Türkiyide oqush püttürgen Uyghur oqughuchilar diplomilirini ministirning qolidin aldi

2009 - Yili 5 - ayning 9 - küni maarip ministirlikining chong zalida ötküzülgen oqush püttürüsh murasimida, türkiye jumhuriyiti milliy maarip ministiri nimet chubuqchu xanim sözde, shundaqla, bashqa paaliyetlerdin körünüshler.

5 - Ayning 9 - küni ma'arip ministirlikining chong zalida ötküzülgen bu oqush püttürüsh murasimida aldi bilen, bu ish pilani tonushturulghan höjjetlik filim korsitildi. Bu höjjetlik filimde hazirghiche türkiyide uniwérsitét püttürgen türkiy milletlerdin kelgen oqughuchilarning sanining 5000 ikenliki, hazirghiche türk uniwérsitétlirigha kirgen oqughuchi sanining 7500 ikenliki anglitildi.

Kéyin türkiye jumhuriyiti milliy ma'arip ministiri nimet chubuqchu xanim, ministir bolghandin kéyinki tunji nutqini bundaq menilik bir murasimda qilghanliqi üchün özini intayin bexitlik his qiliwatqanliqini anglitip mundaq dédi: "bundaq menilik bir künde aranglarda bolghanliqim üchün intayin xursen boldum. Hemminglerge ching könglümdin hörmet bildürimen. Men ministir bolghandin kéyin qatnashqan tunji yighinning bundaq menilik bir yighin bolushimu méni intayin xursen qilghanliqini tekitlimekchimen. 1992 - Yili bashlitilghan türkiy milletlerdin oqughuchilarni türkiyige ekilip oqutush ish pilani yéngi musteqil bolghan türkiy jumhuriyetlerge we türkiy milletlerge ixtisasliq kishilerni yétishtürüp bérishte intayin muhim rol oynash bilen birge, bir tughqan türkiy milletlerning öz'ara chüshinishide intayin muhim rol oynimaqta."

Nimet chubuqchu xanim türkiy milletlerdin oqughuchi oqutush ish pilanidin 57 dölettin kelgen oqughuchilarning paydiliniwatqanliqini anglitip mundaq dédi: "bu ish pilanidin bügün'giche sansiz oqughuchilar paydilandi. Buningdin paydiliniwatqan dölet we rayonlarning sani hazir 57 ge chiqti. Biz türkiye jumhuriyiti döliti bolush süpitimiz bilen bu ish pilanigha alahide ehmiyet bériwatimiz. Siler kélechekte türkiy milletler arisidiki köwrüklük wezipisini öteysiler. Hemminglerning buningdin kéyinki hayatinglarda muweppeqiyetlik bolushinglarni tileymen."

Kéyin exmet yésiwi uniwérsitéti naxsha - ussul ömiki oyun qoyup, qirghiz, Uyghur, qazaq azerbayjan we türk naxsha - ussulliridin nemuniler körsetti.

Türkiye ma'arip ministirliki bu yil oqush püttürgen oqughuchilarning ata - anilirinimu oqush püttürüsh murasimigha teklip qilghan bolup, ularni sehnige teklip qilip, ministir nimet chubuqchu ulargha bir yürüsh sowghatlar berdi.

Kéyin türkiye dölet ministiri nimet chubuqchu xanim 22 dölettin kelgen türkiy millet oqughuchilarning diplomlirini öz qoli bilen tarqatti.

Biz oqush püttürüsh murasimi axirlashqandin kéyin, mikrofonimizni yéngi oqush püttürgen oqughuchilarning ata - aniliri we oqughuchilargha uzattuq.

Yuqiridiki awaz ulinishidin, bu heqtiki melumatimizning tepsilatini anglaysiler.