Amérika dölet mejlisi xitayning axbarat kontroli siyasitini muzakire qildi

2007-08-02
Élxet
Pikir
Share
Print

Xitayda axbarat erkinliki amérika dölet mejlisidiki erbaplarning neziride bir kishilik hoquqi mesilisila emes, belki bu amérika dölet bixeterlikige tesir yetküzidighan bir mesilidur. Amérika dölet mejlisi qarmiqidiki xitay - amérika bixeterlik we iqtisadi közitish komitéti seyshenbe küni ispat bérish yighini chaqirip, xitayda puqralarning uchurgha érishishtiki qiyinchiliqlirini muzakire qildi. Yighinda amérika dölet mejlisining bir ezasi, xitay hökümitining uchur kontroli amérikining dölet bixeterlikige tesir yetküzidighan mesile hisaplinidighanliqini bildürdi.

Uchur erkinliki amérika üchün bir bixeterlik mesilisi

Amérika - xitay bixeterlik we iqtisadi közitish komitéti aldinqi küni chaqirghan ispat bérish yighinida amérika dölet mejlis ezasi elséy xestings yazma bayanat élan qilip, xitayning uchur kontroli nimishqa amérika üchün bir dölet bixeterlik mesilisi hésablinidighanliqini chüshendürdi. Xestingsning eskertishiche, xitay hökümiti uchurning her bir halqisini inchikilik bilen kontrol qiliwatidu. Yazma metbu'atlar yeni gézit - zhornallarni kontrol qilipla qalmay, türlük wastilar bilen intérnétni tizgénlimekte. Bu cheklime qarshi éqimdiki öktichi pikirlerni yekleshke qaritilghanla emes, belki partiye we hökümetning obrazini tikleshke nahayiti sezgür pozitsiye tutmaqta.

U, xitayning uchur kontroli amérikigha zor derijide tesir körsitiwatqanliqini eskertip, "xitay hökümitining kontroli we uchur manapoliyisi xitay milletchiliki we xitaylarda amérika düshmenlikini kücheytiwatidu. Yéqinqi xelq rayini sinash netijisidin melum bolushiche, xitay puqralirida amérikini dunyaning zomigiri, deydighan qarash nahayiti omumlashqan" dep körsetti.

Xestingsning eskertishiche, xitay hökümitining uchur kontroli amérika üchün dölet bixeterlik mesilisidur. U mundaq deydu, "xitay hökümitining cheklimisi rastni yoshurush we qorqutush medeniyitining dawami. Tarix bizge shuni körsettiki , bir jem'iyet rastni yoshurush we yalghan sözlesh bilen tereqqi qilalmaydu. Bir hökümet buning bilen jem'iyetni yaxshi bashquralmaydu. Biz xitaydek nopusi köp, herbiy küchi we iqtisadi zor bir döletke sel qarimasliqimiz kérek. Chünki bu bizning bixeterlikimiz bilen munasiwetlik".

Tam xarkén: xitay puqraliri nime yewatqanliqidin xewersiz

Tam xarkin yighinda söz qilghan amérika kéngesh palata ezalirining biri bolup, u xitayning uchur kontroli amérika -xitay soda munasiwitige chétilidighanliqini bildürdi. Tam xarkinning eskertishiche, bir dölet hökümiti qanche ochuq - ashkara bolsa bu dölet bilen dölet arisidiki sodining saghlam tereqqiyatini ilgiri sürüsh rolini oynaydu. Bolupmu bu import mehsulatlirining bixeterlikige kapaletlik qilishtiki eng muhim amillarning biridur. Tam xarkin, xitay qanun séstimisida mesile barliqini, xitayning import yimeklikliride mesile bayqalghandin kéyin, uning bu jehettiki ajizliqi ashkarilan'ghanliqini bildürdi. U mundaq deydu, "

Yéqinda yüz bergen weqelerdin shu nerse aydinglashtiki, xitay yimeklik, dora we tawar mehsulatlirining bixeterlik mesilisini tüzesh kérek bolsimu, lékin xitay hökümet emeldarliri buni téxi angqiralmidi. Mehsulatlarning bixeterlik mesilisi höjjetlik emes, puqralar buningdin xewersiz bolghanliqi üchün ular özining néme yewatqanliqini bilmeydu".

Xitayda uchurni qaysi organlar kontrol qilidu ?

Yighinda amérika kaliforniye uniwérsitéti bérkéliy shöbe mektipining xitay intérnét programmisi mudiri shaw chyang guwahliqtin ötüp, xitayda intérnét uchur alaqisi oxshimighan hökümet organliri teripidin oxshimighan derijide kontrol qilinidighanliqini bildürdi. U mundaq deydu, " jem'iy 14 hökümet orgini oxshimighan derijide intérnét uchur alaqisi üstidin nazaret élip baridu. Nazaret organliri neshriyat, téléwiziye, yimeklik, dora, ma'arip we mediniyet tarmaqliridin qurulghan. Bu organlarning nazaretchilik xizmiti dölet kabintining uchur ishxanisi teripidin bir tutash bashqurulidu. Bularning hemmisini bashqurudighan perde arqisidiki mexpiy organ - teshwiqat bölümidur.

Den sotérland: radi'o programmisigha kashila qiliwatidu

Yighinida erkin asiya radi'osining bash muherriri den sotérland radi'o programmilirining xitaygha tarqitilish ehwali üstide toxtilip, xitay da'irilirining mezkur radi'o programmilirigha izchil türde kashla peyda qilip kéliwatqanliqini bildürdi. Uning eskertishiche, xitayning sabiq dölet re'isi jyang zémin öz waqtida erkin asiya radi'osining anglitishini cheklesh, bolupmu Uyghur we tibet tilidiki anglitishini cheklesh, kashila ponkitlirini qurush toghrisida höjjet chüshürgen.

Den sotérland mundaq deydu," xewerlerde xitay hökümiti 2004 - yili fransiyining talés shirkitidin az dégende 16 dane yuqiri quwwetlik signal tarqatquchi eswapni kashila tughdurush meqsitide sétiwalghanliqini ashkarilidi. Bu eswaplarning qimmiti 1.5 Milyard dollar bolsimu, lékin bu keng - kölemlik kashila tughdurush torini bashqurush, asrash we uning meshghulatigha kéreklik bolghan chiqimning intayin az bir qisimidur".

Erkin pikir qilghuchilar dölet mexpiyetlikini ashkarilash bilen jazalanmaqta

Yighinda merkizi nyu - yorktiki xitay kishilik hoquqi jem'iyitining yuqiri derijilik tetqiqatchisi xé chinglyen, xitay kompartiyisi we hökümiti teripidin " paydisiz," dep qaralghan uchurlarni tarqitishqa jür'et qilghuchilar da'im dölet mexpiyetlikini ashkarilash namida jazalinidighanliqini bildürdi. U, "bu kishiler köp hallarda dölet mexpiyetlikige chétilip qalidighan kishilerdur. Bu jinayet bilen jazalan'ghuchilar köp hallarda özining shexsi kechürmishini yézip chet'eldiki to betliride yaki chégra sirtidiki kishilik hoquqi teshkilatlirida élan qilghanlar," dep körsetti.

Xitay metbu'atliri bir tereplimilik xewer béridu

Yighinda amérika awazi radi'osi xitay tili bölümining mudiri jey xéndérson, xitay metbu'atlirining nahayiti bir tereplimilik xewer béridighanliqini eskertip, yimeklik we dora bixeterlik mesilisini tema qilghan xewerler buning tipik misali, dep körsetti. U, "hökümet metbu'atlirini öz ichige alghan xitay axbarat wastilirining bu weqe toghrisidiki xewerliride mesile pütünley xelq'ara metbu'atlargha, bolupmu amérika metbu'atlirigha dönggep qoyuldi.

Xitay terepning qarishiche, amérika metbu'atining xewerliri haywanat yimeklikliridin kélip chiqqan. Chish pastisi, we bashqa mehsulat hem matériyallardin mesile peyda qilishtiki meqset xitayni alwastilashturushtur. Xitay hökümet da'irilirining inkasi bolsa deslepte meslini inkar qilish, kéyinche qismen qobul qilish, andin bir emeldargha ölüm jazasi bérish, axirida mesilini yene amérika metbu'atlirigha dönggeshtin ibaret " deydu .

Bazar igiliki xitay metbu'atlirini erkinleshtüriwatamdu ?

Xitay bazar igilikige köchkendin kéyin xitay metbu'atlirining nahayiti bazarlashqanliqini ilgiri sürgüchilerde, bazarlishish xitay metbu'atlirida erkinlik idiyisini uyghatmaqta, dégüchiler mewjüt. Lékin amérika midlburéy institutining siyasi penler yardemchi proféssori ashléy ésaréy, ispat bérish yighinida bu qarashni ret qildi.

U mundaq deydu, " méning tetqiqatimgha qarighanda metbu'atning bazarlishishi xitay metbu'atlirigha hichqanchilik erkinlik élip kélelmigen. Hetta ziyade bazarlashqan bezi gézitler kompartiyining teshwiqat uchurlirini partiye gézitliridinmu köp basmaqta." Kaliforniye uniwérsitétining bérkéliy shöbe mektipidiki shaw chyangning eskertishiche, xitay kompartiyisi we hökümiti intérnét uchur alaqisining siyasi tesirini tizgénlesh we nazaret qilish xizmitide zor muwapiqiyet qazinip, intérnéttiki pikirlerning puqralar herikitige aylinishini ünümlük türde tosap qéliwatidu.

U, xitay hökümitining amérikida amérika dimokratiyisidin paydiliniwatqanliqini, lékin amérikining xitayda bundaq qilalmaydighanliqini eskertip, "amérikidiki xitaylar merkizi téléwiziye istansisining programmilirini erkin köreleydu. Lékin xitaydiki puqralar amérikining xewerlirini erkin angliyalamdu ? dep soridi. (Erkin)

Pikirler (0)
Share
Toluq bet