2007 - Йил 5 - айниң 31 - күни дуняниң тамакидин хали күни
2007.05.31

Бирләшкән дөләтләр тәшкилатиниң тәшәббуси буйичә, бүгүн 2007 - йил 5 - айниң 31 - күни дуняниң тамакидин хали күни. Мушу күндә, дуня сәһийә тәшкилати пүтүн дунядики һәммә дөләтни ашхана, қавақ, сода сарийи қатарлиқларни өз ичигә алған имарәт ичидики аммивий сорунлар вә иш орунлирида тамака чекишни чәкләшкә чақирди.
Шу мунасивәт билән, хәлқарадики һәр қайси учур вастилири пүтүн дуня хәлқигә тамака вә зәһәрлик чекимлик һәққидики мәнпәәтлик учурларни тәқдим қилди. Бу учурлар ичидә, бирләшкән дөләтләр тәшкилатиниң зәһәрлик чекимлик җинайәтлирини тәкшүрүш башқармиси дуняда зәһәрлик чекимлик мәһсулатлири ишләпчиридиған 'йеңи алтун үч бурҗәк' пәйда болди, дәп көрсәткәнлики вә һиндунезийидә мәхпий зәһәрлик чекимлик завути қурған җинайәтчиләрниң җазаланғанлиқи һәққидики учурлар алаһидә орунни игәлләйду.
Тамака чәкләшниң илмий асаслирини рәт қилип болмайду
Тамака чәкләшниң илмий асаслирини рәт қилип болмайду. Дуня сәһийә тәшкилати елан қилған материялларда баян қилинишичә, тамака исиниң тәркибидә 4 миң хилдин артуқ хемийилик мадда бар. Буниң 50 нәччә хили бивастә рак пәйда қилғучи мадда.
Адәттики әһвалда, узун муддәт тамака иси бар муһитта яшиған кишиләр асанла йүрәк, қан томур вә нәпәс йоллири кесәлликлиригә гириптар болиду.
Җәнвәдә елан қилинған статистика мәлуматлириға қариғанда, явропада һәр йили аз дегәндә 200 миң хизмәтчи чекилгән тамакиниң исида зәһәрлинип пәйда болған кесәлликләр билән өлүп кетиду.
Пүтүн дунядики тамака бәңгилириниң үчтән бир қисми хитайда

Хитай һөкүмити 2006 - йили елан қилған тамака вә саламәтлик һәққидики доклатта, хитайда һәр күни тәхминән 350 милйон адәм тамака чекидиғанлиқи; пүтүн дунядики тамака мәһсулатиниң үчтән бир қисми хитайда сетилидиғанлиқи; һәр күни 9 йүз милйон адәм тамака исиға дуч келидиғанлиқи; һәр йили тәхминән бир милйон адәмниң тамака исида зәһәрлинип гириптар болған кесәлликләр билән өлүп кетиватқанлиқи, уларниң % 80 и башқилар чәккән тамакиниң исида зәһәрләнгән кишиләр икәнлики; 1980 - йилларға селиштурғанда, хитайда һазирқи тамака бәңгилири 22 яшлиқлардин 19 яшлиқларғичә кеңәйгәнлики; һәтта 150 метир әтрапида бир тамака сатидиған дукан бар башланғуч мәктәпләр % 25 ни тәшкил қилидиғанлиқи қатарлиқлар баян қилинған иди.
Бирләшкән дөләтләр тәшкилати дуняда 'йеңи алтун үч бурҗәк' пәйда болғанлиқини көрсәтти
Бирләшкән дөләтләр тәшкилатиниң зәһәрлик чекимлик җинайәтлирини тәкшүрүш башқармиси, һазир дуняда зәһәрлик чекимлик мәһсулатлири ишләпчиридиған 'йеңи алтун үч бурҗәк' пәйда болғанлиқини көрсәтти. Бурун тайланд, берма чегрисидики мәлум бир район әпюн ишләпчиқирилидиған алтун үч бурҗәк' дәп атилатти.
Һазир афғанистанда ишләпчиқириливатқан әпюн мәһсулатлири пүтүн дунядики әпюн мәһсулатиниң % 90 пирсәнтини тәшкил қилиду. Афғанистанда қанунсиз ишләпчиқирилған әпюн мәһсулатлири пакистан, иран арқилиқ башқа дөләтләргә сетилидиған 'сода йоли' һазир дуня буйичә әң чоң зәһәрлик чекимлик әткәсчилик йоли болуп қалди.
Бирләшкән дөләтләр тәшкилати хадимлириниң баян қилинишичә, йеқинқи бир нәччә йил ичидә, чегрида зәһәрлик чекимлик әткәсчилири билән йүз бәргән қораллиқ тоқунушта һаятидин айрилған иран сақчилириниң санила 3500 гә йәткән.
Бүгүн һиндунезийидә мәхпий зәһәрлик чекимлик завути қурған бәш нәпәр хитай җинайәтчи өлүм җазасиға һөкүм қилинди

Бүгүн елан қилинған йәнә бир муһим хәвәр шуки, һиндунезийидә мәхпий зәһәрлик чекимлик завути қурған бәш нәпәр хитай җинайәтчи өлүм җазасиға һөкүм қилинған. Б б с ниң хәвәр қилишичә, бу мәхпий зәһәрлик чекимлик завутини қуруш үчүн мәбләғ салған бәш нәпәр хитайдин башқа йәнә, бу мәхпий завутни техника билән тәминлигән бир нәпәр франсийилик вә бир нәпәр голландийиликкиму өлүм җазаси һөкүм қилинған.
Һиндонезийә тәптиш хадимлириниң ейтишичә, бултур 11- айда җакарта шәһириниң ғәрби тәрипидә чарлаш елип берилғанда, бир ноқтидинла 100 килограм 'муз' дәп атилидиған хемийилик бирикмә әнфитамин' таблиткиси мусадирә қилинған. Канада сақчи органлириниң баян қилишичә, нәшшә һелиму дуняда қанунсиз зәһәрлик чекимликләрниң бир хили дәп һесаблансиму, әмма һазир әнфитамин таблиткиси вә 'гилдиңбаш кумуличи' дәп атилидиған естасй кумуличи' әткәсчилики техиму бәк әвҗ алған.
359 - Беригадиниң әпюн териш әнәниси
Бүгүн 'гугул тор бети' дин тепилған зәһәрлик чекимлик һәққидики учурларға қариғанда, хитай коммунист партийиси 1941 - йилидин 44 - йилиғичә йәнәндә әпюн терип зәһәрлик чекимлик тиҗарити билән шуғулланған.
Әйни вақитта әпюн териған асаси қошун ваң җен, ваң инмавларниң 359 - беригадиси. Мавзедуң бу хил тиҗарәтни инқилаби әпюн уруши' дәп атиған. "Ваң инмав хатирилири"дә, бу хил тиҗарәттин мәнпәәт көргән йәнән партийә мәктипидә турмуш яхшилинип, һәр вах тамақта бирнәччә хил гөшлүк көктат қорумиси вә шорпа, һәтта хилму-хил мевә тәйяр икәнлики алаһидә тәсвирләнгән. Бу қошун әпюн териш әнәнисини шинҗаңға елип барған. (Вәли)
Мунасивәтлик мақалилар
- 25 Нәпәр уйғур аял зәһәр йөткәш җәрянида бирақла тутулди
- Уйғур сиясий паалийәтчилири зәһәрлик чекимлик йөткигән уйғур аяллириниң мәсилисигә қандақ баһа бериду ?
- Уйғур деһқанлири зәһәрлик чекимлик мәсилиси һәққидә тохталди
- Уйғур деһқанлири арисида зәһәрлик чекимликкә берилгәнләр барғансери көпәймәктә
- Уйғур елидики зәһәрлик чекимлик чәккүчиләрниң көп қисми уйғурлар
- Хәлқара тамака чәкмәслик күни
- Ақ алвасти қойнидики уйғурниң нидаси
- Зәһәрлик чекимликни ташлаш мумкинму?
- Уйғур елидики зәһәрлик чекимликни ташлаш орунлиридики мәвҗут мәсилиләр
- Уйғур елидә зәһәрлик чекимлик ташлатқузуш орунлириниң давалаш һәққи зиядә юқири болмақта
- Чәтәлләрдики уйғур зиялийлири зәһәрлик чекимлик мәсилилири тоғрисидики қарашлирини оттуриға қойди
- Уйғурлар немә сәвәбтин зәһәрлик чекимлик әткәсчиликигә киришип қалди?