Türk ish birliki we tereqqiyat idarisi türkiy milletlerge yardem bérish yighini chaqirdi

• Ixtiyari muxbirimiz erkin tarimning bu heqtiki melumati
• Download story audio

Türkiye ish birliki we tereqqiyat idarisi 18 dölette wezipe ötewatqan wekillirini enqerege chaqirip yighin achti. Türk dunyasi ishlirigha mes'ul dölet ministiri béshir atalay bu yighinda türkiyining türk jumhuriyetliri we türkiy milletlerge 2006-yili qilghan yardemlirini xulase qilish, 2007-yilining pilanini otturigha qoyush üchün toplan'ghanliqini éyitti. Échilish murasimida söz qilghan dölet ministiri béshir atalay türkiye ish birliki we tereqqiyat idarisini küchlük türkiye jumhuriyitining küchlük yardem qurulushi haligha ekilidighanliqini we bu teshkilatning kélechektiki pilani üstide toxtilip mundaq dédi:

"Téximu küchlük bir türkiye üchün sirtta bolupmu ottura asiya türkiy jumhuriyetliri, seypurus, kafkasiye we balqanlarda, ottura sherqte bolsa pelestin, afghanistanda, yéngi bir noqtimiz bolghan afriqa döletliride türkiyining yardem küchini kücheytimiz. Bundaq qilghanda hem türkiyining siyasi küchige yardem bergen bolimiz, hem u yerlerdiki insanlarning turmush sewiyisining yuqiri kötürülüshige töhpe qoshqan bolimiz. Hemde u döletlerdiki xelqlerning türkiyige bolghan söygü muhebbitining artishini qolgha keltürgen bolimiz".

Türkiye ish birliki we tereqqiyat idarisi 1991-yili sowét ittipaqi parchilinip türkiy jumhuriyetler musteqil bolghandin kéyin qurulghan bolup, türkiy jumhuriyetlerge yardem qilish meqsiti bilen qurulghan idi. Kéyin, bu idare zoriyip, ottura asiya türkiy jumhuriyetliridin bashqa dunyaning herqaysi jaylirida yashawatqan türkiy milletler we musulmanlargha yardem qilidighan bir qurulush haligha keldi. Hazirghiche TIKA ning 18 dölette ish béjirish orni bar bolup, türkiy milletler bar bolghan rayonlardin peqetla Uyghur rayonida yoq. Ishenchlik menbedin alghan melumatqa qarighanda, türk ish birliki we tereqqiyat idarisi ürümchide ish béjirish orni échip Uyghurlargha yardem qilishni telep qilghan bolsimu, xitay hökümitidin jawap alalmighan. Buning sewebi nime? pütün dunyadiki türkiy milletler yashawatqan döletlerning hemmisi öz dölitidiki türkiy milletler bilen türkiyining munasiwitini yaxshilashqa tirishiwatqan künimizde xitay hökümitining ruxset qilmasliqidiki sewep néme? bu so'allarni chöridigen halda türkiye – xitay ishliri mutexessisis doktor erkin ekrem ependini ziyaret qilduq.