Büyük birlik partiyisi bashliqi muhsin yaziji'oghlu sherqiy türkistan teshkilatini ziyaret qildi


2007-03-12
Share

Türkiye büyük birlik partiyisi bashliqi muhsin yaziji'oghlu bashchiliqidiki bir hey'et qeysiridiki sherqiy türkistan medeniyet we hemkarliq jem'iytini ziyaret qildi.

Türkiye büyük birlik partiyisi bashliqi muhsin yaziji'oghlu bashchiliqidiki bir hey'et qeysiridiki sherqiy türkistan medeniyet we hemkarliq jem'iytini ziyaret qildi. Ziyaretchiler arisida büyük birlik partiyisi mu'awin bashliqi sabiq parlamént ezasi uzeyir tunch, okkesh shemdinler, hesen hüseyin boz'oq qatarliq kishilermu bar idi. Bularni qeysiridiki Uyghur mehellisining kirishide chong kichik bolup yüzge yéqin Uyghur qizghin kütüwaldi. Jem'iyet binasigha yétip kelgen muhsin yaziji'oghlu bu qétimqi ziyariti üstide toxtilip mundaq dédi:

"Ata yurtimizdin chiqip türkiyige kelgüche bolghan ariliqtiki sürgünluk hayatida japa chekken, yollarda ölüp ketken qérindashlirimizgha, eysa yüsüp aliptékin we osman baturgha allahtin rehmet tileymen. Erkinlik, türklük yolida hayatini bergen, istiqbalini qurban qilghan pütün mujahitlirimizge allahtin rehmet tileymen, ulargha shükri sana qilimen. Elwette türkiyide ay yultuzluq qizil bayraqning himayiside bolushtin özenglerni bextlik hés qilisiler, bizmu hem shundaq. Emma sherqiy türkistan dawasi, sherqiy türkistan mesilisi yéterlik derijide kün tertipke kelmeywatidu. Dawagha pütün türk dunyasimu ehmiyet bermeywatidu. Siler uzaq diyarlarda bu dawani sürdürüshke tirishiwatisiler. Biz bu dawayinglarni türkiye büyük birlik partiyisi bolush süpitimiz bilen qollap quwwetleymiz. Biz her da'im silerning yéninglarda. Men sherqiy türkistan teshkilatlirining mes'ullirigha dawamliq shuni tekitlewatimen. Sherqiy türkistan dawasida yash, yétishken, qabiliyetlik kishilerge éhtiyaj bar. Ulargha köp wezipe chüshidu. Teshkilatinglar pütün küchi bilen muwapiqiyetlik bir shekilde sherqiy türkistan mesilisini türk jama'etchilikige anglitiwatidu. Men silerni yene bir qétim tebrikleymen, biz bir chong yighin üchün qeysirige kelgen iduq. Silerge bolghan hésdashliqimizni bildürüsh üchün teshkilatinglargha partiyimizning rehberliri bilen birlikte kelduq. Qizghin qarshi alghanliqinglar üchün silerge rehmet éytimen".

Büyük birlik partiyisi bashliqi muhsin yaziji'oghluning sözi axirlashqandin kéyin dunya Uyghur qurultiyi mu'awin re'isi, sherqiy türkistan medeniyet we hemkarliq jem'iyiti bashliqi séyit tümtürk ependi söz élip mundaq dédi:

"Hörmetlik bashliq, siz partiyingizning mes'ulliri bilen birlikte jem'iytimizni ziyaret qilip sherqiy türkistan xelqini xursen qildingiz. Biz sizni kichikimizdin tartip bilimiz. Siz héchqachan qilchilik tewrimestin sherqiy türkistan dawasini qollap quwwetlep keldingiz. Biz buni teqdirleymiz. Burunqi hökümetler xitay bilen bolghan munasiwette xata siyaset élip bérip Uyghur mesilisige sel qaridi. Türk millitining tarixtin buyan mezlumlargha yardem qolini uzutup kelgen bir millet bolush süpiti bilen bundin kéyinki tashqi siyasitide Uyghur mesilsige köngül boldidighanliqigha ishenchimiz kamil. Bolupmu türkler bilen tili bir, dini bir, köki bir Uyghur xelqige xitaylar teripidin élip bériliwatqan bésimgha türkiyening itiraz bildürüshini ümit qilimiz. Siz we partiyingiz burundin tartip sherqiy türkistan mesilisige köngül bölüp keldinglar. Bolupmu 1995- 1999-yilliri arisida türkiye parlaméntigha kirgen waqtinglarda, xitayning bésimigha qarimastin sherqiy türkistan mesilisini türkiye parlaméntining kün tertipige ekeldinglar. Hetta 1998-yili dunya Uyghur yashliri qurultiyi enqerede chaqirilghanda dunyaning herqaysi yerliridin kelgen Uyghur wekillerni parlaménttiki ishxaningizda qobul qilip ularning derdini anglighan idingiz. Biz silerning bu qétimqi saylamda utup chiqip türkiye parlaméntige kirip Uyghur mesilsini parlaméntning kün tertipige qoyushunglarni ümit qilimiz. Bu qétimqi qeysiri ziyariti jeryanida sizning alahide waqit chiqirip teshkilatimizgha kélip bizdin hal sorishingiz buyerdiki Uyghurlarni nahayiti xursen qildi. Men pütün sherqiy türkistanliqlar namidin sizge rexmet éytimen. (Erkin tarim)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet