Turpanyüzi déhqanliri erz qiliwatqan yéza bashliqi pexridin yötkiwétildi

Ghulja nahiyisining turpanyüzi yézisidiki öz baghlirini béyjing chingxu'a shirkitige erzan bahada sétip bérishke mejbur bolghan 15 a'ililik déhqan, Uyghur aptonom rayonluq erziyet ishxanisigha kolléktip erz qilghan.
Muxbirimiz méhriban
2011-02-03
Share
dehqan-305.jpg Uyghur élidiki déhqanlar.
RFA

Ghulja nahiye turpanyüzi yézisidiki déhqanlar bultur hem aldinqi yilliri özlirining uzun yilliq tirishchanliqi bilen berpa qilghan baghlirining, nahiyilik hem yéziliq hökümetning bésimi bilen, béyjing chingxu'a shirkitining turpanyüzi yézisida qurmaqchi bolghan istirahet baghchisi qurulushi üchün sétip bérishke mejbur bolghan.

Igilishimizche, eyni chaghda öz baghliri hem térilghu yerlirini erzan bahada sétishqa mejburlan'ghan déhqanlardin 15 a'ililik déhqan, yéziliq hökümetning bésimigha qarimastin, bu yil yanwarda ürümchidiki Uyghur aptonom rayonluq erziyet ishxanisigha turpanyüzi yéziliq hökümet hem nahiyilik hökümetni déhqanlarning yérini bazar bahasidin töwen bahada sétishqa mejburlap, otturidin payda aldi dep erz qilghan.

Yézidiki déhqanlarning inkas qilishiche, eyni chaghda turpanyüzi yézisidiki déhqanlarning térilghu yerliri her mo yer üchün 18 ming yüen baha qoyulup sétiwélin'ghan. Déhqanlar sürüshtürüsh arqiliq bu bahaning xitay ölkiliridiki térilghu yerlerge qoyulidighan bahadin xélila töwenlikini bilgendin kéyin, bu ishqa narazi bolup, bezi déhqanlar térilghu yerlirini sétishni ret qilghan bolsimu, emma yéziliq hökümetning qattiq bésimi bilen öz yerlirini sétip bérishke mejbur bolghan.

Deslepki chaghlarda nahiyilik hökümet déhqanlarning baghliridiki méwilik derex hem bashqa qurulush matériyali qilishqa bolidighan térek, qariyaghach qatarliq derexler üchün ayrim heq tölinidighanliqini wede qilghan bolsimu, emma del-derexlerge tölinidighan pul, bazar bahasidin az hésablinip tölen'gen. Hetta bezi déhqanlar bu pulgha érishelmigen.

Radi'omiz ziyaritini qobul qilghan bir déhqanning bildürüshiche, déhqanlar sürüshtürüsh arqiliq, xitay ölkiliride her mo térilghu yer üchün déhqanlargha 100 ming yüen etrapida heq tölinidighanliqini bilgendin kéyin, yer bahasidiki bu xil perq déhqanlarning nahiyilik hökümetke bolghan naraziliqining küchiyishige seweb bolghan iken.

Uyghur aptonom rayonluq erziyet ishxanisining öz kimlikini ashkarilashni xalimaydighan bir xizmetchi xadimining bildürüshiche, erziyet ishxanisi turpanyüzi déhqanlirining yer dawasi heqqidiki erzini ötken ayda qobul qilghan. Bu xizmetchi xadim öz bayanida yene nöwette özlirining Uyghur élining herqaysi jayliridin térilghu yer hem bagh-waranlirini yerlik hökümet da'irilirining mejburlishi bilen, sétishqa mejburlan'ghan déhqan, charwichilarning erzlirini qobul qiliwatqanliqini bildürdi.

Öz kimlikini ashkarilashni xalimaydighan yene bireylenning bildürüshiche, déhqanlarning erzidin kéyin, yéziliq hökümet kadirliri erz sun'ghan déhqanlarning öylirige kélip, ularning yéziliq hökümet üstidin erz sunushigha kimlerning yardem qilghanliqini sürüshtürgen. Hetta bir déhqandin uning Uyghur aptonom rayonining merkizi bolghan ürümchide hökümet orunlirida ishleydighan tughqinining bar-yoqluqini sürüshtürgen. Shundaqla bu yéza kadirliri déhqanlarni yer dawasi heqqidiki erzni metbu'at orunlirigha ashkarilimasliqqa agahlandurup, yéziliq hem nahiyilik hökümetning déhqanlarning erzini qayta körüp chiqip, yerlik orunda hel qilidighanliqini bildürgen.

Radi'omiz ziyaritini qobul qilghan déhqanning bildürüshiche, yézidiki déhqanlar ötken hepte turpanyüzi yézisining yéza bashliqi pexridinning, ghulja nahiyisidiki yéngitam yézisigha yéza bashliqi bolup yötkelgenliki, uning ornigha nahiyilik hökümettiki yene bir ayal kadir yéza bashliqi bolup teyinlen'genlikidin xewer tapqan.

Turpanyüzi yézisidiki déhqanlarning bildürüshiche, déhqanlargha yéza bashliqi pexridinning xizmitining yötkelgenliki uqturulghan bolsimu, emma yéza bashliqi pexridinning yötkilish sewebi heqqide nahiyilik hökümet turpanyüzi déhqanlirigha héchqandaq chüshendürüsh bermigen. Turpanyüzi yézisidiki déhqanlarning inkas qilishiche, eyni chaghda turpanyüzi yézisidin déhqanlarning baghlirini sétishqa mejburlighanlar ichide yéza bashliqi pexridin hem yuqiriqi turpanyüzi kentining bashliqi abdusemet qatarliqlar aktip rol oynighan iken. Hazir déhqanlar arisida, ularning hem nahiyilik hökümettiki bezi kadirlarning déhqanlarning yérini chingxu'a shirkitige sétip bérishke mejburlishi bedilige, otturidin payda alghanliqi heqqide gep-sözler köpeymekte iken. Bolupmu, kent bashliqi abdusemetning eyni chaghda béghini sétishni ret qilghan nuri isimlik bagh igisi hem bashqa déhqanlarni yérini sétishqa biwasite mejburlap, tehdit salghanliqi sewebidin, déhqanlarning uninggha bolghan naraziliqi küchlük iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet