Түркийә дуч келиватқан п к к мәсилиси һәққидики учурлар


2007-11-01
Share

Йеқиндин буян, хәлқарада елан қилиниватқан хәвәрләрдә 'п к к мәсилиси' күндә дегидәк тилға елиниватиду. 'П к к' дегән 'курдистан ишчилар партийиси' дегәнниң енглизчә қисқартилмиси. Бу мәсилә һәққидә 'шинхуа агентлиқи' әң күп хәвәр бериватиду. Дунядики охшимиған учур вастилириниң охшимиған ноқтидин елан қилған учурлирини толуқ аңлаш мәсилини яхши чүшинишниң үчүн үнүмлүк усулидур.

Түркийә һазир 100 миң кишилик һәрбий қошунини ирақ чегрисиға топлап қойди

Хитайниң 'шинхуа агентлиқи' бүгүн 11 ‏- айниң 1 ‏- күни түркийә һәққидә елан қилған хәвәрдә "буниңдин бурун түркийиниң NTV хәвәрлиридә, 'п к к' ниң бузғунчилиқ қилишидин сақлиниш үчүн, түркийә ирақниң шималиға учидиған йолучи айрупиланини тохтитишни қарар қилди, дегән иди. Бүгүн түркийә баш министири рәҗәп тайип әр доған ираққа учидиған йолучи айрупиланни тохтитиш һәққидә қарар елинғанлиқини етирап қилмиди" дәп баян қилди.

'Шинхуа агентлиқи'ниң бу хәвиридә йәнә " түркийә һөкүмитиниң баянатчиси җәмил чечәк түнүгүн 'түркийә террорчиларға қарши пүтүн линийидә уруш қилишқа тәйяр' деди. Түркийә һазир 100 миң кишилик һәрбий қошунини ирақ чегрисиға топлап қойди" дәп баян қилди.

Түркийә һөкүмити 'п к к' гә қарита һәрбий, сиясий, депломатийә қатарлиқ һәммә саһәдә тәдбир қоллиниду

Б б с ниң бүгүн 11 ‏- айниң 1 ‏- күни түркийә һәққидә елан қилған хәвиридә "түркийә һөкүмити бүгүн 'п к к' чиларға иқтисадий җаза қоюшни қарар қилди" дәп хәвәр қилди. Б б с ниң бу хәвиридә баян қилинишичә, буниңдин бурун ирақ һөкүмитиму йол еғизлирида техиму көп тәкшүрүш понкити тәсис қилип 'п к к' ниң һәрикитини чәкләшкә киришкән.

Түркийә болса 'п к к' мәсилисни чегридин чиқип тәлтөкүс һәл қилишни арзу қилатти. Йеқинда 'п к к'ға зәрбә бериш үчүн һәрикәт башлиғандин кейин, америка тәрәп түркийини 'п к к' террочилириниң ирақтики паалийәтлири, җуғрапийилик орни қатарлиқ техиму муәййән учурлар билән тәминләйдиғанлиқини билдүрди. Түркийә ташқи ишлар министири али бабаҗан " түркийиниң 'п к к' ға қаратқан һәрбий һәрикити ираққа таҗавуз қилип киргәнлик әмәс, бу хәлқарада террорчилиққа қарши урушиниң бир қисми. Түркийә һөкүмити 'п к к' террорчилириға қарита һәрбий, сиясий депломатийә қатарлиқ һәммә саһәдә тәдбир қоллиниду' дегән.

Түркийидә 'п к к' һәққидә қарар мақулланғанда пайдисиз амилларму нәзәрдә тутулған

Буниңдин икки һәптә бурун, түркийә парламинтида, бир йилғичә чегридин чиқип курд тополаңчилирини тазилаш һәрбий һәрикити елип бериш қарари мақулланған иди. Б б с ниң баян қилинишичә, түркийә парламинтида мақулланған бу қарарға 550 нәпәр парламинт әзасидин аран 19 киши қарши аваз бәргән.

Түркийидә бундақ бир қарар мақулланғанда, пайдисиз амилларму нәзәрдә тутулған. Мәсилән: һазир ирақниң шималида 'милли һоқуқ' нами билән һәрикәт қиливатқан, барғансири күчийиватқан 'п к к' ни идарә қилишқа һазирқи ирақ һөкүмитиниң иқтидари йәтмәйду; ирақниң шималидики 'п к к' халиған вақитта түркийидә вәқә туғдуралайду; гәрчә түркийә кичик көләмлик һава һуҗуми қозғашқа маһир болсиму, әмма униң йәнила хәтири бар; түркийиниң зәрбә бериш һәрикити сәвәбидин ирақниң шималидики нефитликләрдә мәсилә чиқиш еһтимали бар, ундақ болса, америка, ирақ, иранму бу җедәлгә керип қалиду.

Түркийә техиму әстайидиллиқ билән муамилә қиливатқан йәнә бир мәсилә шуки, түркийә көп һалларда америкиниң ярдимигә муһтаҗ. Америка дөләт мәҗлисиниң бир комитети биринчи дуня урушида түркийидә өлгән әрминийләр мәсилисини 'миллий қирғинчилиқ' дәп әйиблигән иди. Әгәр түркийә 'п к к'ға зәрбә бериш мәсилисидә кеңәйтиветиш йүз бәрсила, америка-түркийә мунасивәтлири мурәккәплишип қалиду. Б б с ниң баян қилишичә, түркийә бу мәсилиләргә әстайидил муамилә қилмақта.

'П к к' хәлқаралиқ террорчилар тизимликидики партийә

Учур архиплириға қариғанда, 'п к к' дегән 'курдистан ишчилар партийиси' дегәнниң енглизчә қисқартилмиси. Бу партийиниң қораллиқ партизанлирини 1970 ‏- йилларда абдулла оҗалан тәшкиллигән. У 1999 ‏- йили тутулғанға қәдәр өзи рәһбәрлик қилған.

'П к к' ниң аң-пикир формиси маркисизм-ленинизм вә курд милләтчилики. Мәқсити түркийиниң шәрқий җәнуби, ирақниң шәрқий шимали, сүрийиниң шәрқий шимали вә иранниң ғәрбий шимали қисмидики җайларда курдистан дөлити қуруш. Әмма юқурқи дөләтләрниң һәммиси буниңға қарши туриду. П к к узундин буян 'тинч хәлқ арисида дәһшәтлик вәқә пәйда қилиш' шәкли арқилиқ өзиниң тәсирини кеңәйтиш вә мәқситигә йетиш усулини қоллинип кәлгәнлики үчүн, бу тәшкилатни америка, нато, явропа бирлики террорчилар тизимликигә киргүзгән иди. (Вәли)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт