Rabiye qadir soda sariyining ikki neper xadimi, xitay bixeterlik idarisi teripidin tutup kétildi

• Muxbirimiz eqidening bu heqtiki toluq melumati
• Download story audio

17-Mart rabiye qadir xanim washin'gton'gha yétip kélip, a'ilisi bilen jem bolghan idi.

Xitay bixeterlik tarmaqliri 10 -may küni "eqide hessidarliq soda shirkiti" ning dériktori 34 yashliq ayshemgül xanim bilen mezkur shirketning bash katipi 25 yashliq rozi memet ependini sewebsizla tutup ketken.

Biz bu weqedin xewer tapqandin kéyin, ularning néme üchün tutup kétilgenlikini sürüshte qilip, rabiye qadir soda sariyi etirapidiki jenubiy qowuq saqchi ponkiti we ittipaq yoli saqchi ponkitlirigha téléfon urduq.

Erkin asiya radi'osidin téléfon uruwatqanliqimizdin xewer tapqan xitay saqchi xadimliri, bizning su'allirimizgha jawab bérelmeydighanliqini, bizning ürümchige kélip, saqchi ponkitining bashliqi bilen alaqe qilishimizni éytip su'alimizni qopalliq bilen jawabsiz qoydi.

Tutup kétilgen ayshemgül: men néme gunah qildim?

Biz neq meydanda weqeni körgüchi shahitlardin birini tépip, uningdin heqiqiy ehwalni igiliduq. Biraq uning bixeterlikini nezerde tutup, uning bilen ötküzgen söhbitimizni hazirche anglatmasliqqa qarar berduq.

Shahitning éytip bérishiche "eqide hessidarliq soda shirkiti" ning dériktori ayshemgül, sa'et 1 etirapida saqchilar teripidin nahayiti qopalliq bilen élip kétilgen. Xitay saqchisi emdila 7 ayliq balining anisi bolghan gunahsiz ayshemgülni "men néme gunah qildim, néme üchün méni élip mangisiler" déginige qarimay chéchidin tutqan péti mashinigha sörep élip chiqip ketken. Melum bolushiche, ularni tutup ketken orun aptonum rayonluq dölet bixeterlik nazariti iken.

Biz, mezkur yip uchigha asasen, aptonum rayonluq dölet bixeterlik nazaritining nöwetchi xadimigha, aldi bilen erkin asiya radi'osining muxbiri ikenlikimizni bildürüp, néme üchün ayshemgül bilen rozi memetni tutup ketkenlikini soriduq.

Bu xadim "siz bu ishtin qaysi yol arqiliq xewer taptingiz? sizge weqeni kim éytip berdi. Rabiye qadirning a'ilisidikilermu yaki neq meydanni körgüchilermu? sizning ismingiz néme ? dégen'ge oxshash bir qatar su'allarni sorighandin kéyin, özining weqedin toluq xewerdar emes ikenlikini, bir kündin kéyin qayta téléfon urushimizni éyitti we bu heqte qana'etlen'gidek bir jawab bermidi.

Puqralarning hoquqi üchün sözligen rozi memet ependimu tutulghan

Neq meydanni körgüchi shahitning bildürüshiche, shirketning bash katipi rozi memet, ayshemgülning qolgha élinish sewebini jama'et xewpsizlik idarisidin sürüshte qilghan we " jongxu'a xeliq jumhuryitining qanunida, puqralarning hoquqi éniq békitilgen, siler ayshemgülni tutup kétish sewebinglarni bizge chüshendürüshinglar kérek, silerning bu herikitinglar shirkitimizde qalaymiqanchiliq chiqirwetti" digen'ge oxshash sözler bilen öz naraziliqini bildürgen.

Sa'et 3 lerde, ikki xitay saqchisi we bir Uyghur saqchisi shirketke kélip, rozi memettinmu sorashqa tégishlik mesile barliqini éytip, derhal özlirini bilen bille kélishni buyrup, unimu élip ketken.

Sidiq haji a'ilisining küchlük naraziliqi

Bu weqe téxi yéngila erkinlikke chiqqan, meshhur kishilik hoquq pa'aliyetchisi, qehriman Uyghur anisi rabiye qadir xanimning we uning hemriyi sidiq haji rozi ependining küchlük naraziliqini qozghidi.

Sidiq haji rozi ependi, bu ikki yashning tutup kétilgenlik xewirini, amérikidiki munasiwetlik orunlargha melum qilghanliqini éytti. Rabiye qadir xanim, xitay hökümitining derhal ayshemgülni we rozi memetni, hetta pütün Uyghur siyasiy mehbuslarni qoyup bérishini telep qilidighanliqini bildürdi.

• Sidiq haji rozi ependi we rabiye qadir xanim mundaq dédi
• Download story audio