Түркмәнистан йеңи президенқа игә болди


2007-02-14
Share

Түркмәнистанниң йеңидин сайланған президенти қурбангүл бәрдимуһәммәдоп 14 – феврал күни түркмәнистан пайтәхти ашабадта қәсәм берип вәзипә тапшурувелиш мурасимида. AFP

14- Феврал күни ашхабад шәһиридә дағдуғилиқ қәсәм бериш мурасими өткүзүлүп, түркмәнистан мәркизий сайлам комитети қурбан 'гүл бәрдимуһәммәдопниң түркмәнистан җумһурийитиниң президенти болуп сайланғанлиқини җакарлиди.

Йеңи президент түркмән башиниң йолини давамлаштурмақчи

Русийә агентлиқлириниң учурлиридин қариғанда, бу йил 49 яшқа киргән қурбан' гүл бәрдимуһәммәдоп қәсәм бериш мурасимида түркмәнистан җумһурийитиниң асасий қануни тутуп туруп қәсәм бәргән. Арқидин түркмәнистанниң бәш областиниң қәбилә ақ сақаллири бирликтә сәһнигә чиқип, қурбан' гүл бәрдимуһәммәдопқа президентлиқ бәлгиси болған алтун зәнҗирни тәқдим қилип, униң бойниға асқан. Буниңдин башқа йәнә түркмәнләрниң адити бойичә, қурбан' гүл бәрди муһәммәдопқа қуран вә сабиқ президент сәпәр мурат ниязоп язған " роһнамә" намлиқ китаб шуниңдәк қилич һәм нан тәқдим қилинған.

Президент қурбан гүл бәрдимуһәммәдоп қәсәм бериш нутқи сөзләп, асасий қанунға қаттиқ риайә қилип, мәрһум президент сәпәр мурат ниязоп йәни түркмән баши башлиған ишларни давамлаштуридиғанлиқини билдүргән.

"Мән биринчи президент йәни улуғ сәрдаримизға охшаш хәлққә пайдилиқ сиясәтни давамлаштуримән, аһалиларни газ, електир, су, туз билән һәқсиз тәминләймән. Нан, бензин вә туралғу җайларниң баһаси әрзан болиду. " Дәйду йеңи президент.

У сөзидә бир қатар ислаһатларни елип баридиғанлиқини тәкитлигән болуп, маарип мәсилисидә тохтилип, һәр қайси җайларда алий мәктәпләрни көпәйтип оқуғучиларниң санини ашуридиғанлиқини, чәтәлләргә техиму көп оқуғучи әвәтип, юқири сәвийилик талант игилирини тәрбийиләйдиғанлиқини билдүргән шуниңдәк йәнә сақлиқни сақлаш саһәсини яхшилап, туралғу җай қурулушини тезлитидиғанлиқи, қатнаш әслиһәлирини яхшилайдиғанлиқи, аһалиларниң қол телефон вә интернәттин пайдилинишиға капаләтлик қилидиғанлиқи тәкитлигән.

Қурбан гүл бәрдимуһәммәдоп түркмәнистанниң ташқи сиясити һәққидә тохтилип, сәпәр мурат ниязоп тиклигән түркмәнистанниң битәрәплик сияситини давамлаштуруш билән биргә нефит вә тәбиий газ саһәсидики илгири түзүлгән келишимләрни күчкә игә қилип, өзара пайдилиқ һәм баравәрлик асасида дуняниң һәр қайси дөләтлири билән болған мунасивәтни раваҗландуридиғанлиқини билдүрди.

Б б с агентлиқиниң учуриға асасланғанда, президент қурбан' гүл бәрдимуһәммәдоп түркмәнистанда башқа партийиләрниң мәвҗут болушиға һәм интернәт алақилириға йол қойидиғанлиқини әскәрткән.

Хәлқара җәмийәт униң түркмәнистанда демократик ислаһат елип беришини үмид қилиду. Лекин, бу қетимқи сайлам бир қисим хәлқаралиқ көзәткүчиләр һәм туркмәнистан өктичилири тәрипидин демократик сайлам өлчәмлиригә хилап қилмишлар билән тәнқид қилинған.

Қәсәм бериш мурасимиға коп дөләт қатнашти

Қурбан' гүл бәрди муһәммәдопниң президентлиқ вәзиписини тапшурувелиш мурасимиға 30 нәччә дөләтниң рәһбәрлири вә дипломатийә вәкиллири иштирак қилған болуп, түркмәнистанниң әтрапидики дөләтләрдин иран президенти махмуд әхмәди ниҗат, қазақистан президент нурсултан назарбайев, грузийә президенти михаил сакашивили, афғанистан президенти һамид карзай, таҗикистан президенти емам әли рахманоп қатарлиқлардин башқа йәнә русийә баш министири михайил фрадкоп, түркийә баш министири тайип әрдоған қатарлиқлар қатнашқан.

Мурасимға америка қошма шитатлири тәрәптин ташқи ишлар министирлиқиниң оттура асия ишлири бойичә ярдәмчи министири ричард бавчәр иштирак қилған.

Шинхуа агентлиқиниң хәвәр қилишичә, хитай дөләт рәиси ху җинтав өзиниң алаһидә әлчиси супитидә хәлқ қурултийиниң муавин мудири исмаил әмәт башчилиқидики вәкилләр өмикини бу қетимқи қәсәм бериш мурасимиға әвәтип қатнаштурған.

Русийиниң 'хәвәрләр" агентлиқиниң учуридин қариғанда, түркмәнистан асасий қануни бойичә түркмәнистан президенти дөләтниң алий һоқуқдари болуп, президентлиқ муддити бәш йил болиду, охшашла вақитта йәнә президент дөләт қораллиқ күчлириниң алий қомандани вә министирлар кабинетиниң рәиси болуп һесаблиниду.

Қурбангүл бәрдимуһәммәдоп ким?

Түркмәнистан президенти қурбан' гүл бәрдимуһәммәдоп 1957-йили туғулған. 1979-Йили түркмәнистан тиббий университетиниң еғиз кесәлликләр факултетини пүттүргән болуп, кейин москвада тиббий илим бойичә доктурлуқ унвани үчүн оқуған. Көп йиллар тиббий саһәдә рәһбәрлик хизмәтлири елип барған болуп, 1997-йили сәһийә министири болған, 2001-йилидин етибарән туркмәнистан муавин баш министири һәм сәһийә министирилиқ вәзиписини ақтурған болуп, 2006-йили 12-айниң 21- күни президент сәпәр мурат ниязоп вапат болғандин кейин, туркмәнистан бихәтәрлик комитети тәрипидин вақитлиқ президентлиқ һәм алий қоманданлиқ вәзиписигә тәйинләнгән иди.

Сабиқ президент сәпәр мурат ниязоп дөләтни 21 йил башқурған болуп, у ғәрб дөләтлири тәрипидин диктаторлуқта сталин вә мав зедоңларға охшитилған. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт