Turpandiki namayish yene dawamlashmaqta

• Muxbirimiz shöhret hoshurning bu heqtiki toluq melumati
• Download story audio

Jong shin tor béti, www.news.xmnext.com, Ning 2007 - yili 3 - ökebir xewirige qarighanda, Uyghur éli turpan shehirining yéngi tereqiyat soda sariyigha ot kétip, bir kichik bala ölgen, 25 dukan we resturanlar köyüp ketken. Süret, www.news.xmnext.com Betidin késip élindi. Photo: www.news.xmnext.com snap shot

Bu yil 11 ‏- ayning 17 ‏- we 19 ‏- künliri, turpan shehiridiki tijaretchiler naraziliq namayish ötküzdi. Bu,turpandiki tijaretchiler mushu ay ichide ötküzgen 2 ‏- we 3 ‏- qétimliq namayish bolup, 1 ‏- qétimliqi 11 ‏- ayning 1 ‏- küni ötküzülgen. Namayishchilarning naraziliqi 3 ‏- öktebir küni yüz bergen ot kétish weqesige munasiwetlik bolup, hökümet terep özining ziyanni qismen tölep bérish we yéngi orun körsitip bérish wedisini hazirgha qeder orunlimighan.

Namayishchilargha hem aldash hem tehdit pozitsiyisi tutulghan

Namayishning neq meydan awaz xatirisidin melum bolushiche, namayish ténch shekilde dawam qilghan, emma hökümet terep bir tereptin, wedisini yéngilap, namayishchilarni aldash pozitsiyisini tutsa, yene bir tereptin neq meydan'gha köp sanda saqchi qisimliri؛ hetta bir herbiy aptomobil ewetip, namayishchilargha tehdit salghan.

Biz namayishta namayishchilarning qandaq teleplerni otturigha qoyghanliqi we hökümetning qandaq jawab bergenlikini igilesh üchün, turpan sheherlik partkom teshwiqat bölümige téléfon qilghinimizda, teshwiqat bölümining bir xadimi, deslep namayish yüz bergenlikini inkar qildi.

Teshwiqat kadiri, namayish yüz bergenlikini étirap qildi

Biz qolimizda neq meydan awaz xatirisi barliqini bildürgendin kéyin, mezkur xadim ot kétish weqesige a'it xewerlerni tarqitishning cheklen'genlikini étirap qildi we tepsiliy melumat bérelmeydighanliqini bildürdi.

1 ‏- Noyabirdiki namayishqa 800 ge yéqin kishi qétilghanliqi melum bolghan idi, bu qétimqi namayishqa qanchilik kishi qétilghanliqi melum emes ؛ emma namayishning neq meydan awaz xatirisidin melum bolushiche, namayishchilar qoshunining qatnashqa tosalghu bolghanliqi melum ؛ bu ehwaldin namayishchilar sanining az dégende ikki-üch yüz kishi ikenlikini texmin qilish mumkin.

Birinchi qétimliq namayishta ikki kishining qolgha élin'ghanliqi melum bolghan, bu qétimqisida, qolgha élin'ghanlarning bar ‏- yoqluqini igilesh üchün turpan jama'et xewpsizliki idarisigha téléfon qilghinimizda, saqchi idarisi özlirining muxbir ziyaritini qobul qilmaydighanliqini bildürüp jawab bérishni ret qildi.

Saqchi bashlighi: " biz muxbirning ziyaritini qobul qilmaymiz"

Aldimizdiki ikki ay ichide, xitayda eng bazar tapqan kitab " xitay yazghuchisi sung xungbing teripidin yézilghan " pullar urushi" dégen kitabtur, kitabta dunyadiki milletler ara toqunushning pul toqunushi ikenliki, xitay millitining dunyawi riqabette iqtisadiy küchke tayinipla, ghalip chiqalaydighanliqi körsitilgen. Xitay millitining iqtisadiy éngini kücheytish üchün bu xil tirishchanliq körsitiwatqan xitay hökümitining Uyghur tijaretchilirining ziyan'gha uchrighan iqtisadiy menpe'etige biperwa qarishi, Uyghur milliy herikitining yolbashchisi rabiye qadir xanimning töwendiki sözlirining qimmitini ispatlimaqta.

Rabiye qadir xanimning pikriche, "Uyghurlarning siyasiy teqdiri hel bolmay turup, Uyghur tijaretchilerning mal-dunyasigha ot kétish hadisisidin saqlinip bolghili bolmaydu؛ Uyghurlarning milliy döliti qurulmay turup milliy menpe'eti kapaletke ige bolalmaydu." (Shöhret hoshur)