Turpanda, ot apitide zor ziyan'gha uchrighuchi amma hökümetke naraziliq bildürdi

2007-11-01
Élxet
Pikir
Share
Print

TurpanOt-apet1-200.jpg
Jong shin tor béti, www.news.xmnext.com, Ning 2007 - yili 3 - ökebir xewirige qarighanda, Uyghur éli turpan shehirining yéngi tereqiyat soda sariyigha ot kétip, bir kichik bala ölgen, 25 dukan we resturanlar köyüp ketken. Süret, www.news.xmnext.com Betidin késip élindi. Photo: www.news.xmnext.com snap shot.

Turpandiki ammidin igilishimizche we yene radi'omizgha kelgen inkaslargha asaslan'ghanda , 11 - ayning 1 - küni chüshtin burun turpan sheher merkizige jaylashqan , yéngi tereqqiyat soda sariyi aldida texminen yüzligen amma naraziliq yighilishi élip barghan . Chüshtin kéyin bir yérim etrapida mezkur namayish herikiti saqchilar teripidin bésiqturulup, ikki neper Uyghur tutup kétilgen.

Weqening arqa körünüshi

Igilishimizche, 1 - noyabir peyshenbe küni turpan sheher merkizige jaylashqan eng awat soda saray hésablinidighan yéngi tereqqiyat soda sariyi aldigha yighilghan , asasliqi Uyghur tijaretchilerdin terkip tapqan namayishchi amma, bir nechche sa'etkiche topliship hökümetke naraziliq bildürgen.

Gerche turpan ammisining bu naraziliq herikiti ténich yol bilen dawam qilghan bolsimu , yenila uzun'gha qalmay hökümet da'iriliri hemde saqchilar teripidin tarqitiwétilgen hem bu jeryanda ikki neper kishi tutup kétilgen . Toluq bolmighan melumatlargha asaslan'ghanda tutup kétilgenlerning biri ayal iken.

Mezkur naraziliq herikitige shahid bolghuchi ammining bildürüshiche, bu naraziliq herikitige qatnashquchilar sekkiz yüzdin köprek bolup ,ular asasen , 3 - öktebir yéngi tereqqiyat soda sariyigha ot kétish weqeside dukanliri köyüp ,zor iqtisadiy ziyan tartqan ushshaq tijaretchi hem sodiger Uyghurlar iken. Ular hökümetning wediside turmighanliqi , hazirghiche Uyghur tijaretchilerning qayta tijaret bashlishi üchün shara'it yaritip bermigenlikidin narazi bolghan hem munasiwetlik orunlarning téz arida ziyan'gha uchrighan tijaretchi ammining turmush qamdishi üchün soda qilidighan orun körsitip bérishini telep qilghan.

Bu naraziliq yighilishidiki ammining inkasliri küchlük bolghan.

Turpan shehirini is-tütek qaplidi

Mezkur naraziliq herikitining sewebini sürüshtürüp kelgende , buningdin bir ay ilgiri yüz bergen yeni -3 öktebirdiki turpanni is tütekke qaplighan yéngi tereqqiyat soda sariyigha ot kétish weqesini eslep ötüshke toghra kélidu .

Turpan shehiridiki amma sheherdiki hemmidin awat bazar hésablan'ghan yéngi tereqqiyat soda sariyida taza roza héytliq sodiliqini qiliwatqan peytlerde,yeni 3 - öktebir chüshtin burun sa'et 10 yérimlarda , bu soda sarayda tuyuqsiz tutashqan ot apiti tüpeyli ganggirashta her tereplerge qachti . Is-tütek turpan shehirini bir aldi , soda sarayda on minggha yéqin kishi bar idi , ot apiti yuz bergendin kéyin , öt öchürüsh etritidikiler , saqchi da'iriliri yétip kélip otni öchürgiche ariliqta ikki yérim sa'et ketti ,gerche bu ghayet zor ot apitide ,ot öchürüshke nechche ming amma teng qatnashqan bolsimu , weqede yenila bir kichik bala qaza qildi, 25 magizin we ashxanilar köyüp külge aylandi .

Hazirghiche turpandiki munasiwetlik da'iriler bu ot kétish weqesining sewebini ashkarilimidi . Soda saraydiki ammidin igilishimizche . Bu soda sariyida dukan achidighanlarning %90 tin köpreki Uyghur bolup , shunga xéridarlirimu asasen yenila Uyghur ammisi iken . Gerche hökümet axbaratlirida mezkur ot apitide bir kichik balining qaza qilghanliqi qeyt qilin'ghan bolsimu , emma turpandiki kishilerning bildürüshiche , weqede 4 adem ölüp , 10 milyon yüen'ge yéqin mal - mülük ziyan'gha uchrighan iken .

Ot öchken bolsimu, xelqning ghezep oti öchmidi

Mezkur ot kétish weqeside dukini hem ashxaniliri köyüp ketken sodigerler hazirgha qeder héchqandaq tölemge érishelmigendin sirt, hökümet orunliri ulargha téz arida waqitliq soda bashlaydighan'gha qayta orun körsitip béridighan'gha wede qilghan bolsimu , bir aygha qeder hel qilmighan. Dukanliri köyüp zor iqtisadi ziyan tartqandin bashqa bir ayghiche tirikchilik yolini qilalmighan tijaretchiler birliship bügün mushu yolda hökümetke naraziliq bildürgen iken.

Biz mezkur naraziliq herikiti heqqide yenimu tepsiliy melumat élish üchün turpandiki yéngi tereqqiyat soda saray jaylashqan rayondiki saqchi ponkitigha téléfon qilduq ,gerche téléfonni alghan Uyghur saqchi mezkur weqening namayish ikenlikini inkar qilghan bolsimu , shundaq naraziliq herikiti bolghanliqini bildürdi.

Biz turpanda yüz bergen mezkur naraziliq yighilishi toghrisida, anglighuchilirimizgha kéyinki programmilirimizda yenimu tepsiliy melumatlar yetküzüshke tirishimiz. Shundaqla mezkur weqedin xewerdar kishilerning biz bilen alaqiliship uchur yetküzüshige muhtajmiz. (Gülchéhre)

Pikirler (0)
Share
Toluq bet