Türkiye armiyisi bash shitabi mu'awin bashliqi, quruqluq armiyisi qomandani orgéniral ilker bashbugh xitayda resmi ziyaret élip barmaqta

• Muxbirimiz erkin tarimning bu heqtiki toluq melumati
• Download story audio

Xitay mudapi'e ministiri saw gu'ang chu'en 6-ayning 4-küni béyjingda türkiye quruqluq armiyisi qomandani ilker bashbugh we hemrahliri bilen körüshti.

Türk génirali béyjingda

Saw gu'angchu'en xitay bilen türkiye arisida déplomatik munasiwet ornitilghandin buyanqi 36 yil mabeynide ikki dölet munasiwitining ijabiy halda tereqqi qilghanliqini, kéyinki yillarda ikki dölet arisida her sahediki ish birliklirining barghanséri chongqurlashqanliqini dégen.

Türkiye dölet téléwiziyisining xewirige qarighanda, saw gu'angchu'en yene, biz türkiyening bir junggo siyasiti we junggoning zémin pütünlikini qoghdash siyasitini qollighanliqini teqdirleymiz, dégen we xitay armiyisining ikki dölet munasiwetlirini küchlendürüshke teyyar ikenlikini ipade qilghan.

Türkiye quruqluq armiyisi bash qomandani orgéniral ilker bashbugh bolsa, türkiye bilen xitay dölitining siyasi, iqtisadiy we eskiriy sahede ish birliki ichide ikenlikini, türk armiyisining xitay armiyisi bilen bolghan munasiwetlerge ehmiyet béridighanliqini we ikki armiye otturisidiki dostluq munasiwitining dawamliq tereqqi qilishi üchün hesse qoshidighanliqini bildürgen.

Türkiye metbu'atlirida

Türkiye dölet téléwiziyisining xewiridin qarighanda yene, orgéniral ilker bashbugh sözide türkiye bilen xitayning dunya mesililirige bolghan köz qarashlirining bir - birige bekmu oxshiship kétidighanliqini ipade qilip: oxshash nuqtilarda turuwatimiz diyishke bolidu, ikki dölet uchrawatqan tehdit we xewpler bir - birige intayin oxshaydu, dégen. U yene özlirining xitayning kéyinki 20-30 yil ichidiki iqtisadiy tereqqiyatini zor bir heyranliq bilen teqip qiliwatqanliqini, buningdin bir dost dölet bolush süpiti bilen hem ghorurlan'ghanliqini ipade qilghandin kéyin ikki dölet munasiwetlirining tereqqi qilishida yuqiri derijilik emeldarlarning ziyaritining zor rol oynaydighanliqini dégen.

Junggo mudapi'e minisitiri sawmu özlirining dunyada muhim rolgha ige bolghan xitay we türkiye arisidiki munasiwetning tereqqiyatidin intayin memnun ikenlikini ipade qilip, munasiwetni téximu tereqqi qildurush üchün tirishidighanliqini dégen.

Mutexesislerning qarashliri

Türkiye armiyisi bash shitabi mu'awin bashliqi, quruqluq armiyisi qomandani orgéniral ilker bashbughnng xitaygha élip bériwatqan bu ziyaritining meqsiti zadi nime, bu ziyaretni qandaq chüshinish kérek? bu heqte köz qarishini élish üchün aldi bilen yawro'asiya stratégiye tetqiqat merkizi türkiye - xitay munasiwetliri mutexessisi sunali xanim bilen téléfon ziyariti élip barduq.

Sunali xanim bu ziyaretning ikki dölet otturisidiki normal bir eskiriy ziyaret ikenlikini éytip mundaq dédi: "xitay adette tashqi siyaset mesiliside bolupmu eskiriy ishlar bilen munasiwetlik mesililerde passip pozitsiyide bolup, hazirghiche peqet bir junggo siyasitini qollap kelgen döletlergila ochuq pozitsiye bildürüp kelgen. Türkiyenimu bir junggo siyasitini qollaydighan döletler arisigha alghan idi. Xitay bu ichi bosh bolghan mewjut munasiwetni dawamliq tereqqi qildurimiz, déyish bilenla qalghan."

Türkiye - xitay munasiwetliri mutexessisi dr. Erkin ekrem ependi türkiye bilen xitay otturisida uzun yillardin buyan bu xil eskiriy ziyaretlerning élip bériliwatqanliqini, emma buning normal bir ziyarettin bashqa bir nerse emeslikini tekitlidi. U yene, orgéniral ilker bashbughning ikki dölet uchrawatqan tehdit we xewpler bir - birige intayin oxshaydu, dégen sözni qandaq chüshinish kérek, dégen su'alimizgha mulahize yürgüzdi.

Dr. Erkin ekrem sözining axirida, gerche türkiye duchar boliwatqan p k k mesilisi bilen Uyghur mesilining xaraktéri oxshash bolmisimu, xitaylarning uni bir- birige baghlashqa tirishiwatqanliqini körsitip ötti. (Erkin tarim)