Тәйвәндики гоминдаң һакимийити чәттин кәлгән һакимийәтму яки йәрлик һакимийәтму?


2007-07-09
Share

Тәйвән сайлам комитетиниң 7 ‏- айниң 8 ‏- күнидики йиғинида, келәр йили 1 ‏- айниң 12 ‏- күни қанун комитети сайлими, 3 ‏- айниң 22 ‏- күни президент сайлими өткүзүш қарар қилинған иди. Америка авазиниң хәвәр қилишичә, бүгүн милләтчи партийә (гоминдаң) билән демократийә-илғарлиқ партийиси (минҗиндаң) ниң президент кандидатлири тунҗи қетим ашкара муназирә башлиған. Бүгүнки муназириниң мәзмуни гоминдаң (милләтчи партийә) һакимийити чәттин кәлгән һакимийәтму яки йәрлик һакимийәтму ? дегән мәсилидин ибарәт болған. Бу бәс -муназирә тәйвәндә милләтчи партийә қурулғанлиқиниң 80 йиллиқини хатириләш йиғинида йүз бәргән.

Хәвәрдә баян қилинишичә, тәйвән демократийә-илғарлиқ партийиси (минҗиндаң) ниң президент кандидати ше чаңтиң тәйвәндики милләтчи партийә һакимийитини 'чәттин кәлгән һакимийәт' дегән. Тәйвәндики милләтчи партийиниң президент кандидати ма йиңҗу 'тәйвәндики милләтчи партийә һакимийитини чәттин кәлгән һакимийәт дегили болмайду, һазирқи һөкүмәт болса хиянәтчи, қабилийәтсиз һөкүмәт' дегән.

Ше чаңтиң: тәйвәнни етирап қилмиған һакимийәт йәрлик һакимийәт әмәс

Тәйвән демократийә -илғарлиқ партийисиниң президент кандидати ше чаңтиңниң баян қилишичә, тәйвәндики япон мәдәнийити тәйвән мәдәнийитиниң бир қисми. Әмма тәйвәндә мәвҗут болуп турғанлики нәрсиниң һәммисини йәрликниң дегили болмайду.

Тәйвәндә мәвҗут болғанлики һакимийәтни, тәйвәнни өзиниң юрти дәп тонумайдиған, қәдирлимәйдиған һакимийәтни тәйвәнниң йәрлик һакимийити дегили болмайду. Ундақ болмиғанда тәйвәндә бурун мәвҗут болған япон һакимийитиму тәйвәнниң йәрлик һакимийити болуп қалиду. Милләтчи партийә һакимийитиму тәйвәнниң йәрлик һакимийити болуп қалиду. Чүнки улар тәйвәнни етирап қилмайдиған, башқиларғиму етирап қилғузмайдиған һакимийәтләр.

Ким тәйвәнниң өзиниң ишчи, деһқан, әскәрлирини етирап қилса, улар уни 'ақ террор', 'коммунист' дәп ативалиду. Ким тәйвәнниң мустәқил дөләтлик орнини етирап қилса, улар уни 'мустәқилчиләр' дәп ативалиду. Буниңдин униң чәттин кәлгән һакимийәт икәнлики ениқ көринип турмамду?

Ма йиңҗю: тәйвәндә пәқәт башқа юртлуқ бар, әмма чәттин кәлгән һакимийәт аллиқачан мәвҗут әмәс

Тәйвәндики милләтчи партийиниң президент кандидати ма йиңҗуниң баян қилишичә, тәйвәндә һәрбий һаләт йүргүзүш бикар қилинғиниға 20 йил болуп қалди. Тәйвән һазир демократик дөләт.

Бу дөләттә чәттин кәлгән һакимийәт йоқ. Тәйвәндә 1996 ‏- йили президент сайлими болғанда, тәйвән хәлқи бизниң милләтчи партийимизниң президент кандидати ли деңхуйни сайлап чиққан иди. Тәйвәндә хәлқ сайлап чиққан һөкүмәт қанунлуқ һөкүмәт.

Һазир тәйвәндә пәқәт башқа юртлуқ бар, әмма чәттин кәлгән һакимийәт аллиқачан мәвҗут әмәс.

Ма йиңҗу: биз җуңхуа миллити дегән сөз тарихта тәйвән хәлқиғә зор илһам болған иди

Б б с ниң хәвәр қилишичә, бу муназиридә йәнә, милләтчи партийиниң президент кандидати ма йиңҗу тарихий шәхсләрдин җяң вейшуй мәсилисини оттуриға қойған. Униң баян қилишичә, җяң вейшуй өткән әсирниң 30 ‏- йиллирида тәйвәндә кишилик һоқуқ вә демократийә көз қаришини ипадилигән шәхс. япон ишғалийитидики сотта, униң 'биз җуңхуа миллити' дегән сөзи хәлққә зор илһам болған иди.

Бу әрбап шу вақитта японға қарши туруш үчүн тәйвәнниң қандақ рол ойниши лазимлиқини, тәйвәндә тинчлиқ әмәлгә ашса униң пүтүн шәрқи җәнубий асияға қандақ тәсири болидиғанлиқини чүшәнгән. японға қарши турушта җуңхуа миллитини етирап қилиш арқилиқ, пүтүн җуңго билән биллә туридиған бундақ һакимийәтни чәттин кәлгән һакимийәт дегили болмайду.

Ше чаңтиң: чәттин кәлгән һакимийәтләр тәйвәндә қандашлиқ мунасивити буйичә сиясәт қоллинип кәлмәктә

Тәйвән демократийә -илғарлиқ партийисиниң президент кандидати ше чаңтиңниң көз қариши буниңға охшимайду. Униң баян қилишичә, бу тарихий шәхс қурған партийә япон ишғалийити тәрипидин 1931 ‏- йили тарқитиветилгән болса, у өзи вә униң сәбдашлири кейин милләтчи партийә тәрипидин җазалап етип өлтүрүлди .

Демәк, бу тарихий шәхс япон ишғалийити шараитидиму, милләтчи партийә һакимийити шараитидиму охшашла зиянкәшликкә учриған шәхс, йәни чәттин кәлгән һакимийәтләр шараитида зиянкәшликкә учриған шәхс. японға қарши турған, кишилик һоқуқ вә демократийини тәрғип қилған бу тарихий шәхсни тәйвәндики милләтчи партийә һөкүмити бурун тилға алмайтти, тәйвәнниң дәрслик китаблириғиму киргүзмигән иди.

Әмди немигә керәк болуп қалди? чәттин кәлгән һакимийәтләр тәйвәндә һаман қандашлиқ мунасивити буйичә сиясәт қоллинип кәлмәктә. 'Биз сериқ падиша әвлади' дегән сиясәт мана буниң ипадиси, тәйвәнни етирап қилмиғанлиқ.

Бүгүн тәйвәнниң б д т ға әза болуши үчүн омум хәлқ аваз қоюш һәққидиму муназирә башланған

Франсийә агентлиқиниң 7 ‏- айниң 9 ‏- күни тәйбейдин хәвәр қилишичә, тәйвәндә бүгүн йәнә, тәйвәнниң бирләшкән дөләтләр тәшкилатиға әза болуши үчүн омум хәлқ аваз қоюш һәққидиму муназирә башланған.

Бу тәйвәнниң қошна дөләтләр билән болған мунасивитидики йәнә бир сәзгүр мәсилә, болупму коммунист хитай һөкүмити әң ғәзәплинидиған мәсилә. (Вәли)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт