Türkiye qoshuni kürd qoralliq unsurlirigha qattiq zerbe berdi

• Muxbirimiz erkin tarimning bu heqtiki toluq melumati
• Download story audio

Türkiye armiyisi 2-ayning 22-küni shimaliy iraqta uwa qurghan p k k térrorluq teshkilatigha qarshi keng kölemde eskiri hujum bashlatqan. Erkin Tarim

Türkiye armiyisi 2-ayning 22-küni shimaliy iraqta uwa qurghan p k k térrorluq teshkilatigha qarshi keng kölemde eskiri hujum bashlatqan idi. Bügün'giche bolghan 4 künlük hujumda türk armiyisi urush ayropilanliri bilen shimaliy iraqning chégrisining ichidiki p k k térror teshkilati ezaliri bar dep qaralghan 63 yerni bombardiman qilghan bolup, öltürülgen térroristlarning sani téxi éniq emes. Emma quruqluqta türk armiyisi bilen étishishta öltürülgen térrorist sani 153 bolup, bu jeryanda shéhit bolghan türk armiyisining sani 17. Höriyet gézitining 2-ayning 25-künidiki xewiride, türkiye armiyisining bu hujumdin qachqan pkk térror teshkilati ezalirining iran chégrisigha qarap qéchiwatqanliqigha, türkiyining bu heqte iran hökümitini agahlandurghanliqigha, iran hökümitining bu heqte tedbirni alghanliqini, térroristlarning iran'gha kirishige ruxset qilmaydighanliqini bildürgenlikige yer bérilgen.

Bu qétimqi keng kölemlik hujumgha bir tümendin artuq türk herbiy xadimi qatnashqan bolup, pkk térror teshkilatining muhim nuqtiliri bombardiman qilin'ghan. Shimaliy iraqqa birinchi bolup kirgen qoshun bügün türkiyige qaytti. 100 Herbiy mashinidin terkip tapqan qoshun 24-féwral küni axsham qar kiyimlirini kiygen halda, türkiye iraq chégrisigha jaylashqan chuqurjaning uzumlu yézisidiki herbiy rayonigha yétip keldi, türk téléwizyiliridiki körünüshlerge qarighanda türk armiyisining keypiyati intayin yuqiri idi.

Uzun yillardin béri türkiye iraq chégrisidiki p k k térrorist bazisigha keng kölemde eskiri hujum élip bérishqa temshelgen bolsimu, amérika we yawrupa döletliri bilen bu heqte hem pikir bolmighachqa élip baralmighan idi. Bu qétimqi bu eskiri hujumgha yawrupa döletliri we amérika qisqa muddetlik ruxset qilghan bolup, türk metbu'atlirida yer alghan xewerlerge qarighanda amérika türk armiyisining shimali iraqtin baldurraq chiqip kétishini telep qiliwatqan.

Höriyet gézitining 2-ayning 25-künidiki sanida adalet we tereqqiyat partiyisi mu'awin bashliqi reha denemech ependining bu heqte bergen bayanatigha yer bérilgen bolup, bayanatta mundaq déyilgen: "türkiye shimaliy iraqqa amérikidin sorimay turup herbiy hujum élip barsa, iraq eskiri bilen emes, amérika armiyisi bilen toqunushqa kirip qélishi mumkin. Amérika dunyadiki heddidin tashqiri chong dölet, türkiyining istratégiyilik ortiqi, ittipaqdash dölitimiz. Shunga amérika bilen bu heqte muzakire élip barghandin kéyin herbiy hujum bashlattuq."

Amérika qoshma shtatliri türkiyining kürd mesilisini siyasi jehettin hel qilishi kéreklikini tekitlep kelmekte. Höriyet gézitining 25-féwral künidiki sanida amérika mudapi'e ministiri robert geytesning bu heqtiki bayanatigha yer bérilgen. U türk armiyisining shimaliy iraqqa élip bériwatqan hujumining kürd mesilisini hel qilalmaydighanliqini, shunga bu hujumni qisqa waqit ichide axirlashturush kéreklikini, bu eskiri heriket bilen birlikte kürd mesilisini siyasi we iqtisadiy jehettin hel qilishqimu ehmiyet bérish kéreklikini tekitligen. Amérika mudapi'e ministiri robért geytes hazir awstraliyige élip bériwatqan 3 künlük ziyariti jeryanida bu bayanatni bergen bolup, bayanatida yene amérikining türk armiyisi shimaliy iraqqa kirishtin burun, iraq hökümitige yolyoruq bergenlikini, amérikining pkk térror teshkilati heqqidiki bezi melumatlarni türk armiyisige bergenlikinimu eskertip ötken.

Amérika, iraq hökümiti, shimaliy iraq kürd rayonining rehberliri türk armiyisining bu hujumini baldurraq axirlashturup chiqip kétishini telep qiliwatqan bolsimu, türk hökümiti bayanatchisi jémil chichek ependi, 24-féwral küni muxbirlargha bergen bayanatida, türk armiyisining bu keng kölemlik hujumini qayta qayta muzakire qilish netijiside bashlan'ghanliqini, shimaliy iraq chégrisidiki térroristlarni tel töküs tazilamastin türk armiyisining hergiz u yerdin chékinip chiqmaydighanliqini, türk hökümiti we 70 milyon türk xelqining türk armiyisini ching yürektin qollap quwetleydighanliqini éytti. Bügün türkiye armiyisi bash shitabi muxbirlargha bergen bayanatida, türk armiyisining shimaliy iraqqa élip bériwatqan eskiri hujumining pilan boyiche muweppeqiyetlik élip bériwatqanliqini éytti. (Erkin tarim)