Поскам нефитликидики бир қисим оқутқучи - оқуғучилар "миллий бөлгүнчи" дәп әйиблинип қолға елинди


2005.06.13
Share on WhatsApp
Share on WhatsApp

Поскам нефитлик биринчи оттура мәктәп, уйғур оттура мәктипи болуп, 3 - айниң -12 - күни бу мәктәпниң бир топ оқуғучилири мәктәп сиртида бир топ хитай оқуғучилар билән тоқунушуп қалған. Тоқунуштин кейин 1 - оттурниң он нәччә оқуғучиси сақчи даирилири тәрипидин қолға елинип, сорақ қилинған. Әмма хитай оқуғучилар һечқандақ җазаға учримиған.

Қолға елинған уйғур оқуғучилар, қорамиға йәтмигән толуқсиз оттура мәктәп оқуғучилири болуп, улардин төтигә қанун бойичә җинайи җаза берилип, яш- өсмүрләрни әмгәк билән тәрбийиләш орниға елип кетилгән. Поскам наһийисидә бу вәқәдин хәвири бар бир, бу һәқтә бизгә билидиғанлирини сөзләп бәрди.

Уйғурлар хитайлар билән тоқунушуп қалса миллий бөлгүнчиликму?

яш- өсмүрләр оттурсидики бу дәталаш буниң биләнла түгимигән, уйғур оқуғучилар билән хитай оқуғучиларарисидики бу муштлишиш вәқәси хитай сақчи даирилири тәрипидин миллий бөлгүнчилик һәрикити дәп қарилип, 1 - оттура мәктәптики төт оқутқучиму бу вәқә мунасивити билән "оқуғучиларға миллий бөлгүнчилик идийиси сиңдүргән" дәп әйиблинип җазаға учриған. Оқутқучи абдулла җамал, абдушүкүр абдурахманлар хизмәттин қоғланған. Айгүл абдуғени, аниқиз ғопур исимлик икки нәпәр аял муәллимни хитай мәктәплиригә 60٪ мааш билән тазилиқ ишчилиқиға икки йиллиқ чүшүрүп синақта қойған, мәктәп мудири мухтәр қадирму бир мәзгил тәкшүрүшкә турмақта икән

Йәнә бир баһанә - идеологийә бөлгүнчилики

Игилишимизчә, 1 - оттура мәктәптин хизмәттин қоғланған абдулла җамал исимлик оқутқучиң көзгә көрүнгән талантлиқ язғучи болуп, сақчи даирилири уни "язған әсәрлиридиму бөлгүнчилик идийилирини тәрғип қилған" дегән баһаниләр билән 4 - айда қолға алған болуп, һазирғичә мәхпий тутуп туриливатқан икән.

Биз бу учурларға игә болғандин кейин 1 - оттура мәктәпниң мәктәп мудири ғәйрәткә телефон қилип, қолға елинған оқутқучи -оқуғучиларниң исмини һәмдә уларниң әйиблиниш һәмдә җинайи җазаға учраш сәвәбини соридуқ. Әмма у соаллиримизға җаваб беришни рәт қилди.

Биз йәнә бу оқутқучи һәм оқуғучиларни қолға алған поскам наһийилик җамаәт хәвпсизлик идарисигә телефон қилип 1 - оттура мәктәптин қолға елинған оқутқучи - оқуғучиларни соридуқ. Әҗәплинәрлики телефонни алған сақчи хадим, бундақ бир вәқә болғанлиқини инкар қилди.

Мәхпий тутулған чоң вәқә

1 -Оттура мәктәптики оқутқучиларниң билдүрүшигә қариғанда, бир оттура мәктәптин бирла вақитта шунчә көп оқутқучи -оқуғучиларниң сақчи даирлири тәрипидин қолға елинип һәм җазаға учриши һәқиқәтән бир чоң вәқә болсиму, әмма мунасивәтлик даириләр мәзкур вәқәни наһийә ичидила наһайити еһтиятчанлиқ билән бир тәрәп қилмақта икән. Шуниң үчүн болса керәк, биз мәзкур вәқәниң тәпсилатлири һәққидә учур елиш җәрянида нурғун тосқунлуққа учридуқ.

Кейинки аңлитишлиримизда, аңлиғучилиримизға мәзкур вәқәгә четишлиқ болған оқутқучи һәм оқуғучиларниң әһвали һәққидә, йәниму тәпсили учурлар йәткүзүшкә тиришимиз. (Гүлчеһрә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.