Türkiye énérgiye ministiri tanér yildiz sherqiy türkistan teshkilatigha kélip Uyghurlar bilen héytlashti

Türkiye énérgiye we tebi'iy bayliqlar ministiri tanér yildiz ependi bilen qeyseri qojasinan rayonluq hökümetning bashliqi békir yildiz ependi bashchiliqidiki bir hey'et 9 - ayning 11 - küni , yeni rozi héytning 3 - küni qeyseri sherqiy türkistan medeniyet we hemkarliq jemiyitige kélip Uyghurlar bilen héytlashti.
Muxbirimiz erkin tarim
2010.09.13
Turk-ministiri-Qeyseri-Uyghur-wexpide-Siyit-Tumturk-305 Türkiye énérgiye ministiri tanér yildiz ependi bashchiliqidiki bir heyet 9 - ayning 11 - küni, qeyseri sherqiy türkistan medeniyet we hemkarliq jemiyitige kélip uyghurlar bilen héytlashqan bolup, sürette, ministir tanér yildiz ependi, dunya uyghur qurultiyi muawin reisi séyit tümtürk ependi we uyghur jamaiti bilen birge.
RFA Photo / Erkin Tarim

Ministir tanér yildiz ependi sherqiy türkistan teshkilatining ishxanisidiki héyt dastixanigha daxil bolup, rozi héyt üchün teyyarlan'ghan nazu - németlerge éghiz tegdi, kéyin sehnige chiqip söz qildi. U özining sherqiy türkistan medeniyet we hemkarliq jemiyitige kélishidiki sewebler üstide toxtalghandin kéyin, pütün dunyadiki Uyghurlarning roza héytini tebriklidi.

Tanér ependining sözi axirlashqandin kéyin, biz "uningdin türkiye bash ministiri rejep tayyip erdoghan, re'is jumhuri abdullah gül we siz Uyghurlarni ziyaret qilip ulardin hal soridinglar, buningdin Uyghurlar intayin xursen boldi. Emma türkiye rabiye qadir xanimgha téxighiche wiza bermidi, bu heqte birer yéngiliq barmu? " dep sorighinimizda, u so'alimizdin özini chetke élip éniq bir jawab bermidi.
Turk-ministiri-Qeyseri-Uyghur-wexpide-mihman-Siyit-Tumturk-305
Türkiye énérgiye ministiri tanér yildiz ependi bashchiliqidiki bir heyet 9 - ayning 11 - küni, qeyseri sherqiy türkistan medeniyet we hemkarliq jemiyitige kélip uyghurlar bilen héytlashqan bolup, sürette, ministir tanér yildiz ependi uyghurning héytliq dastirxéni üstide.
RFA Photo / Erkin Tarim
 
Biz u küni tepsili ehwalni igilesh üchün neq meydan'gha téléfon qilduq.
   
Türkiye énérgiye we tebi'iy bayliqlar ministiri tanér yildiz we qojasinan rayonluq hökümetning bashliqi bekir yildizning sherqiy türkistan medeniyet we hemkarliq jemiyiti ishxanisida Uyghurlar bilen héyitlishish murasimida aldi bilen dunya Uyghur qurultiyi mu'awin re'isi séyit tümtürk ependi söz qilip mundaq dédi:
   
"Ministirimizning teshkilatimizgha héytlap kélishi, türkiye jumhuriyiti dölitining sherqiy türkistanliq qérindashlirini qollap - quwwetleydighanliqining, héch bir zaman qérindashlirini yalghuz tashlap qoymaydighanliqining ipadisi. Qojasinan rayonluq hökümetning bashliqi békir yildiz ependining sherqiy türkistan dawasini türkiyide tonutush jehettiki töhpisi intayin chong. Men bu yerde uninggha alahide rehmet éytimen. Men ularning hés qilghanlirini ipade qilishi üchün ularni sözge teklip qilimen."
   
Qeyseri qojasinan rayonluq hökümetning bashliqi bekir yildiz ependi Uyghurlarning héytini mubareklep mundaq dédi:
   
"Men aldi bilen hemminglarning roza héytinglarni tebrikleymen. Bu yerde siler unutmaydighan bir nerse bar. Jiddide, medinede, istanbulda we dunyaning bashqa jaylirida 1960 - yillarda xitay zulmidin qéchip chiqqan köp sanda Uyghurlar bar. Ular bir mehellige jaylishalmighachqa sherqiy türkistan dawasini dunya sehnisige élip chiqish küchini yoqutup qoydi. Bashqa döletlerde yashawatqan Uyghurlarning köpi jan béqishning koyigha chüshüp kétip öz dawasidin uzaqliship ketti. Silerning bir ewzellikinglar bar. Deslepte bu yerge 100 etrapida a'ile kélip jaylashqan idinglar, hazir bala - chaqiliringlar bilen qoshulup téximu köpeydinglar. Silerde birlik we ittipaqliq bar, buni qoghdash bizning wezipimiz. Chünki, silerning bu ittipaqliqinglardin küch - quwwet we milli inqilab meydan'gha kelmekte. Méning bilishimche dunyaning héchqandaq yéride silerge oxshash sherqiy türkistan dawasi üchün dawamliq jurnal chiqirip, sherqiy türkistan dawasini dawamliq halda kün tertipke élip kéliwatqan bashqa bir merkez yoq. Shuning üchün silerning hemminglarning bu mehellide birlikte yashishinglar intayin muhim. Shunga bu ittipaqliqni buzidighan ishlardin uzaq turishinglarni, heqliq dawayinglarni dawamliq halda élip bérishinglarni tileymen. Eng axirida pütün dunyadiki we sherqiy türkistandiki Uyghur qérindashlirimning roza héytini tebrikleymen."
   
Kéyin, türkiye énérgiye we tebiy bayliqlar ministiri tanér yildiz ependi söz qildi. U mundaq dédi:
   
"Sherqiy türkistanliq qérindashlirim, aldi bilen silerge hörmet bildürüp sözümni bashlaymen. Roza héytinglargha mubarek bolsun. Siler bilen birlikte bolghanliqim üchün intayin xursen bolghanliqimni ipadilimekchimen. Silerning mehellenglerge kélishimde mundaq ikki türlük sewep bar. Birinchisi silerning héytinglarni tebriklesh we siler bilen mungdishish. Ikkinchi seweb bolsa, ete yeni 9 - ayning 12 - küni türkiye boyiche asasiy qanunning bezi maddiliri özgertilsunmu özgertilmisunmu dep ray sinash élip bérilmaqchi. Siler burunla asasiy qanunning özgertilishini yaqilaydighanliqinglarni bayan qildinglar, buninggha rehmet éytish üchün keldim. Biz türkiyining tereqqiyati üchün qolimizdin kelgenni qiliwatimiz, siler bilen birlikte küchlük bir türkiye qurup chiqish üchün tirishimiz. Men ministir bolush süpitim bilen silerning qoshqan töhpengler üchün rehmet éytimen."
   
Türkiye énérgiye we tebi'iy bayliqlar ministiri tanér yildizning nutqi axirlashqandin kéyin, biz uninggha dunya Uyghur qurultiyi re'isi rabiye qadir xanimning türkiyige kélish wizasi heqqide so'al soriduq.

Bizning, "hörmetlik ministir siz ministir bolushtin burunmu Uyghur mehellisige kélettingiz, ministir bolghandin kéyinmu ularni unutmidingiz. Türkiye re'is jumhuri abdullah gülmu Uyghurlarning öyige kélip hal soridi. Emma rabiye qadir xanimgha türkiye téxighiche wiza bermidi, bu heqte bir yéngiliq barmu? " dégen so'alimizgha ministir tanér yildiz ependi mundaq jawab berdi:
   
"Biz her da'im Uyghur qérindashlirimiz bilen bille. Biz weziyetning éhtiyajigha qarap qandaq yardem qilishimiz kérek bolsa shundaq qiliwatimiz. Pütün sherqiy türkistanliq qérindashlirimning héytini tebrikleymen. Xudadin silerning salametlik ichide köplep héyt we bayram ötküzishinglarni tileymen."

Yuqiridiki awaz ulinishidin, bu heqtiki melumatimizning tepsilatini anglaysiler.

 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.