Хитай компартийиси өз партийә әзалирини сабиқ совит итипақидин савақ елишқа үндимәктә

• Мухбиримиз меһрибанниң бу һәқтики мәлумати
• Download story audio

Хитай компартийиси мәркизи интизам тәкшүрүш комитети хитайдики һәрқайси дәриҗидики партийә тәшкилатлиридин "сабиқ совит һакимийити қандақ ағдурулған" дегән мәзмундики тәрбийиви һөҗҗәтлик филимни көрүшни тәләп қилмақта. Мәзкур филим җәми 8 қисим болуп, униңда сабиқ совит компартийисиниң тарихи, нәзәрийиси, йетәкчи идийиси, истили вә принсипи қатарлиқ мәзмунлар киргүзүлгән.

Хитай һөкүмитиниң бу һәқтә бәргән хәвиридә көрситилишичә, һазир партийә ичидики чириклик мәсилиси интайин еғирлашқан. Мәзкур мәсилә түпәйлидин, хәлқниң наразилиқиму барғансери күчәйгән. Шуңа партийә ичидики бу хил чирикликни бир тәрәп қилиш үчүн, компартийә интизам комитети сабиқ совит һакимийити ағдурулғанлиқиға 15 йил болған бу пәйттә, хитай иҗтимаий пәнләр академийиси билән бирлишип мәзкур тәрбийиви филимни ишләп чиққан һәмдә партийә ичидә, чирикликкә қаршилиқ билдүрүп партийиниң өзгирип кетишиниң алдини елишни мәқсәт қилған.

Хитай компартийисиниң бу һәқтә чиқарған қарари һәққидә анализчилар түрлүк пикирләрни оттуриға қоймақта. 1989 ‏- Йили бейҗиңда йүз бәргән тйәнәнмин оқуғучилар һәрикитигә қатнашқан мәшһур өктичи лю шавбо әпәнди "һазир хитай һөкүмити дуч келиватқан әң чоң хәтәр партийә ичидин келидиған хәтәр. 89 ‏- Йилидин буян партийә ичидики чириклик вә мәнсәпхорлуқ мәсилиси барғансери еғирлишип, хитай компартийисиниң мәвҗут болуп туришиға чоң бир тәһдит болуп қалди. Хитай компартийиси партийә ичидики бу хил тәһдитниң алдини алмиса болмайдиған һаләткә йәткәнликини һес қилди. Шуңа улар мәзкур қарарни чиқирип, хитай компартийисиниң йимирилишиниң алдини алмақчи болуватиду" дәп билдүрди.

Америкида турушлуқ уйғур зиялийси сидиқ һаҗи әпәнди "хитай компартийисиниң бу хил усуллар арқилиқ мәзкур партийиниң парчилинип кетишиниң алдини алалиши һәргизму мумкин әмәс", дәп тәкитлиди вә сабиқ совит һөкүмитиниң ағдурулғанлиқи һәққидики сәвәбләр һәққидә тохталди. У йәнә "русийиниң түнүгүни хитайниң бүгүни" болидиғанлиқини оттуриға қойди. (Меһрибан)