Gos: xitayning herbiy tereqqiyati amérikining asiyadiki menpe'etige tehdit

Amérika merkizi axbarat idarisi bashliqi portér gos (sol) dölet bixeterliki uchur yighinida. AFP

Amérika merkizi axbarat idarisi qatarliq organlardiki yuqiri derijilik emeldarlar, charshenbe küni amérika kéngesh palatasida amérika duch kéliwatqan bixeterlik mesililiri boyiche guwahliq bérip, xitayning amérika menpe'etige tehdit salidighanliqini bildürdi.

Merkizi axbarat idarisining bashliqi portér gos, xitayning herbiy jehettiki tereqqiyati teywen boghuzidiki küchler tengpungliqini özgertip, asiyadiki amérika qoshunlirigha tehdit salidighanliqini ilgiri sürdi. Portér gos, ötken yili 9 - ayda merkizi axbarat idarisining bashliqliqini üstige alghan. Bu merkizi axbarat idarisi bashliqining resmi sorunda tunji qétim " xitay tehdit nezirisiyisi" ni tilgha élishi bolup hésablinidu.

Teywen boghuzidiki herbiy küchler tengpungliqi buzulidu

Portér gos, kéngesh palatasining axbarat komitétidiki sözide " xitayning herbiy zamaniwilashturush tirishchanliqi shundaqla herbiy qisimlarning yighilishi, teywen boghuzidiki herbiy küchler tengpungliqining bir terepke éghishini keltürüp chiqirishi mümkin. Xitay herbiy küchining tereqqiyati rayondiki amérika qisimlirigha tehdit," dep agahlandurdi.

Portér gosning eskertishiche, xitaylar " özige bolghan ishenchisini kücheytip, qayturma zerbe bérish xaraktérlik yadro oq béshigha ige bashqurulidighan bombilar shundaqla rayon xaraktérlik toqunushlarda ishlitidighan muntizim küchini" tereqqiy qildurghan.

Xitaylar teywen'ge qoral ishlitishi mumkin

Teywen mesilisi, xitay - amérika munasiwitidiki eng nazuk mesililerning biri. Xitay chong quruqluqi teywen boghuzining qarshi qirghiqidiki rayonlargha 600 dane bashqurulidighan bomba orunlashturup, teywen musteqilliq jakarlisa qoralliq hujum qozghaydighanliqini agahlandurup keldi. Amérika 25 yil ilgiri teywen bilen diplomatik munaswi'itini üzgende "teywen munasiwet qanuni" ni maqullap, teywenni qoral - yaraq bilen teminleshni üstige alghan.

Gos mundaq mundaq deydu: " eger béyjing, teywenning bölünüsh yolidiki qedimi béyjingning sewr - taqet chékidin éship ketti dep qarighanda, xitaylar teywen'ge her xil derijidiki qoralliq küchlerni ishlitidu, dep qaraymiz."

Xitayning amérika ziminidiki nishanlargha zerbe bérish iqtidari küchiyidu

Amérika dölet mudapi'e axbarat idarisining bashliqi yakubiyning kéngesh palatasiki yighinda eskertishiche, xitaylar ötken yili teywen boghuzining qarshi qirghiqidiki bashqurulidighan bomba sanini köpeytip, bashqurulidighan bomba ishlepchiqirish we tetqiqatini kücheytken.

Yakubiy, xitayning bu bashqurulidighan bombilar bilen amérika we ittipadashlirining rayondiki herbiy eslihelirige zerbe bérleydighanliqini bildürdi. Yakubiyning ashkarilishiche, xitayning amérika ziminidiki nishanlargha zerbe béreleydighan uzun musapiliq balistik bashqurulidighan bombirilirining sani, 2015 - yilgha barghanda bir hesse köpiyidiken.

Xitay amérikining xelq'ara sehnidiki riqabetchisi

Amérika merkizi axbarat idarisining bashliqi portér gos, xitayning herbiy zamaniwilashturush qedimini tézlitish bilen birge, xelq'ara siyasi sehnide amérika bilen riqabetlishiwatqanliqini bildürdi. Portér gos mundaq deydu:

"Özige bolghan ishenchisi üzliksiz éship barghan xitaylar xelq'ara sehnidiki pa'aliyitini janlandurup, xelq'ara chong mesililerdiki söz qilish heqqini, teb'iy bayliqlargha érishishni kapaletke ige qilish shundaqla atalmish amérikining teqibi we qorshawigha qarshi turush üchün tirishmaqta."

Tenkridu: " teywen erkin, igilik hoquqluq musteqil dölet"

Amérika awam palatasidiki bezi ezalar charshenbe küni teywen bilen diplomatik munasiwetni eslige keltürüsh qanun teklip layihisini otturigha qoydi. Qanun teklip layihisi awam palata ezasi tenkrido teripidin otturigha qoyulghan. U, teywenni erkin, igilik hoquqluq musteqil dölet," dep körsetken.

Xitay tashqi ishlar ministirliqining bayanatchisi kong chü'en, qanun teklip lahiyisini " jonggoning ichki ishlirigha qopalliq bilen arilishish shundaqla teywendiki musteqilchi küchlerge xata signal bérish," dep tenqidligen.

Xitay hökümiti 2005 -yili duch kélidighan riqabetler

Portér gos, kéngesh palatasidiki sözide xitay hökümiti duch kélidighan mesililerni tilgha aldi. Gosning bildürüshiche, xu jintaw rehberlikidiki béyjing hökümiti 2005 - yili pul paxalliqi, éksportqa tayinishning éghirliqi, bay - kembegheller perqi shundaqla puqralarda kishilik hoquq qarishining küchiyishi qatarliq mesililerge duch kélidiken. (Erkin)