Әзраилға техиму йеқин орун - түрмә вә зәһәрлик чекимлик ташлатқузуш орунлири

Йеқинда уйғур аптоном районлуқ әмгәк билән өзгәртиш вә мәҗбурий зәһәрлик ташлатқузуш тармақлири бирликтә, түрмә вә зәһәрлик чекимлик ташлатқузуш орунлиридәк әйдиз тарқилиш хәтири еғир җайларда, әйдиз юқум әһвалини тизгинләштә, башқуруш тәдбирлирини күчәйтиш һәққидә йиғин чақирған.
Өз мухбиримиз гүлчеһрә
2011.11.22
Uyg-eydiz-muhakime-305 Сүрәттә, "уйғур биз" тор бетиниң башқурғучилири әйҗишиң тәтқиқат орни билән бейҗиңда бир сөһбәт йиғини өткүзгән болуп, сүрәт, шу йиғиндин бир көрүнүш.
www.uighurbiz.cn Дин елинди, нәшир һоқуқи www.uighurbiz.cn Ниң.

Уйғур елидики мәлум мәҗбурий зәһәр ташлаш орнидин игә болушимизға қариғанда, зәһәр ташлаш орунлирида әйдизниң тарқилиш хәтири интайин еғир болуп, зәһәрдин йирақлишиш мәқсәт қилип қурулған бу орунлар әмәлийәттә зәһәр ташлаватқанларни әйдиз вирусиға йәниму йеқинлаштурмақта икән. Бу һәқтә мухбиримиз гүлчеһрә мәлумат бериду.

Дуня сәһийә тәшкилатиниң бу йил әйдизгә қарши дуняға қаратқан чақириқ шоари болса “ һәммә һәрикәткә келип нөлгә қарап илгириләйли” йәни әйдиз юқум әһвалида нөл, әйдиздин өлүш әһвалида нөл вә йәнә әйдизләрни кәмситиштә нөлни яритиш ғайисини әмәлгә ашуруш үчүн тиришишни мураҗиәт қилмақта.

Йеқинда уйғур елидики җамаәт хәвпсизлик тармақлири вә әмгәк билән өзгәртиш идарилири қармиқидики түрмә һәмдә зәһәр ташлаш орунлирида әйдизниң тарқилишни контрол қилишта әмәлий тәдбир елиш һәққидә йиғин чақирилған. Бу һәқтә уйғур аптоном районлуқ әмгәк билән өзгәртиш идарисиниң торида 22 - ноябир елан қилинған хәвәрдин мәлум болушичә, даириләр йиғинда уйғур елидә әйдиз тарқилишиниң алдини елиш тәшвиқати вә әйдизләрни давалаш хизмәтлирини күчәйтиштин башқа, әйдизниң түрмә вә зәһәр ташлаш орунлиридин җәмийәткә тарқитишиниң алдини елиш вә бу орунларда зәнҗирсиман тарқилишниң алдини елишта күчлүк тәдбир қоллинишқа тоғра келидиғанлиқини әскәрткән шундақла бу җәһәттә әмәлий қәдәм елишниң тәхирсизлики тәкитләнгән.

Уйғур аптоном районлуқ сәһийә назаритиниң 2010 - йили - 9 айда елан қилған статистикилик доклатини, уйғур елиниң әйдиз юқум әһвалиға даир әң ахирқи мәлумат дейишкә болиду. Униңда көрситилишичә, уйғур елидә 2010 - йилиниң алдинқи йеримиға қәдәр байқалған әйдиз юқумдарлири вә әйдиз бимарлириниң сани 32миң 532 нәпәр болуп, әйдиз сани җәһәттә хитай бойичә бәшинчи орунда туриду. Мәзкур доклатта гәрчә уйғур елидә йиллардин буян әйдиз тәшвиқатини күчәйтиш, әйдиз бимарлири вә юқумдарлирини давалаш җәһәтләрдә мәбләғ вә күч аҗритилип мәлум унум көрүлгән болсиму, әмма әйдиз тарқилиш каналлириниң 9 ға көпийип юқум вәзийитиниң йәнила җиддий икәнлики, хәлқниң әйдиздин мудапиәлинишкә болған тонуши, әйдиз вируси һәққидики чүшәнчисиниң йәнила төвәнлики, уйғур елидә техиму кәң даиридә юқумлинишниң алдини елишта йәниму әмәлий вә унунлүк тәдбир елишқа, техиму көп мәбләғ аҗритишқа, мәхсуслашқан давалаш вә мәслиһәт бериш орунлирини қурушқа тоғра келидиғанлиқи әскәртилгән иди.

Йеқинда төт хитайниң янфун вә ентернетта “ йигирмә миң шинҗаңлиқ әйдизләр пүтүн мәмликәттә йемәкликләргә әйдиз вируси бар қенини темитиш арқилиқ кәң даиридә әйдиз тарқатмақта” дегәндәк бимәнә ялған учурларни тарқитип, бир һаза сарасимә пәйда қилалишиниң өзиму, йәнила көп сандики инсанларниң әйдиз билимлиригә нисбәтән саватсиз икәнликиниң испати дейишкә болиду. Чүнки әйдизниң сперма, қан вә анидин балиға юқуштин ибарәт үч хил юқуш йоли бар шундақла әйдиз вирусниң тамақ, тамақ қачилири вә яки ичимлик арқилиқ юқмайдиғанлиқи испатлинип болған әқәллий әйдиз савади һесаблиниду.

Буниң алдида йәнә - 5 июл вәқәсидин кейинки үрүмчидә оттуриға чиққан йиңнә санҗиш вәқәлириниң шунчә юқири вә җиддий инкас қозғишиму, өз нөвитидә бир тәрәптин кишиләрдики әйдизгә болған чүшәнчиниң нәқәдәр төвән һәм хаталиқини испатлиған иди. Чүнки инсан үчүн дүшмән қанчә натонуш болса шунчә вәһимилик билиниду.

Гәрчә уйғур елидә елип бериливатқан әйдиз тәшвиқатлири җәмийәттә, нормал турмуш вә иҗтимаий һаятта әйдиз вируси юқтурувелиштин қандақ сақлиниш, әйдизләргә қандақ муамилә қилиш, әйдиз билән юқумланғанда қандақ қилиш дегәнләрни чөридәп елип бериливатқан болсиму, әйдиз вирусниң тарқилиш еһтимали вә хәтири әң еғир бир хилвәт җай болған түрмә вә зәһәр ташлаш орунлири әйдизниң тарқилишини контрол қилишта нәзәрдин сақит қилиниватқанлиқи мәлум. Әмәлийәттә болса түрмә вә зәһәр ташлаш орунлирида зәһәр чекиш вә башқа йоллар билән әйдиз вируси юқтурувалғанларму башқа зәһәр ташлиғучилар билән сәһийә вә тазилиқ тәдбирлири мукәммәл болмиған бир орунда охшаш муһитта турмақта, уларниң өз - ара юқумлиниш еһтимали әлвәттә адәттики инсанлар топидин юқири. Бу орунлардин әйдиз вируси юқтуруп җәмийәт яки аилисигә қоюп берилгәнләрдин җәмийәттә тарқилиш келип чиқиш еһтималиғиму сәл қарашқа болмайду.

Чүнки, уйғур елидә әйдиз юқумдарлириниң 70%тин көпрәки зәһәрлик чеким чәккүчиләр шундақла охшаш шпирс арқилиқ зәһәрни окул қилиш җәрянида юқтурувалғучилардур.

Уйғур елидики җамаәт хәвпсизлик даирилири башқурушиға тәвә бир зәһәр ташлаш мәркизиниң исмини ашкарилашни халимиған бир хадими зияритимизни қобул қилип, зәһәр ташлаш орунлиридиму, алдини елиш тәдбирлириниң мувапиқ әмәслики сәвәбидин кишиләрниң әйдиз вирусидин өз - ара юқумлиниш хәтириниң еғирлиқини билдүрди :

Әйдиз мутәхәссислири шуни тәкитләйдуки, әйдизниң алдини елишта әйдиз бимарлирини давалашни күчәйтиш, юқумдарларға ғәмхорлуқ қилиш, тарқилиш мәнбәсини үнүмлүк тизгинләш, тарқилиш йолини үзүп ташлап, муһапизәт қилиш кәспий қошуни қурулушини күчәйтиш керәк. Уйғур елидә әйдиз тарқилишиниң алдини елиш хизмитиниң әмәлийити болса мутәхәссисләрниң ейтқанлиридин наһайитиму йирақта икәнликини көрситип турмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.