Chégrisiz muxbirlar teshkilati xitay yéziqida tor bet achti


2007-05-04
Share

Merkizi parijdiki xelq'ara chégrisiz muxbirlar teshkilati 3 ‏- may küni yeni dunya axbarat erkinlik küni , xitay yéziqida tor bet achti. Lékin mezkur tor bet échilishi bilen bir waqitta, xitay hökümiti uni tosup, xelqni mezkur tor betni körüshtin mehrum qildi.

Xitay, erkinlik idiyisi terghip qilidighan tor betlirini cheklep kelgen

Xitay hökümiti yillardin buyan chégrisiz muxbirlar teshkilatining bashqa tillardiki tor betlirinimu pütünley tosup , xelqning erkin uchur igilishige yol qoymay kelgen.

Herqaysi döletlerdiki muxbirlarning kishilik hoquqini qoghdashni meqset qilghan merkizi parijdiki chégrisiz muxbirlar teshkilatining 5 ‏- ayning 3 ‏- küni yeni xelq'ara axbarat erkinlik küni xitay yéziqida achqan tor béti shu künining özidila xitay hökümiti teripidin tosqunluqqa uchrap, xitaydiki her millet xelqi uningdin behriman bolalmighan. En'giliye b b s radi'o ‏- téléwiziye shirkitining bu heqte bergen melumatida éytilishiche, xitay hökümiti bundin ilgirimu öz xelqining chégrisiz muxbirlar teshkilatining bashqa tillardiki tor betliridin paydilinishigha ruxset qilmay kelgen.

Köp tilliq tor bet

Chégrisiz muxbirlar teshkilati bundin ilgiri fransuzche, in'gilizche, ispanche, erebche we farische yéziqlarda tor bet achqan bolup, hazir xitay yéziqida échilghan tor betni qoshqanda, jemi 6 xil yéziqtiki tor bétige ige bolghan.

Chégrisiz muxbirlar teshkilatining melum qilishiche, bu qétim échilghan xitay til ‏- yéziqidiki tor betni xitaydin bashqa dunyaning herqaysi jayliridiki tordashlar héchqandaq tosalghusiz köreleydiken. Mezkur tor bet peqet xitaydila , hökümetning tosalghusigha uchrighan. Chégrisiz muxbirlar teshkilatining asiya bölümi bashliqi b b s radi'o ‏- téléwiziye shirkitining ziyaritini qobul qilghanda, " men xitay hökümitining bizning chégrisiz muxbirlar teshkilatimizning xitay yéziqidiki tor bétimizni chekligenlikidin bekmu epsuslinimen," dep xitay hökümitige naraziliq bildürdi.

U yene ulapla, "xitay xelqi téxi bu tor betni körmey turupla, hökümet uni pichetliwetti. Biz xitay hökümitining bundaq qilishigha qattiq naraziliq bildürimiz we shundaqla xitay hökümitini öz xelqini uchur igileshtin bu qeder chekleshtin derhal toxtashqa chaqirimiz. Xitay hökümiti öz xelqning erkin halda barliq xitay yéziqidiki intérnét torbetliridin paydilinishigha yol échip bérishi kérek" dep körsetti.

Xitay dölet rehberliri axbarat erkinlikini boqquchilar

Chégrisiz muxbirlar teshkilati herqaysi döletlerdiki bolupmu xitaydiki muxbirlarning teqdirige yéqindin köngül bölüp kelmekte. Mezkur teshkilatning torbetliride, xitay dölet rehberliri axbarat erkinlikini boqquchilar dep körsitilgen.

Parijda turushluq xitay démokratik frontining mes'uli chey zunggo ependi xitay hökümitining chégrisiz muxbirlar teshkilati teripidin échilghan xitay yéziqidiki torbetni taqiwetkenliki heqqide toxtilip, mundaq dédi : " xitay hökümiti chégrisiz muxbirlar teshkilatining xizmitidin ezeldin narazi bolup kelgen. Mesilen, bu yil birinchi ayda, chégrisiz muxbirlar teshkilati alahide xitayni ziyaret qilip,xitayni axbarat erkinlikige yol qoyushqa ündeshni meqset qilghan. Uchaghda xitay hökümiti bir qisim wedilerni qilghan. Lékin u wediler peqet bir bölüm qamaqtiki tordashlarni qoyup bérish bolup, emeliyette shu wedisinimu orundimighan."

Chey zunggo ependi yene sözini dawamlashturup, "démek chégrisiz muxbirlar teshkilati bilen xitay otturisidiki munasiwet nahayiti jiddiy bir halette bolmaqta. Méning bilishimche, bundin ilgiri xitay hökümiti mezkur teshkilatning in'gilizche wa fransuzche tor betlirini taqiwetken. Chégrisiz muxbirlar teshkilati bu qétim achqan xitay yéziqidiki tor bette, xitay hökümitini muxbirlarni qolgha élish, tor betlerni xalighanche taqiwétish, gézit -jurnallarni neshrdin toxtitip qoyush qatarliq mezmunlarda xitay hökümitini tenqidligen nurghun maqaliler bar iken. Xitay hökümiti bundaq mezmunlarni körse, elwette chidap turalmaydu . Lékin ular hazirche mezkur tor betni tosuwatqanliqi bilen, chégrisiz muxbirlar teshkilatining qattiq naraziliqi we taqabil turushi netijiside, uzun'gha qalmay, öz abroyini dep bolsimu , bedel tölishi mumkin," déydu.

Xitay, xelqning köp uchurlardin xewerdar bolup qélishidin qorqidu

Ziyaritimizni qobul qilghan chey zunggo ependi söhbet jeryanida yene, xitay hökümitining yéqinqi yillardin buyan intérnét tor betlirini barghanséri qattiq kontrol qilishidiki seweb, xitayda mewjut bolup turuwatqan ijtima'iy we siyasiy mesililerning yildin ‏- yilgha küchiyip kétiwatqanliqidin - dep tekitlep " bundaq bolghandin kéyin, ular öz xelqining bashqa jaylarda yüz bériwatqan weqelerdin xewerdar bolup qélishidin endishe qilidu, chünki ular xelqning bek jiq uchurlardin xewerdar bolup, axirida birdek qozghulup kétishidin bekmu qorqidu. Bolupmu hazir Uyghur éli we tibet rayonidiki weziyet nahayiti murekkep . Shunga xitay hökümiti bu ikki jaydiki axbarat erkinlikini téximu qattiq kontrol qilmaqta. Chunki ular tibet we Uyghur xelqining qozghulup kétishidin bekmu endishe qilidu" dep körsetti.

Chégrisiz muxbirlar teshkilatining 2006 ‏- yilliq dunya axbarat erkinlik tizimlikide, xitay dunya buyiche, axbarat erkinliki eng nachar dölet dep körsitilgen. (Méhriban)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet