Songxwajyang deryasidiki bulghinish rusiyige tesir körsetmekte

11 - Ayning 13 - küni jilin ximiye zawutida yüz bergen partlash sewebidin zeherlik bénzol maddisining songxu'ajyang deryasining süyige ariliship kétishi, derya süyining éghir derijide bulghinishini keltürüp chiqarghan we xarbin shehirining su teminlishi toxtitilghan shuningdek 4 milyon ahale su ishlitishte qiyinchiliqqa uchrighan. Partlash weqesi 5 kishining ölümige seweb bolghandin sirt 10 ming kishi partlash yüz bergen rayondin bashqa yerlerge yötkiwitilgen.

Xitay hökümiti rusiye bilen ixtilap kélip chiqishining aldini almaqta

Xitayning hökümet metbu'atliri bu weqeni bir mezgil erkin tarqatqan bolsimu emma hazir hökümet bu heqtiki xewerning tarqilishini qattiq kontrol qilghan. Közetküchilerning qarishiche, xitay hökümitining bu herikiti, ikki dölet arisida ixtilap meydan'gha kélishining aldini élish üchün iken.

Biraq rusiye metbu'atlirida bu heqte türlük ghulghulilar bayan qilinmaqta. Melum bolushiche, songxu'ajyang deryasining bulghan'ghan suyi rusiye chégrisidin éqip kirip, rusiyining yiraq sherqige jaylashqan xabarowski rayonigha éghir derijide tesir körsetken.

Bu arida, xitay tashqi ishlar ministirliqining bayanatchisi lyu jyenchaw muxbirlarni kütiwélish yighinida "xitay hökümiti heqiqiy tedbir qollinip, song xu'ajyang deryasi süyi bulghinish weqesining rusiyige keltürüsh mumkinchiliki bolghan ziyanni azaytti. Bu weqening junggo - rusiye munasiwitige tesir yetküzüshini ümid qilmaymiz" dégen.

Munasiwetlik jaylardiki mektepler derstin toxtighan

Moskwa hökümiti gerche bulghan'ghan sudin mudapi'e körüsh xizmetlirining yaxshi ishlen'genlikini otturigha qoyghan bolsimu, emma xabarowskidiki aliy, ottura we bashlan'ghüch mekteplerde ders toxtighan, résturan'gha oxshash mulazimet orunlirimu taqiwétilgen.

Xabarowskidiki muhit énérgiye ministirliqining mu'awin ministiri öleg mitwolning éytishiche, xabarowski rayoni jiddiy haletke kirgen bolup, nöwette su tarqitishni pütünley toxtitiwetken.

Melum bolushiche, xabarowski yerlik hökümiti, nöwette xitay hökümitidin barliq iqtisadiy ziyanni tölep bérishni telep qilidiken.

Rus analizchilirida guman

Rusiye metbu'atlirida öz qarashlirini bayan qilghan analizchilar, rusiye iqtisadining kündin - kün'ge nacharlishiwatqan peytide, bu weqening meydan'gha kélishi, esli mewjut bolghan qiyinchiliqlarning téximu küchiyip kétishige yol achqanliqini bildürgen bolsa, yene bir qisim analizchilar, bu weqening qesten orunlashturulghanliqini otturigha qoyghan.

Ularning éytishiche, xitay terep bulghan'ghan suni rusiye chégrisigha kirgüzüsh arqiliq esli nopusi az bolghan rusiyining yiraq sherq rayonidiki rus xelqini bu zémindin köchüshke mejburlash, bu arqiliq xitay nopusini bu zéminda téximu köpeytish meqsitini ishqa ashurushtin ibaret iken.

Rusiye zéminida xitay nopusining köpiyip kétish ehwali, rusiye hökümitining diqqitini tartiwatqan muhim mesililerdin biri bolup, analizchilarning bu xil qarashliri kishilerde endishe peyda qilmaqta. (Eqide)