Pakistan- afghanistan chégra rayonida yüz bergen toqunushta 160 adem öldi

2007-03-23
Élxet
Pikir
Share
Print

Mushu hepte ichide pakistan- afghanistan chégra rayonida pakistan qebililiri bilen rayondiki chet'ellik militantlar otturisida yüz bergen toqunushlarda 160 kishi ölgen bolup, ölgenlerning 130 i rayonda pa'aliyet élip bériwatqan özbék we chéchen jengchiliri iken.

Pakistanning gherbiy shimal chégra ölkisining re'isi eli muhemmetjan awrekzey pishawer shehiride muxbirlargha bergen bayanatida, düshenbe küni shimaliy weziristan rayonidiki qebililer bilen bu rayonda pa'aliyet élip bériwatqan chet'ellik militantlar ottursida bashlan'ghan toqunushlarda hazirghiche, 130 chet'ellik militant we 25, 30 qebile ezasining ölgenlikini bildürdi.

Uning éytishiche, toqunushlarda 63 chet'ellik militant esir chüshken bolup, rayondiki qebile jengchiliri etraptiki taghlarda yoshurun'ghan 200 ge yéqin chet'ellik militantni tutush üchün keng kölemlik heriket élip barmaqta.

Köp tereplime küch toplashqan rayon

Gherbiy shimal chégra ölkisining re'isining bildürüshiche, bu toqunushlar, pakistan merkizi hökümitining rayondiki elqa'ide teshkilati bilen chitishliqi bar chet'ellik militantlarni tazilash üchün pakistan- afghanistan chégra rayonidiki qebililerdin paydilinish siyasitining ghelibisi hésablinidiken.

Emma siyasiy analizchilar, bu weqe rayonning hökümet da'irilirining kontrolluqida emeslikini ashkarilidi, déyishmekte. Köpchilikke melum bolghandek, nurghun kishiler talibanlarning afghanistanda élip bériwatqan herbiy pa'aliyetliride mezkur rayondin paydiliniwatqanliqini bayan qilmaqta.

Amérika birleshme agéntliqining xewer qilishiche, chet'ellik militantlar we pakistan qebile jengchiliri toqunushlarda ölgenlerni depn qilish üchün qisqa bir muddet üchün urushni toxtitishni qobul qilghan. Emma rayondiki qebililer rehberlirining urushni toxtitish üchün élip barghan pa'aliyetliri netije bermigen.

Köpchilikke melum bolghandek, amérikining afghanistan'gha qarita élip barghan herbiy herikiti netijiside afghanistandiki talibanlar hakimiyiti gumran bolghandin kéyin, yüzligen ottura asiyaliq we ereb militantlar pakistan - afghansitan chégra rayonida panahlinip, yerlik qebililer bilen ittipaq qurghan idi. Xewerler ge qarighanda, ottura asiyaliq militantlar pakistan ‏- afghanistan chégra rayonidiki qebililer bilen kélishim imzalighandin kéyin, özbékistanda islam kerimof hakimiyitige qarshi bolghan nurghunlighan özbék islamchiliri özbékistandin kélip, rayon'gha orunlashqan.

Pakistan gherbiy shimal chégra ölkisining re'isi awrekzey, jenubiy weziristan rayonida chet'ellik militantlar bilen yerlik qebililer otturisida toqunushlar bashlan'ghanda, özbékistan islamiy herikitining rehbiri tahir yoldashning rayonda ikenlikini, emma uning ölgen yaki yarilan'ghanliqi heqqide melumat bérelmeydighanliqini bildürdi.

Pakistan hökümiti bilen qebile aqsaqalliri otturisidiki kélishim

Xelq'ara térrorchiliqqa qarshi élip bériliwatqan urushta amérikining yéqin ittipaqdishi hésablan'ghan pakistan, chet'ellik millitantlarni rayondin qoghlap chiqirish üchün, 2004‏- yili afghanistan- pakistan chégrisida keng kölemlik herbiy heriket élip barghan. Gerche bu herbiy heriket jeryanida elqa'ide teshkilatigha qattiq zerbe bérilgen bolsimu, emma nurghun kishiler ölgen hemde pakistan hökümiti chet'ellik militantlarni rayondin qoghlap chiqirish meqsdige yételmigen idi.

Shuning üchün pakistan hökümiti, pakistan- afghanistan chégra rayonidiki qebililer bilen tinchliq kélishimi imzalighan. Bu kélishimge asasen pakistan rayonda élip bériwatqan herbiy herikitini toxtitishni qobul qilghan. Rayondiki qebililer bolsa, chet'ellik militantlarning rayonda pa'aliyet élip bérishigha ruxset qilmaydighanliqini wede qilghan idi.

Xewerlerge qarighanda, düshenbe künidiki toqunush yerlik qebililerning özbék militantlarning rayondiki pa'aliyetlirige qarshi chiqishi sewebidin kélip chiqqan iken. (Qanat)

Pikirler (0)
Share
Toluq bet