Gu'angjuda saqchilar bilen Uyghurlar toqunushti

Firansiye axbarat agéntliqining gu'angju ku'angchü'en saqchi ponkitidiki bir saqchining sözini neqil keltürisiche, ötken shenbe küni gu'angju shehirining beyyün rayunida kawapchiliq qiliwatqan Uyghurlar bilen xitay amanliq saqlash xadimliri toqunushqan.

• Muxbirimiz arzuning bu heqtiki tepsiliy melumati
• Download story audio

Mezkur xitay saqchi xadimining bildürüshiche, weqe, amanliq saqchi xadimliri bir Uyghur kawapchi balini qanunsiz tijaret qildi dep kawap sétiwatqan ornidin heydesh sewebidin kélip chiqqan. U saqchi fransiye axbarat agéntliqi muxbirigha bu weqening jeryanini sözlep "bu Uyghur bala kétip uzun ötmeyla, qollirigha pichaq we tömür toqmaqlarni alghan 70 tek Uyghurni bashlap kélip, amanliq saqlash xadimlirigha hujum qildi" digen. U yene "toqunushta üch neper amanliq xadimi yarilandi. Ularmu Uyghur élidin kelgen Uyghur saqchilar. Ikkisi hazir doxturxanida dawaliniwatidu" dep bildürgen.

Biz Uyghur saqchilirining bu weqe bilen néme alaqisi barliqi we weqening tepsilatini igilesh üchün, weqe yüz bergen gu'angju sheherlik beyyü'en jama'et xewpsizlik tarmaq idarisige télifon qilduq. Téléfonni alghan bir nöwetchi xadim bu ehwallardin xewersiz ikenlikini bildürüp, ziyaritimizni ret qildi.

Kim sewebchi?

Biz bu weqe heqqide tepsiliy melumat igilesh üchün yene, gu'angjuda ashxana tijariti bilen shughulliniwatqan Uyghurlar bilen alaqilashtuq. Mezkur weqedin xewerdar bir ismini ashkarilashni xalimighan kishi weqening yüz bérish sewebliri heqqide yuqiriqi saqchining digenlirini ret qilip, bu weqening kélip chiqishigha saqchilarning sewebkar ikenlikini bildürdi.

Uning bildürüshiche, ötken shenbe küni bir türküm amanliq saqlash xadimliri gu'angju beyyün rayonidiki bir bazarda kawapdan qoyghan bir qanche Uyghur baliningkidin kawap yep, pulini bérishni ret qilghan. Bu balilar narazi bolup, amanliq saqlash xadimliridin kawapning pulini töleshni telep qilghinida, ular bu Uyghur balilirini urghan. Bu ishtin xewer tapqan gu'angjudiki tijaret qiliwatqan bir qisim Uyghurlar xitay amanliq saqlash xadimlirining Uyghurlarni öktemlik bilen urghanliqigha narazi bolup, beyyün rayonidiki weqe yüz bergen bazargha yighilghan. Netijide ixtilap chongiyip, amanliq saqlash xadimliri bilen Uyghurlar toqunushqan.

Tayaq yiguchi Uyghurlar doxturxanida

Yuqiriqi Uyghur tijaretchi, weqede xitay amanliq saqlash xadimliri teripidin qattiq tayaq yigen ikki Uyghur balining nöwette gu'angju quruqluq armiye doxturxanisigha élinip, dawaliniwatqanliqini bildürgen.

U yene weqening qandaq bésiqturulghanliqini sözlep, weqe yüz bérip uzun ötmeyla, topilangni basturush saqchilirining neq meydan'gha yitip kélip, ikki terepni ayrighanliqini, yarilan'ghan ikki Uyghur balini doxturxanigha yollighandin sirt, bashqa Uyghurlarni öz turalghu jaylirigha yolgha salghanliqini éytti. Emma, u hazirghiche diloning bir terep bolmighanliqini bildürdi. Bu kishi axirida, gu'angjuda saqchilarning Uyghur tijaretchilerni bozek qilidighan qilmishlarning éghirliqini shikayet qildi. (Arzu)