Gomindangning partiye mülkini musadire qilish tejribisidin qandaq paydilinish kérek?

• Muxbirimiz welining bu heqtiki toluq melumati
• Download story audio

Teywende hazir gomindang partiyisining mülkini musadire qilish dawamlishiwatidu. Erkin asiya radi'osining obzorchisi, uzundin buyan kommunist partiye tarixini tetqiq qilip kéliwatqan, hazir teywende turuwatqan lin bawxu'a ependi ziyaritimizni qobul qilip, bu heqte mulahize élan qildi. Lin bawxu'a ependi mulahiziside teywendiki gomindang partiyisi bilen chong quruqluqtiki kommunist partiyini sélishturushqa ehmiyet berdi.

‏ Gomindang bilen kommunist partiyining qaysi eng chong bay?

-‏ Partiye mülkining köpliki jehettin éytqanda, teywendiki gomindang dunya buyiche eng bay partiye, ‏-‏ dep mulahizisini bashlaydu lin bawxu'a ependi, ‏-‏ gomindang özining mülki barliqini ochuq étirap qilidu. Emma chong quruqluqtiki kommunist partiye buninggha oxshimaydu. U özining mülki barliqini étirap qilmaydu, xitaydiki mülükning hemmisini 'xelqning mülki', 'döletning mülki' dep ataydu. Mana bu mushu ikki partiyining perqi we kommunist partiyining hiligerliki.

Lin bawxu'a ependining bayan qilishiche, gomindang özining partiye mülki barliqini ochuq étirap qilip kelgen bolghachqa, teywende démokratiye yolgha qoyulghandin kéyin, gomindangning qanunluq mülki hazirmu mewjut. Xitayda ehwal undaq emes, eger xitay démokratiyileshse, özining mülki barliqini ochuq étirap qilmighan kommunist partiyining xitayda héchqandaq mülki bolmaydu, pütün mülük xelqning özining mülki bolup kétidu. Mülük xelqning qoligha ötsila, kommunist partiye gumran bolidu. Shunglashqa kommunist partiye hazir démokratiyige qarshi turidu.

Xitayning asasiy qanunida 'kommunist partiye rehberlik qilidu' dep belgilen'gen, shunglashqa 'xelqning mülki', 'döletning mülki' dégenning hemmisini kommunist partiye özining mülki qiliwaldi. Bu menidin éytqanda, kommunist partiye dunya buyiche eng bay partiye. Yer astidin tartip asmandiki hawa boshluqighiche hemmisi kommunist partiyining mülki.

Xitayda xususiy shirket dégenlermu emeliyette kommunist partiyining mülki

Teywendiki gomindang partiyisi bilen chong quruqluqtiki kommunist partiyining mustebitlik jehette héchqandaq perqi yoq. Emma teywende soda- tijaret yenila shexsiylerning igilikide. Chong quruqluqtiki kommunst partiye bolsa xususiy igilikke yol qoymaydu. Xitayda islahat élip bérilghandin kéyin, gerche dölet igilikidiki shirketler %50, qalghan %50i shexsiylerning igilikide déyilsimu, banka, éléktir quwwiti, kan - bayliq qatarliq eng chong hel qilghuch shirketlerning hemmisi yenila dölet igilikide.

Xususy shirketlergimu yenila kommunist partiye rehberlik qilidu. Bundaq shirketler kommunist partiyige béqinidu. Eger kommunist partiyige qarshi tursa, u özini saqlap qalalmaydu, derhal dölet igilikige ötüp kétidu. Démek xitaydiki xususiy shirket dégenlermu emeliyette kommunist partiyining mülki. Shangxeydiki eng chong bay ju jéngyi, uning bayliqi xususiy mülük, emma u pütünley jang zémin a'ilisi we shangxeydiki partiye emeldarliri bilen til biriktürüp bay bolghan. Bundaq til biriktürüsh bolmisa uning eng chong bay bolup turushi mumkin emes.

Teywende peqet gomindangning qanunsiz mülki musadire qilinidu

Teywen démokratik dölet bolghachqa, peqet 'gomindangning adaletsiz, qanunsiz mülki musadire qilish' ni otturigha qoydi, eger gomindangning ezaliri i'ane qilghan mülük bolsa, bundaq partiye mülki musadire qilinmaydu. Emeliyette gomindangning qanunsiz mülki nahayiti köp. Yapon'gha qarshi urush ghelibe qilghandin kéyin, eyni waqittiki xitay hökümiti wekil ewetip yaponluqlarning teywendiki mülkini ötküzüwalghan. Mesilen: teywen shékiri, teywen tamakisi, teywen simunti dep atilidighan yapon shirketliri ötküziwélin'ghandin kéyin, u gomindangning partiye mülki dep atalmay, dölet igilikidiki shirket dep atalghan idi. Shunglashqa hazir bu shirketlerge teywende qaysi partiye hoquq tutsa shu partiye bashqurghuchi ewetidu. U gomindangning partiye mülki dep hésablanmaydu.

Emma gomindang dölet bilen partiyini bir gewde qiliwalghan partiye bolghachqa, dölet ötküzüwalghan bundaq mülüknimu özining mülki qiliwalghan. Hetta yaponlardin ötküzüwalghan bezi shirketlerni gomindang özining yashlar ittipaqi, ayallar birleshmisi dégen teshkilatlirigha sogha qiliwetken. Emma yaponlarning kinoxanilirini gomindang özining qiliwalghan. Kéyin kinoxanilarni chéqip, ornigha chong bina saldurup, yer -zémin sodisida nahayiti köp paydigha érishken. Gomindangning bundaq qanunsiz mülki nahayiti köp. Bu mülükning bir qismi hazir 'meblegh sélish' dégen nam bilen chong quruqluqqa yötkep kétildi. Lyen jen qatarliqlar chong quruqluqqa salghan meblegh del mushundaq meblegh. Teywende musadire qilinidighan gomindangning partiye mülki del mushundaq qanunsiz mülük.

Gomindang hoquqqa érishish üchün pulni ayimay xejleydu

Hazir teywendiki gézitlerde, téléwizorlarda gomindangning saylam élanliri nahayiti köp, teywendiki minjindangning élanliri az, bular nahayiti japa - musheqqet ichide xizmet qilidu, chünki puli yoq. Gomindang hoquqqa érishish üchün, eger hazir pul xejlep hoquqqa irishiwalmisaq, beribir musadire qilinip kétidu, dep pulni ayimay xejlewatidu. Hoquq tutush üchün jan tikiwatidu. Hetta saylaydighanlargha para béridu.

Hazir teywende axbarat, teptish, qanun organlirida ishlewatqanlarning ichide gomindangning adimi köp. Gomindang özidin chiqqan parlamint ezalirigha saylamda ghelibe qilishi üchün her bir kishige 5 milyondin pul bergenliki melum.

Shinjangdiki chong qurulushlarmu yerlik xelqning özige qaytidu

Chong quruqluqta démokratiye tüzümi tiklense, kommunist partiyining mülki bolmaydu, hemmisi xelqning özige qaytidu. Chünki u pütün mülük xelqning mülki dep atap kelmekte. Kommunist partiye shinjangning bayliqini özining qiliwélish üchün 'döletning eng chong énérgiye merkizi' dep élip barghan her xil chong qurulushlarning hemmisi yerlik xelqqe qaytidu. Bu shirketlerning bashqurghuchiliri almashturulsila,kommunist partiye uningdin paydilinalmaydu.

Chong quruqluqta kommunist partiyining 70 milyon ezasi bar. Hazirqi bilimlik kishilerni kommunist partiye özige eza qiliwaldi, sétiwaldi. Eza bolmighan, sétilmighanlarni bésiwetti, egeshmigenlerni bilimsiz qaldurdi. Kommunst partiyige qarshi turidighanlarning bilim qurulmisi ulardin töwen, muqim partiyisi yaki mustehkem teshkilati yoq. Kommunist partiye aghdurulghanda, shirketlerni bashquridighan kommunist bolmighan kishilerdin shunchiwala rehberni tépip chiqish asan'gha chüshmesliki mumkin. Bu chong quruqluq bilen teywenning oxshimaydighan yéri.

Hazir teywende gomindangchilar minjindangchilarni qabiliyetsiz dep yaratmaydu, emeliyettimu burun gomindanggha egeshmigenler nadan qaldurulghan bolghachqa, ularda bilimlik adem az, hazir minjindang hoquq tutqandin kéyin, ularning qol astida ish bijirishke layaqetlikler yenila gomindangchilar, ular egeshsila hésab, burun gomindanggha qarshi turush xiyalida bolghanlar bolsila hésab. Démek bilimlik adem qehetchiliki bir millet üchün nahayiti muhim mesile, bu teywen tejribisi. (Weli)