Mutexessisler: Uyghurlar héchqachan térrorluq heriketliri bilen shughullan'ghan emes

• Muxbirimiz eqidening bu heqtiki toluq melumati
• Download story audio

11 ‏- Séntebir térrorluq weqesidin kéyin, Uyghur élide sherqiy türkistan musteqilliq küchlirining térrorluq heriketlirini qanat yaydurghanliqini jakarlighan xitay hökümiti, emdi chet'ellik sodigerlerni bu rayon'gha meblegh sélishqa qiziqturush üchün, Uyghur élide térrorchiliq heriketlirining mewjut emeslikini ispatlashqa tirishmaqta.

Xitayning Uyghur aptonum rayon'gha bash qilip békitken partkom sékrétari wang léchüen 2 ‏- séntebir küni ürümchide muxbirlargha bergen bayanatida "shinjang térrorluq weqeliri yüz bérip turidighan jay emes, shinjang hazir tarixtiki eng yaxshi dewrni yashawatidu" dégen.

Uyghurlarning milli musteqilliq heriktini térrorluq herikiti dep eyibligen xitay hökümiti, xelq'ara térrorchiliq urushidin paydilinip, Uyghurlarni, xelq'ara térrorluq heriketliri hemde osamabin ladin bilen alaqisi bar qilip körsitishke tirishqan idi. Biraq gherblik mutexessisler we siyasiy mulahizichiler, xitayning, Uyghur élidiki térrorluq mesilisini 11 ‏- séntebir weqesidin kéyin, tosattin otturigha kötürüp chiqqanliqini bildürmekte.

Bu heqte metbu'atlarda öz qarashlirini otturigha qoyghan, ataqliq amérikiliq Uyghur mutexessisi dru gladni ependi, Uyghurlarning xelq'ara térrorluq heriketliri bilen alaqisi barliqini ispatlaydighan héchqandaq delil ispatning mewjut emeslikini éytti.

Xelq'ara kishilik hoquqni küzitish teshkilatining xongkongdiki tetqiqatchisi nikolas bikolinmu, xitay hökümitining térrorluq heriketlerge zerbe bérish hujumidin paydilinip, Uyghurlarni basturiwatqanliqini, xitayning nöwette Uyghurlar üstide yürgüzüwatqan bésimining nahayiti éghir ikenlikini otturigha qoyup, hökümetning siyasitini tenqid qilghan herqandaq bir Uyghurning térrorchi yaki bölgünchi dep qarilidighanliqini tekitlidi.

Undaqta Uyghur aptonum rayon'gha igidarchiliq qiliwatqan wang léchüenning qarishida tuyuqsiz bir özgürüsh meydan'gha kélip, "shinjang térrorluq weqeliri yüz bérip turidighan jay emes" deydu.

Bu heqte amérikining meshhur mektepliridin biri bolghan sirakus uniwérsitétining xelq'ara munasiwetler sahesi boyiche dokturluqta oquwatqan qilich qanat ependi we dunya Uyghur qurultiyining mu'awin re'isi, kanada Uyghur jem'iyitining re'isi memet toxti ependi ziyaritimizni qobul qilip, qarashlirini otturigha qoydi.