Бир нәпәр уйғур хәлқ қурултийи вәкили бейҗиңда пичақ селип өлтүрүлди


2004.09.27

" Улуқ ира" гезитиниң бейҗиңда турушлуқ мухбириниң шәнбә күни бәргән хәвиридә, уйғур елидин бейҗиңға әрз сунушқа барған хәлқ қурултийиниң бир нәпәр уйғур вәкили җүмә күни кәчтә, бейҗиң җәнубий төмүр йол истансисиниң җийешин гүллидики чөплүктә намәлум кишиләр тәрипидин 10 нәччә йеригә пичақ селип өлтүрүлгәнлики хәвәр қилинған.

" Улуқ ирақ гезити" ниң хәвиридә көрситилишичә, зиянкәшликкә учриған бу кишиниң исим фамилиси техи ениқланмиған болсиму, лекин униң уйғур аптоном районлуқ хәлқ вәкилләр қурултийиниң бир нәпәр кадири икәнлики һәмдә илгири көп қетим бейҗиңға берип, мәмликәтлик хәлқ вәкилләр қурултийиниң йиғинлириға қатнашқанлиқи вә мәркәз рәһбәрлири билән көп қетим көрүшкән киши икәнлики мәлум болған.

Мәзкүр кишиниң бу қетим бейҗиңға келиши, уйғур елидә зиянкәшликкә учраватқан аз санлиқ милләтләргә вакалитән, партийә мәркизи комитети, дөләт кабинти вә мәркәздики һәр дәриҗилик органларға, уйғур елидики чирикләшкән әмәлдарларниң дөләт байлиқини йүтүвелиши, шәхсий мал-мүлүкләрни еливелиш әһваллири шундақла чирикләшкән әдлийә әмәлдарлириниң һоқуқидин қалаймиқан пайдилиниш һәтта ялған делоларни турғузуш қилмишлири һәмдә җамаәт хәвпсизлик хадимлириниң хәлқни вәһшиләрчә бастуруши қатарлиқ уйғур елидә йүз бериватқан наһәқчиликләрни йәткүзүшни мәқсәт қилған икән.

Хәвәрдә илгири сүрилишичә, хитайниң -1өктәбир дөләт байрими һарписида, хитайниң һәрқайси җайлиридин бир қисим кишиләр бейҗиңға әрз сунушқа барған болуп, буларниң арисида уйғур елидин барған кишиләрму бар икән. Шундақла улар әслидики пилани бойичә йеқинқи бир нәччә күн ичидә җоңнәнхәй алдида намайиш өткүзмәкчи икән.

Хәвәрдә йәнә бу кишиниң зиянкәшликкә учраш җәряни тәпсилий йезилған. Униңда тәсвирлинишичә, бу уйғур киши -24сентәбир күни кәч җйешин гүллүкиниң чөпликидә ухлаватқан болуп, йол бойида нөвәтчилик қиливатқан төмүр йол хадими кечә саәт 2 әтрапида бир әр кишиниң " қутқузуңлар" дәп товлиған авазини аңлиған. Һәмдә у аваз чиққан тәрәпкә алдирап кәлгинидә, он нәччә йеригә пичақ селинған бир кишиниң қанға чилинип ятқанлиқини байқиған. Һәмдә шу заман сақчиға мәлум қилған. Әмма хели бир вақит өткәндин кейин, андин 6-7 данә сақчи машиниси нәқ мәйданда пәйда болған.

Гәрчә сақчилар зиянкәшликкә учриған бу кишини бейҗиң" шуәнву дохтурханиси" ға апарған болсиму, лекин қан көп чиқип кәткәнлик сәвәбидин қутқузуш үнүм бәрмәй -25 сентәбир күни чүштин кейин қаза қилған.

" Улуқ ира гезити" ниң хәвиридә йәнә, бейҗиңға әрз сунушқа кәлгән кишиләрниң бу хәвәрдин толиму ғәзәпләнгәнлики һәмдә уйғур елидин кәлгән әрз сунғучиларниң йиға-зарә қилип, қатилни вә бу сүйқәстни пәрдә арқисида пиланлиған кишини қаттиқ җазалап беришни тәләп қилғанлиқи йезилған. Шундақла улар буниң, һөкүмәт әтраплиқ пиланлиған бир қетимлиқ сиясий сүйқәст болуп, буниңға қара җәмийәтниң адәмлирини ишқа салғанлиқини илгири сүрмәктә.

Биз бу вәқә тоғрисида техиму илгирлигән учурларға игә болуш үчүн бейҗиңдики мунасивәтлик орунларға телифон ачтуқ. Бейҗиң шәһәрлик җамаәт хәвпсизлик идариси, бейҗиң төмүр йоли қарашлиқ чоңвен районлуқ сақчихана вә җинайи ишлар сақчи әтрәтлиригә телифон қилғинимизда, улар һәммиси буниңдин өзлирини қачуруп бәзилири бу вәқәдин хәвири йоқлиғини билдүрсә, йәнә бәзилири бу һәқтә бир нимә дийәлмәйдиғанлиқини билдүрди.

Биз йәнә зиянкәшликкә учриған кишини апарған " шуәнву дохтурханиси" ниң җиддий қутқузуш бөлүми вә давалаш ишханисиға телифон қилдуқ. Һәр иккила тәрәп, бу вәқәни аңлиғанлиқини һәмдә сақчиларниң дохтурханиға пичақ селинған бир кишини әкәлгәнликини етирап қилди. Лекин бу кишиниң исмини билмигәчкә униң әһвалини тәпсилий издәшкә имкансиз болидиғанлиқини ейтти.

Биз йәнә бу кишиниң салаһийитини ениқлаш үчүн уйғур аптоном районлуқ һөкүмәтниң бейҗиңда турушлуқ иш беҗириш орниға телифон қилдуқ. Гәрчә вақит пәрқи түпәйлидин нурғун ишханиларда адәм болмисму, әмма телифонимиз уланған бир киши өзиниң буниңдин хәвәрсиз икәнликини билдүрди.

Биз зиянкәшликкә учриған бу кишиниң ениқ салаһити вә вәқәниң тәпсилати тоғрисида техиму көп мәлуматқа игә болуш үчүн давамлиқ тиришиватимиз. " Улуқ ира гезити" ниң хәвиридә мәлум болишичә йәнә, -25 сентәбир күни чүштин кейин, хитайниң лиявниң, җияңши вә хубей қатарлиқ җайлиридин кәлгән 30 нәччә әрздар, мәркәзниң юқири дәриҗилик әмәлдарлири олтуридиған " җоңнәнхәй" қоруси алдида намайиш өткүзүш җәрянида, бу йәрдики поста турғучи сақчилар билән тоқунушуп қалған. Һәмдә сақчилар бу кишиләрни дәрһал қолға елип сақчи машинилириға селип елип кәткән. (Пәридә )

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.