Korlidiki iqtisadiy tereqqiyat rayoni peqet xitaylarghila échiwétilgenmu?

Uyghur élide chiqidighan shinjang gézitining 19-aprél sani, xitay hökümitining korlida qurghan iqtisadiy téxnika tereqqiyat rayonining memliket derijilik échiwétilgen rayon derijisige kötürülgenlikini élan qildi.
Muxbirimiz gülchéhre
2011.04.19
korla-iqtisadiy-terqqiyat-rayoni-305.jpg Korla iqtisadiy tereqqiyat rayonining kechlik körünüshi.
Baidu.com

Korlidiki mezkur échiwétilgen tereqqiyat rayoni qurulghinigha 11 yil bolghan bolup, hazirghiche bu rayon'gha 421 xitay karxana we shirketliri köchüp kelgen. Korlidiki Uyghurlarning inkasigha qarighanda, mezkur tereqqiyat rayoni héchqandaq bir Uyghurni yaki Uyghurlarning shirketlirini qobul qilmighandin bashqa, bu rayonning kéngeytilishige egiship korla sheher ichidiki Uyghur ahaliliri barghanche yézilargha köchüp tarqaqlishishqa mejbur bolmaqta.

2000-Yili 7-aydin bashlap korla shehirining sherqiy jenubida égiz imaretlik, yéngi asfalt yolluq, muhiti güzel, éléktrleshken we sana'etleshken bir yéngi sheherche qopuruldi.

U bolsimu Uyghur aptonom rayoni hökümitining pilani boyiche qurulghan korla iqtisadiy téxnika tereqqiyat rayonidur. 18-Aprél küni bu tereqqiyat rayoni ölke derijilik échiwétilgen rayondin dölet derijilik échiwétilgen rayon derijisige kötürüldi.

Bayn'ghulin mongghul aptonom oblastining hökümet toridiki arxiplardin ashkarilinishiche, korla iqtisadiy téxnika tereqqiyat rayoni korla sheher merkizige 8 kilométir, korla ayrodromigha 6 kilométir, poyiz istansisigha besh kilométir kélidu. Bu iqtisadiy tereqqiyat rayoni 6 yuqiri sür'etlik tash yol, ikki ayrodrom we poyiz istansisigha ulinidu. Igiligen da'iriside tarim deryasi, könchi deryasi we baghrash köli qatarliqlarmu bar, mezkur tereqqiyat rayoni korla shehirining süyi elwek, yéri munbet qatnishi qulayliq ornigha qopurulghan bolup, mexsus xitay ölkiliridin shinjanggha kélip yerlishidighan xitay shirket we karxanilirining meblegh sélishi üchün échiwétilgen, hazirgha qeder bu tereqqiyat rayonigha köchüp xitay ölkiliridin köchüp kirgen tülük sana'et, iqtisadiy we kespiy shirket hem karxanilarning sani 421 ge yetken.

Bayn'ghulin mongghul aptonom oblasti da'iriliri merkizi sheher korligha qopurulghan bu tereqqiyat rayonini 2030-yiligha qeder korlidiki yene bir yéngi merkez qilip qurup chiqishni pilan qilghan bolup, birinchi basquchtiki échiwétish da'irisi 80kwadrat kilométir, ikkinchi basquchtiki échiwétish da'irisi 60kwadrat kilométir bolup jem'iy 140 kwadrat kilométir da'ire mezkur istratégiyilik pilan'gha kirgüzülgen. Nöwette mezkur tereqqiyat rayonni ikkinchi basquchtiki échiwétish tereqqiy qildurush basquchida iken. 2008-Yili bu iqtisadiy tereqqiyat rayonning asasiy mu'essesiler qurulushigha sélin'ghan meblegh 110 milyon yüen'ge yetken. Emma xitay hökümitining korlida bu zor kölemlik iqtisadiy tereqqiyat rayonini qurushqa omumiy qanchilik meblegh ajratqanliqi melum emes.

2005-Yilidiki statistika korlidiki bu tereqqiyat rayonida 111 türge meblegh sélin'ghanliqi, asasliq nopusining 12 minggha yetkenliki buning ichide köchme nopusning 2100 ikenliki bildürülgen.

Nöwette, bu könchi derya boyidiki ghayet zor tereqqiyat rayonining meblegh sélish, sana'et, qatnash,sehiye, turalghu,ma'arip, radi'o-téléwiziye, asasliq mu'essesiler qurulushi, köngül échish, muhit asrash türliri boyiche, bu jayda meblegh salghuchi hem yashighuchi köchmenlerge yuqiri pen-téxnikiliq, sistémiliq hem mukemmel shara'it hazirlan'ghan bolup hetta tereqqiyat rayoni öz aldigha hökümet memurigha ige iken.

Mezkur rayonning hazirqi tereqqiyat ehwali we buning yerlik Uyghurlargha élip kéliwatqan tesirliri heqqide melumat élish üchün korlidiki Uyghurlarni téléfon arqiliq ziyaret qilduq.

Bir korla sheher ichide tughulup ösken bir Uyghur yash ziyaritimizni qobul qilip, korla shehiride bash kötürgen bu yéngi tereqqiyat rayonida Uyghur yoqluqini shundaqla atalmish tereqqiyatlarning xitay köchmenlirige boluwatqan bolsa, eksiche, yerlik Uyghurlargha öyliridin köchürülüshke oxshash eksi tesirlerni élip kéliwatqanliqini bayan qildi.

Korlida igilik tikligen milliy karxanilardin melum birining yash diréktori, Uyghurlarning shirket karxanilirighimu bu iqtisadiy tereqqiyat rayonidin orun yoqluqini, emma xitay shirketliri bolsa hökümetning türlük étibar bérish siyasetliri bilen teklip qiliniwatqanliqini bildürdi.

18-Apréldin bashlap korlidiki bu Uyghursiz iqtisadiy tereqqiyat rayoni Uyghur élining jenubida bash kötürgen birdin -bir dölet derijilik échiwétilgen rayon'gha aylandi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.