Bir türküm amérika palata ezaliri: " teywenning kélechikini xitay emes, teywen xelqi belgilishi kérek"
2008.01.09
12 -Yaniwar küni teywende ötküzilidighan parlamént saylimi harpisida, saylamni közitish üchün, bir türküm amérika palata ezaliri teywen'ge yétip keldi. Teywen prézidénti chén shuybyen amérika palata ezaliri bilen körüshken chéghida, teywendiki gomindang parti'iyisi bilen xitay kommunist partiyisining teywende ötküzülmekchi bolghan omum xelq ray sinashqa birlikte qarshi turuwatqanliqini tenqid qilghan. Amérika palata ezaliri, teywenning teqdirige munasiwetlik qararni xitaymu emes, amérikimu emes, teywen xelqi özi bérishi kéreklikini bildürgen.
Teywen xelqining iradisi hörmet qilinishi kérek
Amérika awam palata ezaliridin solomon ortiz bilen, stew shabot charshenbe küni teywen tashqi ishlar ministiri xu'ang jifang bilen körüshkendin kéyin, muxbirlarning ziyaritini qobul qilghan. Ular sözide mundaq dégen: bir hakimiyet, chong mesililerge qarar bérishte ixtilapqa duch kelgende, mesilini xelq awazigha qoyup hel qilish axirqi bir tallash yoli. Teywenning mesililirige we kelgüsige qarar bérish hoquqi xitay xelq jumhuryitining ilkide emes, amérika qoshma shtatlirining ilkidimu emes. Peqet we peqet teywen xelqining ilkididur. Teywen xelqining iradisi hörmet qilinishi kérek.
Teywenning jenubiy rayonlirini közdin kechürgen solomon ortiz, bu rayondiki xelqning nöwettiki saylamgha nahayiti jiddiy qarawatqanliqini bayqighan we bu heqte mundaq dégen " men teywen xelqining eqil-parasitige ishinimen, ularni awazini toghra qollinalaydu dep qaraymen. Biz teywen xelqning eqil-parasitige hörmet qilishimiz kérek."
Amérikining teywen siyasitide chong özgirish bolmaydu
Teywen prézidénti chén shuybyen, amérika palata ezaliri bilen körüshken chéghida yene, xitayning teywen'ge qarita tehditining dawamliq türde éship bériwatqanliqini, xitayning teywenni nishanlighan bashqurilidighan bombisining 1328 ge yetkenlikini tekitligen hem amérikinng teywen'ge F16 CD tipliq urushchi ayropilan sétip bérish planini testiqlishini ümid qilidighanliqini bildürgen. Chén shuybyen bilen körüshken ikki neper amérika palata ezasining biri, jumhuriyetchiler partiyisige, yene biri démokratchilar partiyisge eza bolup, ular, amérikining yéngi prézidénti kim bolushidin qet'iynezer, amérika -teywen munasiwitide buzulush bolmaydighanliqini, amérikining teywen siyasitide chong özgirish bolmaydighanliqini bildürgen.
Teywende shenbe ötküzülidighan saylam, teywenning kélechiki üchün muhim ehmiyetke ige bir saylam bolup, bu saylamning netijisi, közetküchiler teripidin, chén shuybyenning musteqilliq terepdari siyasiti heqqide bir qétimliq xelq rayini sinash dep qaralmaqta. Nöwettiki, teywen prézidénti musteqilchi bolsimu, teywen parlaméntida, musteqilliq terepdarliri mutleq üstünlükke ige emes.
Bu sewebtin teywen prézidéntining xitaygha qarshi bir qisim keskin qarar layiheliri parlaméntta tosqunluqqa uchrap kelgen. Mesilen, amérikidin birqanche milyard dollarliq qoral sétiwélish layihesi parlaméntta testiqtin ötmigen. Shunga közetküchiler, eger bu qétimqi saylamda, démokratik tereqqiyat partiyisi we uning ortaqliri köp sanliq orun'gha érisheligen teqdirde, teywenning musteqilliq musapisi üchün yol kéngeygen bolidu dep qarashmaqta.
Xitayning teywen'ge qarshi diplomatik bésimi kücheymekte
Teywen ichki ishlar ministirliqining bildürüshiche, saylam netijisidin kéyin, jem'iyet tertipini buzidighan naraziliq heriketlirining aldini élish üchün, nöwette 40 ming neper saqchi wezipige hazir halette turmaqta.
Amérika palata ezalirining bu qétimqi teywen ziyariti, xitayning teywen'ge qarshi diplomatik bésimini kücheytiwatqan künlerge toghra keldi. Aldinqi hepte, jenubiy afriqidiki, siwaziland dölitini ziyaret qiliwatqan teywen tashqi ishlar ministiri ziyaret planining ikkinchi békiti bolghan malawidin ziyaret künini kéchiktürüsh heqqide teklip tapshuruwalghan. Bu ehwalni teywen terep, xitayning diplomatik tosaqlirining netijisi dep bildürgen idi. (Shöhret hoshur)
Munasiwetlik maqalilar
- Gomindangning partiye mülkini musadire qilish tejribisidin qandaq paydilinish kérek?
- Qirghizistan parlaméntida Uyghur wekili - perhat haji
- Közetküchilerning neziridiki özbékistan prézidént saylimi
- 2007 - Yilidiki dunyawiy siyasiy heriketlerde ayallar
- Qirghizistandiki öktichi partiye - guruhlar saylamda adaletsizlik körülgenlikini ilgiri sürdi
- Qirghizistan parlaméntidiki saylamning deslepki netijiliri
- Teywen omum xelq rayini sinashta ghelibe qilsa qandaq aqiwetler meydan'gha kélidu
- Sabiq amérika prézidénti jimi kartér déng shawping bilen tüzgen xususiy kélishimni ashkarilidi
- Perhat haji qirghizistan ali kéngishige namzat qilip körsitildi
- Rusiyi'e parlamént saylimida putinning partiyisi ghelibe qildi
- Qirghizistan Uyghurliri dilmurat ekberofni Uyghur ittipaqining re'islikige saylidi
- Chingxu'a uniwérsitétida sherqiy türkistan mesilisi heqqide léksiye ötküzüldi (1)
- 7- Nöwetlik xelq'ara ottura asiya tetqiqat yighini teywende échildi