Wang léchüen "‏üch xil küch" ke zerbe bérishni qayta tekitlidi


2006-05-15
Share

Xitayning Uyghur aptonom rayonidiki partkom sékritari wang léchüen shenbe küni rayondiki her qaysi derijilik jama'et xewpsizlik idarilirini yuqiri mes'uliyetchanliq bilen üch xil küchke qattiq zerbe bérishke chaqirdi. Gerche wang léchüenning bu sözliri yéngiliq bolmisimu, lékin yéqindin buyan aptonom rayon emeldarlirining ‏üch xil küchke zerbe bérish awazi bir qeder yuqiri bolup keldi.

Amérikining ottura asiyadiki tesiri xitayni endishige séliwatidu

Wang léchüen bu qétim sözide, nöwettiki murekkep xelq'ara weziyet astida Uyghur aptonom rayonining üch xil küchke zerbe bérish jehette yaxshi netijilerni qazinip kelgenlikini, shundaqla buningdin kéyinmu yuqiri hoshyarliq bilen dölet ichi we sirtidiki üch xil küchke zerbe bérish we ulargha qarshi mudapi'e tedbirini kücheytishning zörürlikini tekitlidi.

Wang léchüenning "murekkep xelq'ara weziyet" dégen sözi heqqide toxtalghan amérikidiki Uyghur ziyaliysi sidiqhaji rozi ependi, amérikining ottura asiyadiki tesirining xitayni endishige séliwatqanliqini, shu sewebtin ularning üch xil küchge zerbe bérishni tekrar tekitliwatqanliqini körsetti.

Sidiqhaji rozi ependi xitayning yene, amérikining xitay siyasiti we Uyghurlargha tutqan pozitsiyisi qatarliq amallilarningmu tesirige uchrawatqanliqini bildürdi. Bu heqte toxtalghan dunya Uyghur qurultiyining bayanatchisi dilshat rishit, Uyghur mesilisi barghanséri xelq'aralishiwatqan nöwettiki bu weziyette, xitay hökümiti Uyghur élidiki siyasitini téximu chingitish arqiliq Uyghurlarning musteqilliq arzusigha zerbe bérishni meqset qiliwatqanliqini éytti.

Gu'entanamodiki besh Uyghurning albaniyige orunlashturushi xitayni oygha saldi

Téxi yéqinda gu'entanamoda tutup turuluwatqan Uyghurlarning amérika hökümiti teripidin albaniyige orunlashturulishi xitay hökümitini qattiq ghezeplendürgen idi. Buning aldida xitay hökümiti Uyghurlarni xelq'arada térrorchi dep körsitishke tirishti hemde izchil türde amérikidin gu'entanamodiki Uyghurlarni xitaygha qayturup bérishni küchlük telep qilip kelgen.

Sidiqhaji rozi ependi xitay hökümitining bu jehettiki tirishchanliqining meghlub bolushimu, ularning üch xil küchge zerbe bérishni qayta tekitlishige türtke bolghan amil hésablinidighanliqini bildürdi.

Wang léchüen üch xil küchge zerbe bérishni tekitligen bu yighinda yene, aptonom rayon re'isi ismayil tiliwaldimu söz qilip, "shinjangda bölgünchilikke qarshi küreshning uzun - muddetlikliki we murekkeplikini chongqur tonush kérek " dédi.

Ziyaritimizni qobul qilghan sidiqhaji rozi we dilshat rishit ependi her ikkilisi, nöwette xelq'araning Uyghur mesilisige bolghan qiziqishi we köngül bölüshining barghanséri küchiyiwatqanliqini we chet'ellerdiki Uyghur dawasini qiliwatqan teshkilatlarningmu bu jehettiki tirishchanliqlirini ashuruwatqanliqini tekitlidi. (Peride)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet