Türkiye tashqi ishlar ministirliqi bilen tajikistanning enqerede turushluq elchixanisining aldida namayish ötküzüldi

Tajikistan elchixanisining aldida uch Uyghurni sürüshte qilip namayish qildi. 2011-Yili 25-yanwar.

Tajikistan xewpsizlik xadimliri teripidin tutup kétilgen abdulxemit dawut'oghlu, exmet reshit we kemal ömer'oghluning aqiwitini sürüshte qilish we tajikistan hökümitige bolghan naraziliqini bildürüsh üchün türkiyide pa'aliyet élip bériwatqan sherqiy türkistan ammiwi teshkilatliri 1-ayning 25-küni etigen türkiye tashqi ishlar ministirliqi aldida, chüshtin kéyin bolsa tajikistanning enqerede turushluq elchixanisi aldida namayish ötküzdi. Namayishqa istanbuldin kelgen Uyghurlar bilen enqerede pa'aliyet élip bériwatqan ammiwi teshkilat mes'ulliri we türk qollighuchiliridin bolup 500 etrapida kishi qatnashti.

RFA/Erkin Tarim

Uyghurlar qollirida tajikistan xewpsizlik xadimliri teripidin tutup kétilgen 3 Uyghur bilen xitay dölet re'isi xu jintaw we tajikistan dölet bashliqining hejwiy resimlirini, sherqiy türkistanning ay yultuzluq kök bayriqi bilen herxil sho'arlar yézilghan wiwiskilarni kötürüwalghan halda namayish qildi. Kéyin tashqi ishlar ministirliqi emeldarliridin özgen ependi namayishchilardin 5 kishilik hey'etni qobul qilip, tajikistan xewpsizlik xadimliri tutup ketken türk puqrasi 3 Uyghur weqesidin türkiye bash ministiri rejep tayyip erdoghan bilen tashqi ishlar ministiri exmet dawut'oghluning xewiri barliqini we alahide köngül bölüwatqanliqini, diplomatik yollar bilen sürüshte qiliwatqanliqini, resmiy bolmighan yollardin igilishiche, bu üch Uyghurning tajikistanning paytexti düshenbide solaqliq ikenlikini, xitaygha tapshurup bérilmigenlikini éytti.

RFA/Erkin Tarim

Kéyin sherqiy türkistan medeniyet we hemkarliq jem'iyiti enqere shöbisi bashliqi xeyrullah efendigil ependi, sherqiy türkistan ma'arip we hemkarliq teshkilati rehberliridin hidayitullah oghuzxan, abdulhekim mexsum, alimjan bughda we sherqiy türkistan yashlar teshkilati bashliqi tebet yüjetürk qatarliq kishilerdin terkib tapqan hey'et türkiye parlaméntigha kirip bezi siyasiy partiyilerning rehberliri we parlamént ezaliri bilen uchrashti. Chüshtin kéyin sa'et 2 yérimda tajikistanning enqerede turushluq elchixanisining aldida namayish ötküzüldi.

Namayish axirlashqandin kéyin 5 kishidin terkib tapqan bir hey'et tajikistan elchixanisining aldigha qara gülchembirek qoydi. Kéyin tajikistan elchiliki bash katipigha tajikistan hökümitining bu 3 Uyghurni qoyuwétishi heqqide sun'ghan iltimasini berdi. Bash katip muxbirlargha bayanat bérip, abdulxemit dawut'oghlu, exmet reshit we kemal ömer'oghlu qatarliq 3 Uyghurning tajikistanda tutup turuluwatqanliqini, bularning qanuniy resmiyetliri tamamlan'ghandin kéyin, türkiye tashqi ishlar ministirliqigha tepsiliy melumat béridighanliqini éytti.

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar