تۈركىيىدە تۈرك دۇنياسى ژورنالىستلار مۇھاكىمە يىغىنى ئۆتكۈزۈلدى


2007-07-19
Share

دۇنيادىكى پۈتۈن تۈركىي مىللەتلەرنىڭ ئۆز - ئارا تونۇشۇشى ۋە ئۆز-ئارا مۇناسىۋەتلىرىنى كۈچەيتىش مەقسىتى بىلەن ھەريىلى تۈركىيىنىڭ يالوۋا شەھىرىدە ئۆتكۈزۈلۈۋاتقان تۈركىي مىللەتلەر مەدەنىيەت بايرىمىنىڭ 10-نۆۋەتلىكى ئۆتكۈزۈلدى. 7-ئاينىڭ 10-كۈنىدىن 19-كۈنىگىچە داۋام قىلغان بۇ مەدەنىيەت بايرىمى رامكىسى ئىچىدە تۈرك دۇنياسى ژورنالىستلار مۇھاكىمە يىغىنى ئۆتكۈزۈلدى.

بۇ مۇھاكىمىگە ئوتتۇرا ئاسىيا تۈركىي جۇمھۇرىيەتلىرى ۋە دۇنيانىڭ ھەرقايسى جايلىرىدىن كەلگەن تۈركىي مىللەت ژورنالىستلىرى قاتناشقان بولۇپ، ئىلمىي مۇھاكىمە يىغىنىدا تۈرك دۇنياسىدا خەۋەرلىشىش ۋە ئۇچۇر - ئالاقە، تۈرك دۇنياسىدا مائارىپ ۋە تىل، تۈرك دۇنياسىدا ئېنېرگىيە ۋە كەركۈك، تۈرك دۇنياسىنىڭ بىر - بىرىدىن كۈتىدىغان ئۈمۈتلىرى قاتارلىق تېمىلار مۇزاكىرە قىلىنغان. بۇ ئىلمى مۇھاكىمە يىغىن نەتىجىسىدە تۈرك دۇنياسى ژورنالىستلىرى كونفېرېنسىيىنىڭ ھەر يىلى ئۆتكۈزۈلۈشىگە قارار قىلىنغان ۋە تۈرك دۇنياسى ژورنالىستلىرى بىرلىكىنىڭ قۇرۇلغانلىقى ئېلان قىلىنغان. ئىلمى مۇھاكىمە يىغىنى ئاخىرىدا مەتبۇئات باياننامىسى ئېلان قىلىنغان بولۇپ، بۇ باياننامىدە تۈركىيە دۇچار بولىۋاتقان تېرورلوق ھۇجۇم ۋە ئىراق، ئۇيغۇر دىيارىدىكى تۈركىي مىللەتلەر دۇچار بولىۋاتقان بېسىم سىياسىتى ئەيىبلەنگەن.

تۈركىيىدە ئۆتكۈزۈلگەن بىرىنچى نۆۋەتلىك تۈرك دۇنياسى ژورنالىستلىرى كونفىرانسىنى ئۇيۇشتۇرغان تۈرك دۇنياسى ياش ژورنالىستلار بىرلىكى باشلىقى شەمسەتتىن كۈزەجى ئەپەندى بىلەن بۇ ئىلمى مۇھاكىمە يىغىنى ھەققىدە سۆھبەت ئېلىپ باردۇق.

12 دۆلەتتىن 19 ژۇرنالىست بۇ كونفېرېنسىيگە قاتناشتى. بۇ ژورنالىستلار ھەرقايسى تېلېۋىزىيە، گېزىت، ژۇرنال، رادىئولارنىڭ مۇخبىرلىرى ئىدى. تۈرك دۇنياسىدىكى ژورنالىستلارنى توپلاپ بۇنداق بىر ئىلمى مۇھاكىمە يىغىنىنى ئېچىش تۈرك دۇنياسىدىكى پۈتۈن مەدەنىي، سىياسىي ۋە باشقا پائالىيەتلەردىن بىر - بىرىنى خەۋەردار قىلىشنى مەقسەت قىلغان. (ئەركىن تارىم)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت