Тәйвәндә коммунист әмәлдари чен йүнлингә қарши намайишлар қанлиқ бастурулған

Бүгүн коммунст хитайниң 'деңиз җәмийити' дегән оргининиң башлиқи чен йүнлин тәйвән зияритини ахирлаштуруп бейҗиңға қайтқан. Б б с ниң баян қилишичә, коммунист хитайниң әмәлдари чен йүнлин тәйвән тәрәп билән һава қатниши, деңиз қатниши, почта қатниши вә йемәк бихәтәрликидин ибарәт 4 хил келишим имзалап бүгүн бейҗиңға қайтқан.
Мухбиримиз вәли
2008-11-07
Share
Teywen-110608-namayish-305.jpg 6 - Нойабир күни, коммунст хитайниң 'деңиз җәмийити' ниң башлиқи чен йүнлин тәйвәндики зийарити җәрйанида 10 миңлиған тәйвән хәлқи намайиш қилип чен йүнлинни қарши алмиған вә сақчилар билән тоқунушқан.
AFP Photo

Чен йүнлин қаршилиқ яки паракәндичиликтин бирдәмму хали болалмиған

Тәйвәндә турушлуқ мустәқил язғучи лин бавхуа әпәндиниң ханими лин ханим өзи қатнашқан қаршилиқ һәрикәтләр вә бу җәрянда көргән әһвалларни сөзләп бәрди.

Лин ханимниң ейтишичә, гәрчә коммунист әмәлдари чен йүнлин һәптә ахирида хәлқ арам алидиған күнләрдә тәйвәнгә кәлсә қаршилиқ көрситидиған адәм көп болушидин әнсирәп, дүшәнбә күни келип җүмә күни қайтқан болсиму, әмма мушу бир нәччә күндә, мәйли у турған меһманханида болсун яки тәйвән президенти ма йиңҗюниң әмәлдарлири билән көрүшмәкчи болғанда болсун, һәммисидә тәйвән хәлқиниң қаршилиқ көрситишидин яки паракәндә қилишидин бирдәмму хали болалмиған.

Тәйвәнликләр чоң қуруқлуқтики коммунист әмәлдарлирини 'коммунист бандитлири' дәп атайтти

Лин ханимниң ейтишичә, коммунист әмәлдари чен йүнлин җуңхуа минго президенти ма йиңҗю билән көрүшкәндә, ма йиңҗю униң исмини вә әмәлини атимиған, пәқәт 'яхшимусиз' дегән, чен йүнлинму ма йиңҗюниң әмәлини тилға алмай пәқәт 'өзлириму яхши турдилиму?' дегән, бәзидә 'ма әпәнди' дәп атиған. Иккәйлән өз - ара совға тәқдим қилишқан.

Чен йүнлин ма йиңҗюға бир атниң рәсимини тәқдим қилған. Лин ханимниң тәсвирләп беришичә, рәсимдики бу ат беши кичик һәм оруқ, үстидики егәрни көтүрәлмәй игилип кәткән ат икән. Лин ханимниң ейтишичә, тәйвән хәлқи чоң қуруқлуқтики коммунист әмәлдарлирини 'коммунист бандитлири' дәп атайтти. Тәйвән хәлқи һазир ма йиңҗюниң тәслимчиликидин бизар болмақта.

Чен йүнлин кечиләрдиму еликтронлуқ канайчилардин чиққан ваң - чуңдин хали әмәс

Лин ханимниң ейтишичә, чен йүнлин тәйвәндә болған мушу бир нәччә күндә, чен йүнлин, мәйли кечидә болсун яки күндүздә болсун, һәммила вақитта тәйвән хәлқиниң қаршилиқиға, һәтта паракәндә қилишиға учриған. Лин ханимниң ейтишичә, чен йүнлин кечиләрдиму ятқан меһманханида туруп тәйвәнликләрниң електронлуқ канайчилардин чиқарған ваң - чуңлирини аңлап турған вә униңдин қаттиқ биарам болған.

Ма йиңҗю һөкүмити чен йүнлинни қоғдаш үчүн сақчи тәшкилләп намайишчиларни қанлиқ бастурған

Лин ханимниң ейтишичә, бәзи күнләрдә чен йүнлингә қаршилиқ билдүрүп намайиш қилған тәйвәнликләрниң сани 60 миңдин ашқан. Ахирқи күни намайишчилар топидин бензин қачиланған қутиларни атидиған зораванлиқ һәрикәтлириму пәйда болған.

Әң ахирида, ма йиңҗю һөкүмити чен йүнлинни қоғдаш үчүн сақчи тәшкилләп, чен йүнлингә қарши намайиш қилған тәйвәнликләрни қанлиқ бастурған. юқири бесимлиқ су чечиш машинилириниму ишқа салған. Лин ханимниң тәсвирләп беришичә, тәйбейдә йүз бәргән бу қетимқи қанлиқ бастуруш худди 89 ‏ - йили бейҗиңдики тйәнәнмен мәйданида коммунист армийиси хәлқни бастурған шәкилгә охшайду. Таяқ зәрбисигә учриған, яриланған адәм наһайити көп.

Намайишларда җаң кәйши дәвридики коммунистларға қарши ейтилидиған марш яки нахшилар ейтилған

Лин ханимниң ейтишичә, тәйвәндә коммунист әмәлдари чен йүнлинға қарши йүз бәргән намайишларда, кишиләр һәтта һазирқи президент ма йиңҗюни ойландуруш үчүн, җаң кәйши дәвридики коммунистларға ләнәт оқуйдиған марш яки нахшиларни оқуп йүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт