Teywende kommunist emeldari chén yünlin'ge qarshi namayishlar qanliq basturulghan

Bügün kommunst xitayning 'déngiz jem'iyiti' dégen orginining bashliqi chén yünlin teywen ziyaritini axirlashturup béyjinggha qaytqan. B b s ning bayan qilishiche, kommunist xitayning emeldari chén yünlin teywen terep bilen hawa qatnishi, déngiz qatnishi, pochta qatnishi we yémek bixeterlikidin ibaret 4 xil kélishim imzalap bügün béyjinggha qaytqan.
Muxbirimiz weli
2008-11-07
Share
Teywen-110608-namayish-305.jpg 6 - Noyabir küni, kommunst xitayning 'déngiz jemiyiti' ning bashliqi chén yünlin teywendiki ziyariti jeryanida 10 minglighan teywen xelqi namayish qilip chén yünlinni qarshi almighan we saqchilar bilen toqunushqan.
AFP Photo

Chén yünlin qarshiliq yaki parakendichiliktin birdemmu xali bolalmighan

Teywende turushluq musteqil yazghuchi lin bawxu'a ependining xanimi lin xanim özi qatnashqan qarshiliq heriketler we bu jeryanda körgen ehwallarni sözlep berdi.

Lin xanimning éytishiche, gerche kommunist emeldari chén yünlin hepte axirida xelq aram alidighan künlerde teywen'ge kelse qarshiliq körsitidighan adem köp bolushidin ensirep, düshenbe küni kélip jüme küni qaytqan bolsimu, emma mushu bir nechche künde, meyli u turghan méhmanxanida bolsun yaki teywen prézidénti ma yingjyuning emeldarliri bilen körüshmekchi bolghanda bolsun, hemmiside teywen xelqining qarshiliq körsitishidin yaki parakende qilishidin birdemmu xali bolalmighan.

Teywenlikler chong quruqluqtiki kommunist emeldarlirini 'kommunist banditliri' dep ataytti

Lin xanimning éytishiche, kommunist emeldari chén yünlin jungxu'a min'go prézidénti ma yingjyu bilen körüshkende, ma yingjyu uning ismini we emelini atimighan, peqet 'yaxshimusiz' dégen, chén yünlinmu ma yingjyuning emelini tilgha almay peqet 'özlirimu yaxshi turdilimu?' dégen, bezide 'ma ependi' dep atighan. Ikkeylen öz - ara sowgha teqdim qilishqan.

Chén yünlin ma yingjyugha bir atning resimini teqdim qilghan. Lin xanimning teswirlep bérishiche, resimdiki bu at béshi kichik hem oruq, üstidiki égerni kötürelmey igilip ketken at iken. Lin xanimning éytishiche, teywen xelqi chong quruqluqtiki kommunist emeldarlirini 'kommunist banditliri' dep ataytti. Teywen xelqi hazir ma yingjyuning teslimchilikidin bizar bolmaqta.

Chén yünlin kéchilerdimu éliktronluq kanaychilardin chiqqan wang - chungdin xali emes

Lin xanimning éytishiche, chén yünlin teywende bolghan mushu bir nechche künde, chén yünlin, meyli kéchide bolsun yaki kündüzde bolsun, hemmila waqitta teywen xelqining qarshiliqigha, hetta parakende qilishigha uchrighan. Lin xanimning éytishiche, chén yünlin kéchilerdimu yatqan méhmanxanida turup teywenliklerning éléktronluq kanaychilardin chiqarghan wang - chunglirini anglap turghan we uningdin qattiq bi'aram bolghan.

Ma yingjyu hökümiti chén yünlinni qoghdash üchün saqchi teshkillep namayishchilarni qanliq basturghan

Lin xanimning éytishiche, bezi künlerde chén yünlin'ge qarshiliq bildürüp namayish qilghan teywenliklerning sani 60 mingdin ashqan. Axirqi küni namayishchilar topidin bénzin qachilan'ghan qutilarni atidighan zorawanliq heriketlirimu peyda bolghan.

Eng axirida, ma yingjyu hökümiti chén yünlinni qoghdash üchün saqchi teshkillep, chén yünlin'ge qarshi namayish qilghan teywenliklerni qanliq basturghan. Yuqiri bésimliq su chéchish mashinilirinimu ishqa salghan. Lin xanimning teswirlep bérishiche, teybéyde yüz bergen bu qétimqi qanliq basturush xuddi 89 ‏ - yili béyjingdiki tyen'enmén meydanida kommunist armiyisi xelqni basturghan shekilge oxshaydu. Tayaq zerbisige uchrighan, yarilan'ghan adem nahayiti köp.

Namayishlarda jang keyshi dewridiki kommunistlargha qarshi éytilidighan marsh yaki naxshilar éytilghan

Lin xanimning éytishiche, teywende kommunist emeldari chén yünlin'gha qarshi yüz bergen namayishlarda, kishiler hetta hazirqi prézidént ma yingjyuni oylandurush üchün, jang keyshi dewridiki kommunistlargha lenet oquydighan marsh yaki naxshilarni oqup yürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.