Pakistan talibanliri osama bin ladén üchün öch élish herikitini bashlidi

Pakistanda bügün keyni-keynidin ikki qétim chong partlitish weqesi yüz berdi. Weqede bigunah xelqtin 80 adem öldi, 120 din artuq adem yarilandi. Nyu-york pochtisi gézitining bayan qilishiche, pakistanda bügün partlash weqesi yüz bergen shapqadar sheherchisi, amérika alahide qisimliri osama bin ladénni étip öltürgen abbotabad mehellisidin 200 kilométir yiraqliqtiki bir sheherche. Bu sheherche pakistanning shimalidiki muhim chong sheherlerning biri bolghan pishawar shehirige yéqin.

 Birleshme agéntliqining bayan qilishiche, bu weqelerdin kéyin, pakistan talibanlirining bayanatchisi ehsanulla éhsan, bu, amérika osama bin ladénni pakistan'gha kirip öltürgen weqedin öch élish üchün élip bérilghan tunji qétimliq partlitish bolup hésablinidu, dep jakarlidi.

B b s ning bayan qilishiche, bügün pakistanning shimalidiki muhim medeniyet merkezlirining biri bolghan pishawar shehirige yéqin bir sheherchide yüz bergen bu partlitish weqesi, yillardin buyan pakistanda yüz bergen özini öltürüwélish xaraktérlik partlitishlarning ichide eng köp adem ölgen weqe bolup hésablinidu.

Hindistan téz xewer gézitining bayan qilishiche, buningdin üch kün burun, yeni 5‏-ayning 10-künidimu, pakistanning qayber paqtunqawa wilayitining nowshira shehiride aptomobil partlash weqesi yüz bérip, weqede 3 saqchi ölgen (buning biri ayal saqchi), yene ikki saqchi yarilan'ghan idi. Weqe yüz bergen bu jaymu pishawar shehiridin 40 kilométir yiraqliqta.

Pakistan piti xewerliride bayan qilinishiche, 5‏-ayning 2‏-künidimu, keshmérning jambul shehiridiki udxampur rayonida ikki qétim aptomobil partlash weqesi yüz bergen idi. Buni leshkeriy ta'ibe yiraqtin kontrol qilish téxnikisini qollinip partlatqan.

En'gliyide chiqidighan közetküchi géziti, amérikida chiqidighan bügünki amérika géziti qatarliq uchur wasitiliri bügün, pakistan talibanlirining osama bin ladén üchün intiqam alimiz dégen bahane bilen, amérika we pakistan hökümetlirige qarshi heriket qozghap, yene qolida qoral yoq bigunah xelqni qirishqa bashlighanliqini tenqidlep maqaliler élan qildi.

Afghanistanda bolsa ehwal bashqiche, amérika awazining bayan qilishiche, bügün afghanistan parlaméntida, sirtning tesiri bolmighan halda öz teqdirini özi belgilesh we talibanlar bilen muresse qilish dégen bir chong pilan muzakire qilinishqa bashlidi.

Xewerde bayan qilinishiche yene, hindistan bash ministiri manmoxan afghanistan parlaméntida qilghan sözide, afghanistanning sirtning tesiri bolmighan halda öz teqdirini özi belgilesh we talibanlar bilen muresse qilish pilanini qizghin qollaydighanliqini, shundaqla, afghanistanni qaytidin qurush üchün 5 yüz milyon amérika dolliri yardem béridighanliqini jakarlidi we bu yardemni tedrijiy halda 15 milyard amérika dollirigha yetküzüshke wede berdi.