Teywen xelqi milletchi partiye bilen kommunist partiye hemkarliqidin bizar


2007-05-07
Share

Teywendiki gomindang partiyisi (milletchi partiye) bilen chong quruqluqtiki kommunist partiye uzun yillardin buyan yenila ikki partiye hemkarliqini dawamlashturuwatidu. Gerche bu ikki partiyining teshebbuslirida nahayiti chong ziddiyet bolsimu, mesilen: milletchi partiyining 'jungxu'a min'go' asasida döletni birlikke keltürüsh dégini bilen chong quruqluqtiki kommunist partiyining 'jungxu'a xelq jumhuriyiti' asasida döletni birlikke keltürüsh dégini oxshimisimu, bu ikki partiye yenila xitay milletchiliki noqtisidin nuqul halda 'junggo' dégen müjimel nam astida döletni birlikke keltürüsh üchün siyasiy jehettin hemkarlishiwatidu. Teywen xelqi hazir bundaq hemkarliqning dawamlishiwirishidin bizar bolmaqta.

Teywen proféssorlar birleshmisi jang keyshi heykellirini üzül-késil tazilap, ewladlar üchün pak-pakize oqush muhiti yaritishni teshebbus qildi

Bügün teywende 99 neper proféssor imza qoyup, proféssorlar birleshmisi namidin otturigha qoyghan teshebbusida, teywende jang keyshi heyklini pütün ma'arip sahesidin üzül-késil tazilap, ewladlar üchün pak-pakize oqush muhiti yaritishni tekitlidi.

'Jenubiy teywen xewerliri' gézitining bayan qilishiche, jang keyshi gurohi 1949 ‏- yili chong quruqluqtiki urushta, kommunist partiye teripidin meghlup qilinip teywen'ge qéchip kelgendin kéyin, ‏- dep körsitilidu proféssorlar birleshmisining bayanatida,‏-‏ bu partiye teywende shexsiyge chuqunushni yolgha qoyup, jang keyshi heykellirini barghanséri köplep yasap, teywen xelqini jang keyshidin ibaret bu mustebitke chuqunushqa mejburlighan idi.

Shuningdin buyan teywen xelqi milletchi partiye yürgüwatqan herbiy halet shara'itide, bundaq milliy haqaretke chidap turushqa toghri keldi. Hazir teywende démokratiye tüzümi tiklinip boldi, teywen xelqi hazir üchinchi qétimliq démokratiye dolqunigha qedem qoydi.

Emma, hazirgha qeder jang keyshining heykellirining teywende, bolupmu ma'arip saheside téxiche üzül-késil taziliwitilmesliki teywen démokratiyisige qiliniwatqan haqaret, teywen xelqining, bolupmu, milletchi partiyening "yigirme sekkizinchi féwral qirghinchiliqi' gha uchrighan teywenliklerning milliy ghorurighan qilin'ghan haqaret.

Kökchiler (gomindangchilar) proféssorlarni 'tarix sawadi tüwen bolghanliqitin' dep tenqidligen

Teywenning gawshung shehiride ötken ayda jungjéng (jang keyshi) medeniyet merkizidiki jang keyshining heykili we jang keyshining nami yézilghan wéwiskilar bir kéchidila pütünley taziliwetken idi, ‏-‏ dep bayan qilinidu xitayning 'yultuzluq aral' gézitide.

‏ Bügün yene teywen proféssorlar birleshmisi qatarliq 10 nechche teshkilat birlikte gawshung shehirining bashliqi chén jü ependining heykel tazilash herikitini qollap pa'aliyet élip bardi. Xewerde éytilishiche, bu heriketni teywen'ge sirttin kelgenlerni yaxshi körmeydighan kishiler alqishlighan.

Emma kökchiler (gomindangchilar) ularni 'tarix sawadi tüwen bolghanliqtin' dep tenqidligen. 'Merkizi agéntliqi'ning bayan qilishiche, teywen'ge chong quruqluqtiki bashqa ölkilerdin jang keyshi armiyisi bilen kelgenlerni öz ichige alghan sirttin kelgenler pütün teywen nopusining %13 ni teshkil qilidu, hazir teywen bilen xitay otturisida biwaste ayrupilan qatnishini qizghin teshebbus qiliwatqanlarmu, peqet pütün teywen nopusining % 13 nila teshkil qilidu.

Chén shuybyen sözide 'milletchi partiye bilen kommunist partiye hemkarliqi hazir teywenning yéza igilikini qurban qiliwatidu' dep körsetken

Bügün teywen prézidénti chén shuybyen bilen mu'awin prézidént lüshyulen teywen yéza igilik mehsulatliri birleshmisining kechlik pa'aliyitige qatnashqan. 'Merkizi agéntliqi'ning bayan qilishiche, prézidént chén shuybyen milletchi partiyining sabiq re'isi lyen jen ependining chong quruqluqta kommunist partiye bilen birlikte soda söhbiti ötküzgenlikini tilgha élip "milletchi partiye teywende hakimiyettin mehrum qalghandin kéyin, teywenning yéza igilik mehsulatlirini chong quruqluqta bazargha sélish dégen nam bilen teywen xelqini aldashqa bashlidi.

Shuningdin kéyin, xitay teywenning yéza igilik téxnikilirini oghrilap, teywen'ge teqlit qilip ishligen saxta mehsulatlarni hedep bazargha sélip, teywen xelqining menpe'etige ziyan séliwatidu. Teywen xelqi 'milletchi partiye bilen kommunist partiye hemkarliqi'ning qurbani boluwatidu" dep körsetken.

Mu'awin prézidént lüshyulenmu bu kechlik pa'aliyette söz qilip "hoquqidin ayrilip qalghan siyasetchiler hazirmu xitay bilen teywenni bir bazar, dep qarap, teywenning yéza igilik téxnikilirini xitaygha teqdim qilish arqiliq 'sulaligha tartuq' bériwatidu" dep körsetken. (Weli)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet