Украинийидики президент сайлими


2004-11-23
Share

Украинийә президент сайлимида сахтилиқ көрүлгән дәп әйиблигән украинийә президент кандидати виктор юшенко сәйшәнбә күни украинийә пайтәхти кйев шәһириниң мустәқиллиқ мәйданиға топлашқан 200 миңға йеқин қоллиғучилириниң алдида өзиниң ғәлибә қилғанлиқини җакарлиди һәмдә хәлқарани буни етирап қилишқа чақирди.

200 Миңдин ошуқ киши сайлам нәтиҗисигә нарази болуп намайиш өткүзди

Америка бирләшмә ахбарат агентлиқиниң хәвиригә қариғанда, йәкшәнбә күни елип берилған украинийә президент сайлиминиң нәтиҗисидә, ٪ 99.38 Сайлам белити үстидин елип берилған статистикиға асаслинип, нөвәттики украинийә баш министири виктор янукович ٪ 49.42 Авазға, өктичи президент намзати виктор йошинко болса ٪ 46.70 Авазға еришкәнлики елан қилинған иди. Әмма, өктичи намзат йошинко бу нәтиҗидин нарази болуп, янукович тәрәпниң сайламда чидимаслиқ қилғанлиқини вә сайламниң адил елип берилмиғанлиқини әйиплиди. Шундақла у йәнә өзиниң һимайә қилғучилирини кочиға чиқип намайиш қилишқа чақирди. Нәтиҗидә дүшәнбидин һазирғичә болған мәзгилдә пайтәхт кйевдики мустәқиллиқ мәйданида 200 миңдин ошуқ йошинкониң қоллиғучилири йиғилип, сайлам нәтиҗисигә қаршилиқ билдүрди.

Хәвәрдә мәлум болушичә, һөкүмәт даирилири дүшәнбә күни елан қилған сайлам нәтиҗиси, сайлам понкитлиридики хәлқ райини синаш тәкшүрүш нәтиҗисигә пүтүнләй мас кәлмигән. Украинийидики хәлқ райини синайдиған бир қанчә мустәқил органлири сайлам понкитлириниң чиқиш еғизида беләт ташлап чиққан кишиләр үстидин тәкшүрүш елип барған болуп, уларниң нәзиридә президент сайлимида өктичи намзат йошинко утуп чиққан.

Йошинкониң қоллиғучилири сайламда еғир сахтилиқ қилиш әһвали көрүлгәнликидә чиң турди

Йошинкониң қоллиғучилири нөвәттә сайламда еғир сахтилиқ қилиш әһвалиниң көрүлгәнликини әйипләватқан болуп, йошинко хәлқни украинийә мәркизи сайлам комитети елан қилған сайлам нәтиҗисигә ишәнмәсликкә чақирди. Шу сәвәптин украинийә парламенти сәйшәнбә күни бу һәқтә җиддий йиғин чақиришқа мәҗбур болди.

Америка симлиқ телевизийә хәвәр ториниң мәлуматиға қариғанда, украинийәниң һәрқайси җайлиридин кәлгән намайишчиларниң сани дүшәнбидин сәйшәнбигичә болған арилиқта тез сүрәттә көпийиватқан болуп, улар қишниң соғақ һавасиға қаримастин мустәқиллиқ мәйдани алдида тинч қаршилиқ билдүрди һәмдә йошинкониң утқанлиқи җакарланмиғичә уларниң бу йәрдин кәтмәйдиғанлиқини ейтти. Намайишчилар топиға һәтта йошинкони қоллайдиған нурғун сақчиларму қатнашқан. Мәзкүр йиғилиш пайтәхт кйев шәһиридин башқа йәнә, украинийдики ливив, тернопел, винитсия вә ивано-франкивиск қатарлиқ 4 чоң шәһәрдиму давам қилмақта. Америка " мирас фонди җәмийити" ниң русийә вә сабиқ совет иттипақи ишлири мутәхәсиси коһен әпәнди украинийә президент сайлими һәққидә тохтилип мундақ деди:

" Бешидин тартипла украинийә һөкүмитиниң телевизийә, мәтбуат, сиясий тәсири вә украинийиниң руслар көп олтурақлашқан шәрқий районлиридин пайдилинип, сайлам нәтиҗисигә тәсир көрсәткәнлики тоғрисда сөз-чөчәк таралған. Әмәлийәттиму биз йеқинқи бир икки күндин буян украинийидики бир қанчә мустәқил органларниң һөкүмәтниң сайламда сахтилиқ қилғанлиқини әйиплигәнликидин хәвәрдар болдуқ. Нөвәттики мәсилә өктичи тәрәпниң кейинки қәдимини қандақ бесишида".

Намайишчилар кйевниң асаслиқ қатнаш йоллирини қамал қилди

Украинийә парламентида баш министир януковични қоллайдиғанлар көп санлиқни игәлләйдиған болуп, өктичи йошинкониң қоллиғучи гурупписидикиләр, әгәр парламент буниңға һечқандақ чарә қолланмиса, намайишчиларниң кйевдики асаслиқ қатнаш йоли, айродром һәтта шәһәрлик һөкүмәт биналирини қамал қилишқа мәҗбур болидиғанлиқини билдүрди. Америка "мирас фонди җәмийити" ниң мутәхәсиси коһен әпәнди украинийә өктичи гороһиниң қануний вә мәмурий йол билән сайлам нәтиҗисигә җәң елан қилалайдиғанлиқини билдүрди. У мунда деди:

"Һазир өктичиләрниң алдида икки хил йол бар. Бири қануний йол билән сайлам нәтиҗисигә җәң елан қилип, бу қетмлиқ сайламда нурғун җәһәтләрдин қанунға хилап һәрикәтләрниң йүз бәргәнликини, болупму украинийә парламентиниң сайламға қатнашмаслиқни чәкләш бәлгилимисиниң өзи қанунға хилап һәрикәт икәнликини әрз қилиш. Йәнә бир йол, хәлқ бирлишип намайиш өткүзүп сайлам нәтиҗисигә давамлиқ наразилиқ билдүрүш һәтта нөвәттики һакимийәтни ағдуруп ташлаш. Адәттә бу асаслиқи хәлқниң кәйпиятиниң қанчилик юқири болишиға бағлиқ".

Русийә президенти виладимир путин януковични қоллиди

Баш миниситир януковични русийә һөкүмити йеқиндин қоллайдиған болуп, русийә президенти виладимир путин сайлам нәтиҗисини аңлиғандин кейин, януковичниң сайламда утқанлиқини етирап қилған вә уни тәбриклигән. Әмма өктичи гуруһтики юшинкони қоллайдиған ғәрп әллири болса сайлам нәтиҗисидин нарази болди, һәтта украинийә һөкүмитини агаһландуруп, һөкүмәтниң сайлам нәтиҗисигә мудахилә қилиш һәрикитиниң ғәрп әллириниң украинийә билән болған мунасивитигә еғир тәсир йәткүзидиғанлиқини тәкитлиди. Америка билән явропа бирлигиму украинийәдики бу сайламниң адил болуш яки болмаслиқи, украинийиниң америка вә явропа бирлиги билән болған мунасивитини бәлгиләйдиғанлиқини агаһландурди. (Пәридә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт