Emma ehwalda özgirish bolmighan.

Qatarning “El jezire” boliwiye qanilining 22-aprél jüme künidiki xewirige köre, bügün süriyining her qaysi sheher we wilayetliride “Ulugh jüme kün” namayishigha chiqqan on minglarche namayishchi xelq “Bizge heqiqiy hörriyet kérek, quruq wedilerge aldanmaymiz. Hazirqi hakimiyetning chüshüp kétishini telep qilimiz” dégen sho'arlarni towlap namayish qilghan bolup, süriye saqchiliri namayishchilargha qaritip oq chiqarghan. Bu jeryanda bir qanche kishi yarilan'ghan.

Süriyilik kishilik hoquq pa'aliyetchisi emmar qurbi misir paytexti qahire shehiridin qatarning “El jezire” boliwiye qaniligha bergen bayanatida mundaq dédi:“ Süriyining dölet téléwiziyisi peqet yalghan melumatlarni tarqitiwatidu. Ular süriyining her qaysi jaylirida keng kölemde namayish qilghan xelq ammisini az sandiki qutratquch küchler dep teriplimekte we süriye hökümitining herbiy halet bilen dölet xewpsizlik idarisini emeldin qaldurghanliqini yéterlik hörriyet dep teshwiq qilmaqta.

50 Yilgha yéqin waqit dawam qilghan herbiy halet seweblik bigunah türmilerge tashlan'ghan kishilerni we barliq siyasiy mehbuslar qoyup bermey turup, qeghez üstidila bu qanunni emeldin qaldurghanliq bir yalghanchiliqtur.

Süriyide 1968-yili qurulghan dölet xewpsizlik mehkimisi adettiki xelq mehkimisige oxshimaydighan mexsus herbiy mehkime bolup, sansiz bigunah kishiler bu mehkimide adwokatsiz sotlinip türmilerde chirip tügeshti, nurghunliri özlirini zindanlardin qutuldurup qoyidighan birer siyasiy özgirishni kütüp yatmaqta.

Süriye re'isi beshshar el esed 2005-yilidin buyan islahat élip bérishqa wede qilip kelgen bolsimu, hazirghiche héchqandaq bir islahat élip barghini yoq, süriye xelqi telep qilghan höriyetni ata qilghini yoq.

Uning eksiche, bir qanche heptidin biri türmilerge élin'ghanlar heddi -hésabsiz köp bolup ketti. Yene burunqidekla qiyin-qistaqlar, yolsiz qolgha élishlar, qorqutush we tehdit sélishlar dawam qilip kéliwatsa, süriye hökümiti qandaqmu özini islahat élip barduq, xelqning telipini orundiduq déyelisun!”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.