Пакистан- афғанистан чегра районида йүз бәргән тоқунушта 160 адәм өлди

Мушу һәптә ичидә пакистан- афғанистан чегра районида пакистан қәбилилири билән райондики чәтәллик милитантлар оттурисида йүз бәргән тоқунушларда 160 киши өлгән болуп, өлгәнләрниң 130 и районда паалийәт елип бериватқан өзбек вә чечән җәңчилири икән.

Пакистанниң ғәрбий шимал чегра өлкисиниң рәиси әли муһәммәтҗан аврәкзәй пишавәр шәһиридә мухбирларға бәргән баянатида, дүшәнбә күни шималий вәзиристан районидики қәбилиләр билән бу районда паалийәт елип бериватқан чәтәллик милитантлар оттурсида башланған тоқунушларда һазирғичә, 130 чәтәллик милитант вә 25, 30 қәбилә әзасиниң өлгәнликини билдүрди.

Униң ейтишичә, тоқунушларда 63 чәтәллик милитант әсир чүшкән болуп, райондики қәбилә җәңчилири әтраптики тағларда йошурунған 200 гә йеқин чәтәллик милитантни тутуш үчүн кәң көләмлик һәрикәт елип бармақта.

Көп тәрәплимә күч топлашқан район

Ғәрбий шимал чегра өлкисиниң рәисиниң билдүрүшичә, бу тоқунушлар, пакистан мәркизи һөкүмитиниң райондики әлқаидә тәшкилати билән читишлиқи бар чәтәллик милитантларни тазилаш үчүн пакистан- афғанистан чегра районидики қәбилиләрдин пайдилиниш сияситиниң ғәлибиси һесаблинидикән.

Әмма сиясий анализчилар, бу вәқә районниң һөкүмәт даирилириниң контроллуқида әмәсликини ашкарилиди, дейишмәктә. Көпчиликкә мәлум болғандәк, нурғун кишиләр талибанларниң афғанистанда елип бериватқан һәрбий паалийәтлиридә мәзкур райондин пайдилиниватқанлиқини баян қилмақта.

Америка бирләшмә агентлиқиниң хәвәр қилишичә, чәтәллик милитантлар вә пакистан қәбилә җәңчилири тоқунушларда өлгәнләрни дәпн қилиш үчүн қисқа бир муддәт үчүн урушни тохтитишни қобул қилған. Әмма райондики қәбилиләр рәһбәрлириниң урушни тохтитиш үчүн елип барған паалийәтлири нәтиҗә бәрмигән.

Көпчиликкә мәлум болғандәк, америкиниң афғанистанға қарита елип барған һәрбий һәрикити нәтиҗисидә афғанистандики талибанлар һакимийити гумран болғандин кейин, йүзлигән оттура асиялиқ вә әрәб милитантлар пакистан - афғанситан чегра районида панаһлинип, йәрлик қәбилиләр билән иттипақ қурған иди. Хәвәрләр гә қариғанда, оттура асиялиқ милитантлар пакистан ‏- афғанистан чегра районидики қәбилиләр билән келишим имзалиғандин кейин, өзбекистанда ислам кәримоф һакимийитигә қарши болған нурғунлиған өзбек исламчилири өзбекистандин келип, районға орунлашқан.

Пакистан ғәрбий шимал чегра өлкисиниң рәиси аврәкзәй, җәнубий вәзиристан районида чәтәллик милитантлар билән йәрлик қәбилиләр оттурисида тоқунушлар башланғанда, өзбекистан исламий һәрикитиниң рәһбири таһир йолдашниң районда икәнликини, әмма униң өлгән яки яриланғанлиқи һәққидә мәлумат берәлмәйдиғанлиқини билдүрди.

Пакистан һөкүмити билән қәбилә ақсақаллири оттурисидики келишим

Хәлқара террорчилиққа қарши елип бериливатқан урушта америкиниң йеқин иттипақдиши һесабланған пакистан, чәтәллик миллитантларни райондин қоғлап чиқириш үчүн, 2004‏- йили афғанистан- пакистан чегрисида кәң көләмлик һәрбий һәрикәт елип барған. Гәрчә бу һәрбий һәрикәт җәрянида әлқаидә тәшкилатиға қаттиқ зәрбә берилгән болсиму, әмма нурғун кишиләр өлгән һәмдә пакистан һөкүмити чәтәллик милитантларни райондин қоғлап чиқириш мәқсдигә йетәлмигән иди.

Шуниң үчүн пакистан һөкүмити, пакистан- афғанистан чегра районидики қәбилиләр билән тинчлиқ келишими имзалиған. Бу келишимгә асасән пакистан районда елип бериватқан һәрбий һәрикитини тохтитишни қобул қилған. Райондики қәбилиләр болса, чәтәллик милитантларниң районда паалийәт елип беришиға рухсәт қилмайдиғанлиқини вәдә қилған иди.

Хәвәрләргә қариғанда, дүшәнбә күнидики тоқунуш йәрлик қәбилиләрниң өзбек милитантларниң райондики паалийәтлиригә қарши чиқиши сәвәбидин келип чиққан икән. (Қанат)