Amérika: xitayning herbiy tereqqiyatini asiya - tinch okyan rayonigha tehdit


2006-05-25
Share
2005-Yili 22-awghust küni xitay azadliq armiyisi qingdawda rusiye bilen herbiy manéwir ötküzmekte. AFP

Amérika dölet mudapi'e ministirliqi aldinqi küni élan qilghan xitay herbiy tereqqiyatining ehwali heqqidiki doklatida, junggoning herbiy qurulushini téz sür'et bilen kéngeytish, uzun musapiliq urush ayropilani we qoral - yaraqlarni köplep sétiwélish pilani junggoni amérika bilen riqabetlishish küchige ige qilip, asiya - tinch okyan rayonidiki döletlerge yoshurun tehdit élip kélishi mumkin, dep agahlandurdi.

Teywen muhim nishan qilin'ghan

Dölet mudapi'e ministirliqining doklatida eskertishiche, xitayning herbiy küchini zamaniwiylashturush kölimi we qedimi teywenni zerbe bérish nishanigha alghan bolup, junggo déngiz armiye küchining yérimidin köpreki teywen'ge qaritilghan we teywen boghuzining qarshi qirghiqigha 710 din 790 ghiche qisqa musapiliq balistik bashqurulidighan bomba orunlashturghan.

Dölet mudapi'e ministirliqining ötken yilqi doklatida, junggo teywen boghuzining qarshi qirghiqigha 650 tin 730 ghiche bashqurulidighan bomba orunlashturghanliqini yazghan idi. Doklatta, amérika dölet mudapi'e ministiri donald ramsféld ötken yilning axirliri béyjingni ziyaret qilghanda, xitayning yadro qorallar küchi we yadro qorallirining nishani toghrisida ashkara bolushni telep qilghanliqini tilgha aldi we xitay herbiy küchining ötkenki bir yil ichide her qaysi sahelerdiki tereqqiyati muhakime qilindi.

Xitayning herbiy xam choti élan qilin'ghandin köp yuqiri

Doklatta eskertishiche, xitay herbiy küchi bu bir yil ichide köp saheler boyiche dawamliq éship mangghan we dölet mudapi'e ministirliqi 2005 - yili 7 - ayda herbiy doklat élan qilghandin béri, xitay herbiy küchining közetküchilerni heyran qalduridighan éshish kölimi we tereqqiyat sür'itide chong özgirish bolmighan.

Amérika dölet mudapi'e ministirliqining xelq'ara bixeterlik ishliri boyiche yardemchi ministiri pétér rodman, junggoning herbiy sélinma we dölet mudapi'esini kücheytish pilani yolgha qoyuwatqanliqini bildürgen bolsimu, lékin u, "xitay herbiy xam chotining heqiqi sani toghrisida melumatimiz yéterlik emes, deydu.

Amérika dölet mudapi'e ministirliqidiki bezi emeldarlar, bu yilqi junggo herbiy xam chotining emeliyettiki sani béyjing hökümiti élan qilghan 35 milyard dollardin 2 - 3 hesse köp, dep perez qilishmaqta. Doklatta, xitayning bu yilqi herbiy xam chotini 70 milyard dollardin 105 milyard dollarghiche yétishi mumkin, dep perez qilghan.

Xitayning herbiy sélinmisi 1990 - yillardin béri her yili ikki xaniliq reqem boyiche köpiyip keldi. Besh burjeklik binaning doklatida körsitilishiche, junggo balistik bashqurulidighan bomba qisimlirini kücheytmekte. Bu türdiki bashqurulidighan bombilar teywen we bu rayundiki nishanlargha zerbe béreleydu. Shuning bilen birge xitay ilghar tiptiki, iqtidari küchlük qorallarni ayrupilan we urush paraxotlirini sétiwélish, tetqiqat élip bérish we alaqidar döletlerning alaqe séstimisi, intérnét we eslihelirige kashila qilish iqtidarini kücheytiwatidu.

Xitayning inkasi

Rodmanning eskertishiche, junggo etrapidiki döletlerning sirtidiki rayonlarda urush qilalaydighan iqtidargha ige bolush üchün "herbi küchini desleptila teywenning sirtidiki rayonlarda yüz béridighan herbiy toqunush weqelirige köre teyyarlimaqta ". Lékin xitay hökümitining qarishiche, amérika terepning doklati "soghaq munasiwetler dewridiki pikir qilish usulining mehsuli" shundaqla bu junggoning herbiy xam chotini ashurup körsitip, "junggo tehdit neziriyisi" ni tarqitishni meqset qilghan , durus niyetlik doklat emes. Peyshenbe künki bayanatida "junggo tinchliqni söyidighan we tinch tereqqiyat yolida ching turidighan dölet "dep tekitligen xitay tashqi ishlar ministirliqi bayanatchisi lyu jyenchaw, junggo dölet bixeterliki we zémin pütünlikini qoghdash üchün dölet mudapi'e qurulushi élip bérish hoquqigha ige " dep körsetti.

Lékin amérika dölet mudapi'e ministirliqi, xitay herbiy küchini dölet bixeterliki üchün éhtiyaj bolghan sewiyidin halqip ketti, dep qarimaqta. Doklatta, junggo istratégiyilik küchlirining zamaniwiylishish " sür'iti we kölimi " amérika herbiy közetküchilirini heyran qaldurghanliqini yazdi.

Xitay wediside turmasliqi mumkin

Amérika dölet mudapi'e yardemchi ministiri rodmanning eskertishiche, junggo hazirghiche yadro qorallirini aldi bilen ishletmeslik prinsipidin waz kechmigen bolsimu, lékin amérikining diqqet qiliwatqini junggo qudret tapqanda we herbiy küchler tengpungluqida özgirish bolghanda béyjingning bu wedisidin waz kéchish mumkinchiliki mewjut ikenlikidur. U, xitay emeldarlirining junggo mudapi'e prinsipi we yadro qorallirini aldi bilen ishletmeslik wedisini özgertish toghrisida muzakire élip barghanliqini diqqet qilishqa tégishlik yüzlinish, dep körsetmekte.

Rodmanning eskertishiche, " junggo herbiy küchini sewrichanliq bilen, séstimiliq türde, éhtiyatchanliq bilen omumyüzlik tereqqi qildurush yolida uzun - muddetlik istratégiyini yolgha qoyuwatidun". Amérika junggoning néme qiliwatqanliqini yéqindin teqip qilishni dawamlashturushi kérek, dep tekitligen rodman, " eger biz buninggha diqqet qilmisaq herbiy küchlerning tengpungluqida özgirish yüz bérishi mumkin " deydu. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet