Ichki mongghulda 2000 dek kent ahalisi saqchilar bilen qattiq toqunushqan

Royétéris agéntliqining xewiride éytilishiche, 22 - iyul küni, ichki mongghulning tonglyaw shehiri yü shin baziri algha kenti etrapida téz süretlik tash yol qurulushi élip bérish jeryanida, kent ahalisigha tewe bolghan shexsilerning yérini tartiwilish sewebidin meydan'gha kelgen toqunushta 30 nechche adem éghir yarilan'ghan.

Saqchilar bilen tirkeshken li : "22 - iyul küni kentinglarda saqchilar bilen amma arsida toqunush yüz bergenliki rasmu? toqunushta qanche adem yarilandi?" digen su'alimizgha jawap bérip "he'e , shundaq weqe yüz berdi, 30 adem yarilandi" dédi.

Bu kishining éytishiche, hökümet téz sür'etlik tash yol yasash pilanini békitishtin burun , mezkür kent déhqanliridin héchqandaq pikir almay, yer tölimi tölesh mesillirinimu yaxshi hel qilmay , hetta déhqanlargha bérilidighan azghine qoshumche pulnimu , axirqi hisabta nahayiti az tarqatqan.

Li yene , bizning "déhqanlar nime üchün naraziliq körsetti ? " digen su'alimizgha "chünki déhqanlargha hökümet aranla 8000 nechche yüz yü'endin pul berdi" dep jawap berdi.

Biz uningdin yene, undaqta silerche silerge qanchilik pul bérilishi kérek idi, yeni ölchem qanchilik bolsa toghra bolghan bolatti? dep soriduq .

U bizge " esli bizge 10 mingdin 20 ming yü'en'giche pul bérimiz dégen hemde bu pul dölet teripidin bérilidighan pul idi, emma bizning qolimizgha azghina pul bérildi" dédi.

Tonglyaw shehiri yü shin bazirining bashliqi jangning bildürishiche , ularning bazirida üch kent bolup, téz süretlik tash yol yasash qurulushida peqet bu kentining yéri igiliniwilin'ghan bolup, bu kenttiki déhqanlar ikki aydin béri, mezkür yol qurulushigha tosqunluq yaratqan, emma 22 - iyul küni yüz bergen toqunushta saqchilar özini tutiwilish pozitsiyiside bolghan.

Bazar bashliqi bu heqte toxtulup mundaq dédi: " kent ahalisi , bérilgen pulni az körüp, qurulushqa tosqunluq qilghandin sirt, bizning saqchilirimizgha qarshiliq körsetti, saqchilirimiz amma bilen biwaste toqunush peyda qilmidi, amma qollirigha tash we kalteklerni élip qalaymiqanchiliq chiqardi, emma bizning saqchilirimiz bolsa ammigha til qayturmidi yaki qol yandurmidi, hazir tayaq sewebidin doxturxanigha kirip qalghan saqchilar bar, 5 saqchi mashinisi urup chéqildi, hetta saqchi idarisi bashliqining qol - putliri tayaqtin zexmilendi.

Déhqanlargha qoshumche pul tölesh mesilisi heqqide toxtalghan jang, hökümetning dölet ölchimi boyiche déhqanlargha pul tarqatqanliqini bildürüp, her bir déhqanning qoligha 9 ming 900 yü'en bérilgenlikini , yene bir qisim pulning kent hökümitige bérilgenlikini éytti.

Biz uningdin kent hökümitige bérilgen pul kent üchün ishlitilemdu? qandaq ishlitilidu? dep sorisaq u bizge : " bu pul, kent wekillirining körsetmisi boyiche, kolliktipning nazariti astida , ochuq - ashkara ishlitilidu" dédi.

Yüshin bazirining bashliqi jang axirida, hazir bir qisim déhqanlarning yenila qurulush meydanida yétiwilip, yol yasatmaywatqanliqini, hökümet, kent ahalisining bu yerdin ayrilishi üchün xizmet ishlewatqanliqini bildürdi.

Neq meydanni öz közi bilen körmigechke, bazar bashliqi jangning gépining qanchilikining rast we yaki yalghan ikenlikige höküm chiqiralmaydighanliqini bildürgen, kanadadiki Uyghur ziyalisi gülshen xanim , bizning ziyaritmizni qobul qilip mundaq dédi. (Eqide)