Teywen b d t gha teywen boghuzining bixeterliki toghrisida qarar layihisi sundi

Teywen tashqi ishlar ministiri chéng tangshen, seyshenbe küni teywenning birleshken döletler teshkilati qurulghanliqining 60 yilliqi munasiwiti bilen, birleshken döletler teshkilatigha teywenning tinchliqi heqqide qarar layihisi sunidighanliqini bildürdi. Buningdin sirt, teywen terep yene, teywen'ge dostane döletlerning, prézidént chén shuybyenning pat arida koriyide ötküzülidighan sherqiy jenubi asiya döletliri ittipaqigha eza döletlerning yighinigha qatnishishni qolgha keltürüsh üchün yardem körsitishini ümid qilidighanliqini bildürdi.

Xelq'araning diqqitini qolgha keltürüsh

Yéqinqi yillardin buyan, teywen birleshken döletler teshkilatigha eza bolush hoquqini qolgha keltürüsh üchün tirishchanliq körsetken bolsimu, emma izchil türde bu arzusini emelge ashuralmay kelgen idi.

Bu munasiwet bilen, teywen tashqi ishlar ministiri chéng tangshen " birleshken döletler teshkilati qurulghanliqining 60 yilliqi biz üchün nahayiti yaxshi bir purset, chünki birleshken döletler teshkilatining qurulushidiki asasliq nishanmu, dunyaning tinchliqini saqlashtin ibaret. Shunga teywen pursettin paydilinip, teywenning tinchliqi heqqidiki qarar layihisini birleshken döletler teshkilatigha sunushni layiq kördi" dep tekitlidi.

Chéng tangshen bu heqte toxtilip mundaq deydu:

" Bizning ümid qilidighinimiz, teywenning nöwettiki weziyitini köpchilik yaxshi chüshineleydighan derijide yézip chiqip, bu matériyalni birleshken döletler teshkilatining munasiwetlik orginigha yollap, köpchilikning bu mesilige köngül bölüshini qolgha keltürüshtin ibaret, hemde yene, bu arqiliq junggo terepke köpchilikning teywen mesilisige alahide köngül bölüwatqanliqini anglitish shuningdek pütün dunyaning diqqitini jelp qilishni meqsed qilidu".

Tinchliq asasiy nishan qilghan

Chéng tangshen sözide yene mundaq deydu: " junggo, bölgünchilikke qarshi qanundin paydilinip, zörür tépilghanda teywen'ge qarita qoral ishlitishni qanunlashturmaqchi. Bu ochuq - ashkara teywen'ge qarita qoral tehditi ishletkenliktin ibaret. Junggo 700 dane bashqurulidighan bombini teywen'ge qaritip tikligendin sirt, teywenge qaritilghan bashqurulidighan bomba sanini her yili 100 danidin ashuriwatidu. Démek teywen boghuzi toqunush yüz bérish éhtimalliqiqa nahayiti yéqin".

Chéng tangshenning qarishiche, teywen terepning, teywen boghuzining tinchliqi heqqidiki doklati " tinchliq" ni nishan qilghan bolup, bu éghir bésiq we sewirchanliq bilen otturigha qoyulghan ötünüshtin ibaret iken, eger bu qarar layihisi, birleshken döletler teshkilatida muzakire qilinishqa érishelise, urush xetirining meydan'gha kélishidin saqlan'ghili bolidiken. Shunga uning perez qilishiche, mezkur qarar layihisi choqum qobul qilinidiken.

Chén shuybyenning mezkur yighin'gha qatnishishigha türtkilik qilish

Bu yil sherqiy jenubi asiya döletliri ittipaqigha eza döletlerning yighini koriyidiki busan shehiride ötküzilidiken. Chéng tangshenning ashkarilishiche, teywen busan shehiride ish béjirish merkizi qurghan bolup, bu teywenning tashqi diplomatiyidiki bir netijisi hésablinidiken. Uning éytishiche, sherqiy jenubiy asiya döletliri ittipaqigha eza döletlerning alahide wekili pat arida ötküzülmekchi bolghan yighin teklipnamisini öz qoli bilen prézidént chén shuybyen'ge bergende, chén shuybyen neq meydanda, yighin'gha choqum qatnishishni ümid qilidighanliqini, dunya rehberliri bilen, bolupmu junggo rehberliri bilen uchrishishni arzu qilidighanliqini bildürgen iken.

Chéng tangshen axirida, bu qétim sherqiy jenubi asiya döletliri ittipaqigha eza döletlerning yighin sahipxanliqini öteydighan koriye we teywen'ge dostane döletlerdin, chén shuybyenning mezkur yighin'gha qatnishishi üchün küch chiqirishni alahide telep qilghan. (Eqide)