Xitayda ochuqluqqa yüzlen'gen gézitlerni taqaydighan tetür éqim


2006-01-26
Share

Xitay kommunist partiyisi merkiziy komitétining teshwiqat ministirliqi 2004 ‏- yili "jenubi junggo kechlik géziti", "iqtisadiy nezer géziti" , "xénen soda géziti" qatarliq ochuq -yoruqluqqa yüzliniwatqan uchur wasitilirini taqighan idi. 2005 ‏- Yilining axirida "yéngi béyjing géziti" ni taqidi. 2006 ‏- Yili kirish bilenla 1‏- ayning 25 ‏- küni yene "muzluq" heptilik gézitini taqidi, - dep mulahizisini bashlaydu xitaydiki siyasiy mulahizichi lyushawbo ependi‏ béyjingda öz turalghusida turup yazghan obzorida ‏- uning bayan qilishiche, xitay kommunist partiyisi basturup kéliwatqan uchur wastilirining hemmisi jem'iyette ochuq -yoruqluqqa qarap yüzliniwatqan, mushtiriliri kündin -kün'ge köpiyiwatqan gézit -jurnallar. Kommunist xitay hökümitining mexsus ilgharliqqa qarap yüzliniwatqan uchur wasitilirini basturushi xitaydimu uchur wastilirining erkinlishish, bazarlishish, xelqchillishish, musteqillishish yoligha qarap méngishini tosup, uni dawamliq türde kommunist partiyining zuwani qilishni meqset qilghan. Kommunist xitay hökümiti hazir dunyada exlaqiy ölchem jehette nahayiti ajiz orunda turiwatqanliqtin, bu mesilini hel qilish üchün, xitaydiki uchur wastilirinila emes, belki xelq'aradiki xitaygha da'ir uchur wastilirining hemmisini pütünley kommunist partiyining "zuwani" yaki "mexpiy saqchi'liri" gha aylandurush üchün heriket qiliwatidu.

Partiyini xunükleshtürgenlik chong gunah

Lyushawbo ependining obzorida "muzluq" heptilik gézitining taqiwitilishtiki seweblerning birini neqil keltürüp bayan qilinishiche, bu gézitte jongsen uniwérsitéti pelsepe fakultétining proféssori yu'en wéyshi ependining xitayda hazir qolliniliwatqan tarix derslik kitabliri heqqide yazghan bir obzori élan qilin'ghan idi. Bu obzorda xitay kommunist partiyisini "chil böre" ge oxshitip, kommunist xitay ma'aripida qolliniliwatqan derslik kitablarni bolsa "bizning balilirimizgha chil börini emdürüsh" belki "dawamliq emdürüsh" tin ibaret, dep körsitilgen idi. Bu gézitte yene dunyada fashizmgha qarshi urush ghelibe qilghanliqining 60 yilliqini xatirilesh munasiwiti bilen élan qilin'ghan bir maqalida "pingshin'gu'en urushi" tilgha élin'ghan idi. Shunglashqa xitay kommunist partiyisi merkiziy komitétining teshwiqat ministirliqi bu gézitni "kommunist partiyini xunukleshtürdi" dep eyiblidi. Shundaqla xitay dölet kabinitining uchur ‏-axbarat mehkimisi, béyjing sheherlik neshriyat idarisi qatarliq organlarmu derhal oqturush chüshürüp "muzluq" heptilik gézitining taqiwitilgenliki heqqide xewer élan qilmasliqni, uningda élan qilinip bolghan maqalilerdin neqil almasliqni, bundaq gézitlerdin chégra ayrishni buyrighan. Xitayning yashlar ittipaqi merkiziy komitétimu qarar chiqirip "junggo yashliri gézit" ning qoshumche heptilik géziti bolghan "muzluq" gézitidin ibret élishni, her qaysi waste tarmaqlirining buningdin kéyin kommunistik partiyining jama'et pikrige bolghan yétekchilikini qet'iy dawamlashturushni tekitligen.

Xityaday nurghun adem yenila dozaqta yashimaqta

"Amérika awazi"ning xewer qilishiche, xitay kommunistik partiyisi merkizi komitétining teshwiqat ministirliqi "muzluq" ni taqash buyruqi élan qilghandin kéyin, bu gézitning muherriri li datong ependi buninggha naraziliq bildürüp bayanat élan qilghan. U bayanatida "xu jintaw" dégen isim hazir tetür éqimning we démokratiyige qarshi turidighan mustebitning simwoli bolup qaldi, dégen.

Xitayda "shangxey yigiti" serlewhilik félyeton yézip tonulghan teywenlik yazghuchi long yingtey ependining "muzluq" gézitining taqalghanliqi heqqide yazghan maqaliside bayan qilinishiche, xu jintaw ependi hazir rehberlik qiliwatqan dölet dunya boyiche erkinlik sélishturmisida 177 ‏- orunda turiwatqan dölet. Bu döletning tüzümi zadi qandaq tüzüm? xu jintawgha rehberlik hoquqini kim bergen? u özining qaysi qanun'gha muwapiq erbap ikenlikini oylap baqtimu? eger uning sözi boyiche "gherb ongchilirining ölchimi xitayning dölet ehwaligha muwapiq kelmeydu" déyilse, xitaydiki hazirqi tüzüm sotsiyalizmning "bayliqlarni teng barawer teqsim qilish" dégen ölchimige uyghun kélemdu? xitayda hazir baylar bilen namratlarning perqini ipadilep turghan sanliq sélishturma jénis rékortidin nölde 4 hesse éship ketti. Xitayda hazir nurghun adem jennette yashisa, yene nurghun adem dozaxqa kirip qaldi. Xu jintaw ependi hökümetning zuwani bolghan téléwiziye, radi'olar arqiliq "bext naxshisi" ni towlap, hemme boshluqni igilep, namratlarning awazini hergiz chiqarghuzmaywatidu. Ochuq- yoruqluqqa yüzliniwatqan gézitlerni basturup, namratlarning ingrighan awazini chiqiridighan "boghizi" nimu késip tashlawatidu. (Weli)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet