Türkiye duch kéliwatqan p k k mesilisi heqqidiki uchurlar


2007-11-01
Share

Yéqindin buyan, xelq'arada élan qiliniwatqan xewerlerde 'p k k mesilisi' künde dégidek tilgha éliniwatidu. 'P k k' dégen 'kurdistan ishchilar partiyisi' dégenning én'glizche qisqartilmisi. Bu mesile heqqide 'shinxu'a agéntliqi' eng küp xewer bériwatidu. Dunyadiki oxshimighan uchur wastilirining oxshimighan noqtidin élan qilghan uchurlirini toluq anglash mesilini yaxshi chüshinishning üchün ünümlük usulidur.

Türkiye hazir 100 ming kishilik herbiy qoshunini iraq chégrisigha toplap qoydi

Xitayning 'shinxu'a agéntliqi' bügün 11 ‏- ayning 1 ‏- küni türkiye heqqide élan qilghan xewerde "buningdin burun türkiyining NTV xewerliride, 'p k k' ning buzghunchiliq qilishidin saqlinish üchün, türkiye iraqning shimaligha uchidighan yoluchi ayrupilanini toxtitishni qarar qildi, dégen idi. Bügün türkiye bash ministiri rejep tayip er doghan iraqqa uchidighan yoluchi ayrupilanni toxtitish heqqide qarar élin'ghanliqini étirap qilmidi" dep bayan qildi.

'Shinxu'a agéntliqi'ning bu xewiride yene " türkiye hökümitining bayanatchisi jemil chéchek tünügün 'türkiye térrorchilargha qarshi pütün liniyide urush qilishqa teyyar' dédi. Türkiye hazir 100 ming kishilik herbiy qoshunini iraq chégrisigha toplap qoydi" dep bayan qildi.

Türkiye hökümiti 'p k k' ge qarita herbiy, siyasiy, déplomatiye qatarliq hemme sahede tedbir qollinidu

B b s ning bügün 11 ‏- ayning 1 ‏- küni türkiye heqqide élan qilghan xewiride "türkiye hökümiti bügün 'p k k' chilargha iqtisadiy jaza qoyushni qarar qildi" dep xewer qildi. B b s ning bu xewiride bayan qilinishiche, buningdin burun iraq hökümitimu yol éghizlirida téximu köp tekshürüsh ponkiti tesis qilip 'p k k' ning herikitini chekleshke kirishken.

Türkiye bolsa 'p k k' mesilisni chégridin chiqip teltöküs hel qilishni arzu qilatti. Yéqinda 'p k k'gha zerbe bérish üchün heriket bashlighandin kéyin, amérika terep türkiyini 'p k k' térrochilirining iraqtiki pa'aliyetliri, jughrapiyilik orni qatarliq téximu mu'eyyen uchurlar bilen teminleydighanliqini bildürdi. Türkiye tashqi ishlar ministiri ali babajan " türkiyining 'p k k' gha qaratqan herbiy herikiti iraqqa tajawuz qilip kirgenlik emes, bu xelq'arada térrorchiliqqa qarshi urushining bir qismi. Türkiye hökümiti 'p k k' térrorchilirigha qarita herbiy, siyasiy déplomatiye qatarliq hemme sahede tedbir qollinidu' dégen.

Türkiyide 'p k k' heqqide qarar maqullan'ghanda paydisiz amillarmu nezerde tutulghan

Buningdin ikki hepte burun, türkiye parlamintida, bir yilghiche chégridin chiqip kurd topolangchilirini tazilash herbiy herikiti élip bérish qarari maqullan'ghan idi. B b s ning bayan qilinishiche, türkiye parlamintida maqullan'ghan bu qarargha 550 neper parlamint ezasidin aran 19 kishi qarshi awaz bergen.

Türkiyide bundaq bir qarar maqullan'ghanda, paydisiz amillarmu nezerde tutulghan. Mesilen: hazir iraqning shimalida 'milli hoquq' nami bilen heriket qiliwatqan, barghansiri küchiyiwatqan 'p k k' ni idare qilishqa hazirqi iraq hökümitining iqtidari yetmeydu؛ iraqning shimalidiki 'p k k' xalighan waqitta türkiyide weqe tughduralaydu؛ gerche türkiye kichik kölemlik hawa hujumi qozghashqa mahir bolsimu, emma uning yenila xetiri bar؛ türkiyining zerbe bérish herikiti sewebidin iraqning shimalidiki néfitliklerde mesile chiqish éhtimali bar, undaq bolsa, amérika, iraq, iranmu bu jédelge kérip qalidu.

Türkiye téximu estayidilliq bilen mu'amile qiliwatqan yene bir mesile shuki, türkiye köp hallarda amérikining yardimige muhtaj. Amérika dölet mejlisining bir komitéti birinchi dunya urushida türkiyide ölgen erminiyler mesilisini 'milliy qirghinchiliq' dep eyibligen idi. Eger türkiye 'p k k'gha zerbe bérish mesiliside kéngeytiwétish yüz bersila, amérika-türkiye munasiwetliri murekkepliship qalidu. B b s ning bayan qilishiche, türkiye bu mesililerge estayidil mu'amile qilmaqta.

'P k k' xelq'araliq térrorchilar tizimlikidiki partiye

Uchur arxiplirigha qarighanda, 'p k k' dégen 'kurdistan ishchilar partiyisi' dégenning én'glizche qisqartilmisi. Bu partiyining qoralliq partizanlirini 1970 ‏- yillarda abdulla ojalan teshkilligen. U 1999 ‏- yili tutulghan'gha qeder özi rehberlik qilghan.

'P k k' ning ang-pikir formisi markisizm-léninizm we kurd milletchiliki. Meqsiti türkiyining sherqiy jenubi, iraqning sherqiy shimali, süriyining sherqiy shimali we iranning gherbiy shimali qismidiki jaylarda kurdistan döliti qurush. Emma yuqurqi döletlerning hemmisi buninggha qarshi turidu. P k k uzundin buyan 'tinch xelq arisida dehshetlik weqe peyda qilish' shekli arqiliq özining tesirini kéngeytish we meqsitige yétish usulini qollinip kelgenliki üchün, bu teshkilatni amérika, nato, yawropa birliki térrorchilar tizimlikige kirgüzgen idi. (Weli)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet