Хәлқаралиқ мәһмут қәшқири һекайә мусабиқиси рәсмий башланди

2008 - Йилиниң мәһмут қәшқири туғулғанлиқиниң 1000 - йиллиқи мунасивити билән түркийә явроасия язғучилар җәмийити хәлқаралиқ мәһмут қәшқири һекайә йезиш мусабиқиси өткүзмәкчи. Бу мусабиқә явроасия язғучилар җәмийитиниң риясәтчиликидә, әзәрбәйҗан, русийә федератсийиси, хитай, ирақ, иран, қазақистан, қирим, қирғизистан, өзбекистан, татаристан, түркмәнистан, гретсийә вә балқан дөләтлиридә нәшир қилиниватқан әдәбият җурналлири вә язғучилар җәмийәтлири билән һәмкарлашқан һалда елип берилидикән.
Мухбиримиз әркин тарим хәвири
2008-04-11
Share
Muxmut-qeshqeri-150
Мәхмут қәшқири йилиниң симоволи.
 Бу мусабиқә үчүн әвәтилгән мақалилар 17 кишидин тәркип тапқан баһалаш һәйити тәрипидин баһалинидиған болуп, һекайиси биринчи болуп баһаланған кишигә 6000 явро, иккинчигә 4000 явро, үчинчи болуп баһаланған кишигә болса 2000явру мукапат берилидикән. Илһамландуруш мукапатиға еришкән үч кишигә 1000 явродин пул берилидикән.

    Бу мусабиқиға қатнашқучилар диққәт қилишқа тегишлик ишлар:
1.    Мусабиқиға қатнишишни халиғанлар һекайилирини почта яки електронлуқ почта арқилиқ әвәтсә болидикән.
2.    Мусабиқиға қатнишидиған мақалилар елан қилинмиған мақалилар болуши керәк икән.
3.    Һекайини халиған темида йезишқа болидикән.
4.    Мақалә 30-35 миң сөздин тәркип тапқан болуши керәк икән.
5.    Мақалидә апторниң румузи йезилған болуши, исми яки адреси йезилмаслиқи керәк икән.
6.    Мусабиқиға қатнашқучи румузини, адресни, қисқичә тәрҗимһалини, бир парчә рәсимини айрим бир липапиға  қоюп төвәндики адресқа әвәтиши керәк икән.
7.    Мақалини қәғәзгә 6 нусха яздуруп "с д" гә елип әвәтиши керәк икән.
8.    Мусабиқиға әвәтилгән мақалилар, топлам қилип нәшир қилинип тарқитилидикән.

 Хәлқаралиқ мәһмут қәшқири һекайә мусабиқисиниң баһалаш һәйити әзәрбәйҗанлиқ даңлиқ язғучи анар, балқан дөләтлиридин зәйнәл бәксач, ирақтин омәр қазанчи, қазақистандин фадил али, қирғизистандин әгәнбәрди аскаров, өзбекистандин таһир қаһар, түркийидин шаир али ақбаш, түркмәнистанлиқ даңлиқ язғучи ораз яғмур, уйғур дияридин йүсүпҗан ясин қатарлиқ кишиләрдин тәркип тапқан.

Хәлқаралиқ мәһмут қәшқири һекайә мусабиқини өткүзүштики мәқсити һәққидә тәпсили мәлумат елиш үчүн явроасия язғучилар җәмийити башлиқи яқуп делиөмәроғли әпәнди билән сөһбәт елип бардуқ.

Явроасия язғучилар җәмийити башлиқи яқуп делиөмәроғли әпәнди хәлқаралиқ мәһмут қәшқири һекайә мусабиқини өткүзүштики мәқсити үстидә тохтилип мундақ деди: "
Сизгиму мәлум болғинидәк 2008 - йили мәһмут қәшқири туғулғанлиқиниң 1000 - йили. Унәскому 2008 - йилини `мәһмут қәшқири йили` дәп елан қилди. Бизму 2007 - йилиниң ахирида 2008 - йилини `мәһмут қәшқири йили` дәп қарар қилған идуқ. Түркий тиллар дивани түркий милләтләр үчүн наһайити муһим бир әсәр. Шуңа 2008 - йили пүтүн түрк дуняси үчүн наһайити муһим бир йил. Биз бу йил мунасивити билән хәлқаралиқ мәһмут қәшқири һекайә мусабиқиси өткүзүшни мувапиқ көрдуқ."

Яқуп делиөмәроғли әпәнди уйғурлар бу мусабиқиға қандақ қатнишалайду дегән соалимизға җаваб берип мундақ деди: "һәр бир түркий миллити үчүн айрим бир баһалаш һәйити қуруватимиз. Бу техи қурулуп болмиди. Түркийә, әзәрбәйҗан, қирим қатарлиқ йәрләрдә мақалини баһалаш гурупписини қуруп болдуқ, әмма уйғур районида техи қуруп болалмидуқ. Әң қисқа вақит ичидә буни қуримиз. Уйғурчә мақалә язған кишиләр алди билән уйғур баһалаш гурупписиға мақалисини әвәтиду. Бу мақалиларни баһалап 1 - 2 - 3 - болғанларни бизгә билдүриду. Биринчи болған киши һәрқайси түркий милләтләрдин биринчи болғанлар билән селиштурулиду. Буларниң ичидә дәриҗигә кирәлисә мәһмут қәшқири һекайә йезиш мусабиқиси мукапатиға еришәлмәйду. Уйғурлар арисидики мусабиқида дәриҗигә киргәнләргиму пул мукапати берилиду."

Уйғур дияридики қайси идарә билән һәмкарлишиватисиләр дегән соалимизға җаваб бәргән яқуп делиөмәроғи техи музакирә елип бериливатқанлиқини ейтип мундақ деди: "
Бир журнал билән алақә орнитиватимиз. Техи ениқ болмиғачқа исмини демәй турай. Уйғур тилида йезилған мақалиларни баһалаш гурупписини шәрқий түркистанда қуруп мусабиқиға әвәтилгән мақалиләрни у йәрдә баһалимақчи."

Яқуп делиөмәроғли әпәнди бизгә бәргән мәлуматида, бу мусабиқиға пәқәтла түркий милләтләрниң әмәс, пүтүн милләтләрниң қатнишалайдиғанлиқини, түркчә мақалә язғанларниң түркийидики явруася язғучилар җәмийитигә әвәтиши керәкликини ейтти. Түркчә мақалә язғанларниң мақалисини әвәтиш вақти 7 - айниң 30 - күнигичә болуп, нәтиҗә 2008 - йили 8 - айниң 30 - күни елан қилинидикән.

 Түркчә һекайә язғанлар яки бу мусабиқә һәққидә тәпсили мәлумат елишни халиғанлар төвәндики адрес билән алақә қурса болиду.

Җәйһун атиф кансу җаддәси 45 - сокак 13/2 балгат анкара, түркийә телефон 90 - 312 - 287 80 43

Тор бети адреслири: www.ayb.org.tr Вә www.kasgarlimahmut.org Ел - хәт : kh1000hy@gmail.com  
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт