Amérika hökümiti xitay toqulma buyumlirigha 13 tür boyiche cheklime qoyushni oylishidu


2005-10-10
Share

Amérika maliye ministiri jon snow bilen amérika fédéral zapas fondi komitétining re'isi alen grinsipanlar pat yéqinda xitayni ziyaret qilidu. Ularning ziyariti bashlinish aldida amérika soda ministirliki peyshenbe küni bayanat élan qilip, amérika toqumichiliq jem'iyiti otturigha qoyghan xitay toqulma buyumlirigha 13 tür boyiche cheklime qoyush teklipini oylishimiz, dep körsetti.

Amérika soda ministirliki qarmiqidiki toqulma buyumlar kélishimini ijra qilish komitétining charshenbe küni ashkarilishiche, amérika hökümiti 13 türlük xitay toqulma buyumigha import cheklimisi qoyush - qoymasliq mesilisini kéler yili 1 - ayda qarar qilidiken.

Xitaylar qarargha étiraz bildürdi

Xitay soda ministirliki peyshenbe küni amérika hökümiti memliket ichidiki toqumichiliq sahesining teklipini qobul qilip, 13 türlük xitay towarigha import cheklimisi qoyushni oylishishqa maqul bolghanliqini eyiblidi.

Xitay soda ministirliki amérika hökümitining bu qararigha "qet'i qarshi turidighanliqi" ni tekitlimekte. Xitay soda ministirliki amérika hökümitining herikitini dunya soda teshkilatining alaqidar qa'ide - tüzümlirige xilap, dep eyiblidi.

Bu yil 1 - ayning 30 - küni yer shari boyiche toqulma buyumlirigha import cheklimisi qoyush belgilimisi bikar qilin'ghandin kéyin, xitay toqulma buyumliri amérika bazirigha éqip kérishke bashlighan. Belgilime boyiche, eger amérika toqumichiliq sahesi bezi towarlar bazarni qalaymiqanlashturup, soda tertipige tehdit séliwatidu, dep qarisa, amérika hökümitidin qoghdash tedbiri élishni telep qilish hoquqi bar idi.

6 - Nöwetlik söhbet yéqinda bashlinidu

Hazirgha qeder amérika bilen xitay toqulma buyumlar mesilisi boyiche 5 qétim söhbet élip barghan bolsimu, lékin kélishim hasil qilalmidi. Ikki terepning 6 - qétimliq söhbiti bu ay ichide béyjingda ötküzülidu. Söhbet mezgili amérika maliye ministiri jon sinow we fédiral zapas fondi komitétining re'isi alen grénsipanlar xitayda élip baridighan ziyaritining aldi - keynige toghra kelmekte.

Xelq pulining qimmiti amérikining xitay bilen bolghan soda qizil reqimini tengsheshtiki hel qilghuch amil hésablinidu. Amérika, xitayning yéqinda yolgha qoyghan xelq pulini az miqdarda qimmetlendürüsh herikitini qarshi alghan bolsimu, emma dölet mejlisining qarishiche, xitayning bu yolda basqan qedimi yiterlik emes. Bush hökümiti bu mesilide dölet mejlisining küchlük bésimigha düch kelmekte.

Jon sinow béyjingni ziyaret qilidu

Jon sinow bilen alen grénsipan, 14 - öktebirdin 16 - öktebirgiche béyjingda 20 dölet guruhining maliye ministirlar we merkizi banka bashliqlar yighinida bu mesilini otturigha qoyidiken. Amérika maliye ministirliki, jon sinowning xitaylar bilen xelq puli islahat qatarliq iqtisadi mesililer boyiche söhbet élip baridighanliqini bildürdi.

Xitayni tenqid qilghuchilar, erzan towarlarni éksport qilip, amérikida ishsizliqni köpeytiwétish bilen eyiplimekte. Maliye ministirlikining tekitlishiche, jonggoni pulni kontrol qilidighan döletler qatarigha kirgüzüsh - kirgüzmeslik mesilisi jon sinowning ziyaritidin kéyin élan qilinidu.

Esli amérika maliye ministirliki her 6 - ayda bir qétim élan qilidighan dunya pul - mu'amile weziyitige da'ir doklatini 15 - öktebirde élan qilmaqchi idi. Emma maliye ministirliki buni noyabirning bashlirigha kéchiktürüp, jon sinow béyjingda xitaylar bilen körüshkendin kéyin élan qilishni qarar qilghan.

Amérika import cheklimini kéngeytishni oylishidu

Amérika hökümiti 13 türlük towargha cheklime qoyushni oylishish bilen birge, import cheklimisi bu 12 - ayda toshidighan 9 türlük xitay towarining cheklimisini uzartish yaki bikar qilish mesilisini we eslidiki cheklesh- cheklimeslikni oylushiwatqan 4 türlük towargha cheklime qoyush - qoymasliqni qarar qilidu. Bu 4 türlük towar böz, mata, shayi- chekmen, erler we ballilarning yung kiyimi, sün'iy yipek qatarliqni öz ichige alidiken. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet