Хәлқара мәтбуатниң памир игизликидики вәқә тоғрисидики инкаслири(1)


2007-01-11
Share

Хитай һөкүмити 8‏- декабир күни памир игизликидә аталмиш шәрқий түркистан террорчилириниң лагириға һуҗум қилип, 18 террор гумандарини өлтүрүп 17 кишини тирик қолға чүшүргәнликини елан қилди. Лекин вәқәниң қандақ вә қайси җайда йүз бәргәнлики, өлгәнләр вә тирик қолға чүшкәнләрниң кимлики һәққидә һазирғичә ениқ мәлумат бәрмигәнлики, хәлқара мәтбуатниң хитай һөкүмитиниң вәқә һәққидики учурлириға гуман билән қаришиға һәмдә вәқәниң йүз бериш шәкли, хитай һөкүмитиниң бундақ бир вәқә йүз бәргәнликини дуняға елан қилиштики асаслиқ мәқсиди һәққидә мәтбуатда түрлүк суалларниң пәйда болушиға вә мулаһизиләрниң йүргүзүлүшигә сәвәб болмақта.

Хитайниң мәқсити мәқсәтлирини әмәлгә ашуруш

Атақлиқ бир тәтқиқат мәркизи болған стратфорд тәтқиқат мәркизи тәрипидин памир игизликидә йүз бәргән вәқә һәққидә елан қилинған бир мулаһизидә, хитай һөкүмитиниң бундақ бир вәқәниң йүз бәргәнликини дуняға җакарлаш һәмдә вәқәдә өлгәнлики илгири сүрүлгән хитай сақчиси үчүн өткүзүлгән тәнтәнилик дәпнә мурасимини мәтбуат вә ахбарат васитилирида кәң тәшвиқ қилиш арқилиқ һәм дөләт ичидә һәмдә хәлқара сәһнидә бәзи мәқсәтләргә йәтмәкчи болғанлиқи тәкитләнгән.

Хитай һөкүмитиниң аталмиш шәрқий түркистан террорчилириниң вәқә йүз бәргән җайда бир көмүр канниму ишләткәнлики тоғрисидики хәвиригә алаһидә диққәт тартилған мулаһизидә, көмүр кан ишлитиш бир террорлуқ һәрикити әмәс, кан ишлитиш үчүн партлатқуч дориси сақлаш җинайәт һесабланмайду, дейилгән.

Вәқәниң елан қилинишиниң, хитай һөкүмитиниң уйғурларниң миллий рәһбири рабийә қадир ханиминиң нобил тинчлиқ мукапатиға намзат көрситилгәнликигә болған наразилиқи давамлишиватқан бир вақитқа тоғра кәлгәнликигә алаһидә диққәт тартилған мулаһизидә мундақ дейилгән: хитай һөкүмити бундақ бир вәқәдин пәқәт рабийә қадирниң нобел тинчлиқ мукапатиға еришишиниң алдини елиш үчүнла әмәс, бәлки өзиниң америкиға бир тәһдит әмәс, террорға қарши урушта америкиниң иттипақдиши икәнликини көрстиш үчүнму пайдилиниши мумкин.

Хитай даирилири терроризимни суйиистемал қилмақта

Мулаһизидә, хитай һөкүмити аталмиш шәрқий түркистан исламий һәрикити террорчилириниң, оттура асияниң йоли үстидики пакистан-афғанистан чегрисиға йеқин бир җайда һәрбий база қурғанлиқини кәң тәшвиқ қилиш арқилиқ хитайдики миллий иттипақлиқни күчәйтиш вә хәлқиниң диққитини күнсери җиддийлишиватқан иқтисадий қийинчилиқлар вә наразилиқлардин башқа бир мәсилигә бурашни мәқсәт қилған болуши мумкин, дейилгән.

Германийә хәвәр агентлиқиниң мухбири андрияс ландвәр тәрипидин памир игизликидә йүз бәргән вәқә тоғрисида елан қилинған мақалидә, америкилиқ хитай мутәхәссиси, профессор дру гладниниң, хитай һөкүмитиниң уйғур тәшкилатлири һәққидики әйибләшлирини рәт қилип, хитай һөкүмити уйғур тәшкилатлириниң хәлқара террорлуқ тәшкилатлири билән мунасивити барлиқи тоғрисида һазирғичә һечқандақ бир пакит оттуриға қоялмиди, дегәнлики тәкитләнгән.

Мақалидә ейтилишичә, б д т вә америкиниң хитай һөкүмитиниң қайта -қайта оттуриға қойған тәләблиригә қаримай, башқа уйғур тәшкилатлирини террорчи тәшкилатлар тезимликигә киргүзүшни рәт қилғанлиқи, б д т вә америка һөкүмитиниң, шәрқий түркистан исламий һәрикитини террорчи тәшкилатлар тезимликигә киргүзүштә қилған хаталиқини етирап қилғанлиқиниң очуқ ипадиси икән. Мақалидә ейтилишичә, хитай сақчи қисимлириниң памир игизликидә аталмиш базиға елип барған һуҗумида өлгәнләрниң шәрқий түркистан исламий һәрикити әзалири икәнликигиму гуман билән қараш керәк икән. (Қанат)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт